Serliga eru tað fólk við bústaði í Tórshavn, ið hava keypt sær grundstykki til frítíðarhús við Gjógv. Men ikki øll koma úr høvuðsstaðnum. Tvørafólkini Kári Niclasen og konan Anja byggja frítíðarhús í bygdini við teimum mongu ferðafólkunum og vøkru náttúruni. Fornagarður er ein útstykking til 19 frítíðarhús, ið eisini kunnu nýtast sum heilárshús. Vit hava prátað við Kára Niclasen, hvørs mamma var frá Gjógv. Tí kennir hann seg ikki fremmandan í bygdini.