Khasi Language - "Jesus: Teacher and Healer".mp4 //

1 KORINTH 13 - Ka jingieit1Nga lah ban kren ha ki ktien jong ki briew bad wat ha ka jong ki angel ruh, hynrei lada ngam don ka jingieit, ka jingkren jong nga ka long kum ka wiang rnong ba sawa ne kum ka shakuriaw bariew shaw shaw. 2Nga lah ban don ka jingai ban ïalap da ka jingpyrsad mynsiem; nga lah ban don ïa ka jingtip baroh bad shemphang ha ki jingmaïan baroh; nga lah ban don ïa ka jingngeit baroh kaba donkam ban pynkynriah ïa ki lumbah — hynrei lada ngam don ka jingieit, ngam long ei ei. 3Nga lah ban ai baroh kaba nga don, bad wat ïa ka met jong nga ïa ka ban thang — hynrei lada ngam don ka jingieit, kane kam myntoi ei ei ïa nga. 4Ka jingieit ka ïaishah slem bad ka lehsbun; kam ju pihuiñ lane kam ju kob sarong; 5ka jingieit kam leh khlem akor lane wad ïa la ka jingmyntoi lane khapnap; ka jingieit kam ju buh jingkynmaw ïa ki jingbakla; 6ka jingieit kam kmen ha ka jingbymman, hynrei ka kmen ha ka jingshisha. 7Ka jingieit kam sangeh noh shiteng; bad ka jingngeit, ka jingkyrmen bad ka jingïaishah jong ka kim duh noh. 8Ka jingieit ka neh bymjukut. Ki don ki khubor da ka jingpyrsad mynsiem, hynrei ki long tang shipor; ki don ki jingai ban kren ha ki thylliej bapher, hynrei kin dam noh; ka don ka jingtip, hynrei kan sa jah noh. 9Naba ki jingai jong ngi ha ka jingtip bad ha ki khubor da ka jingpyrsad mynsiem ki long tang katto katne; 10hynrei haba kata kaba janai kan wan, te kata kaba tang katto katne kan jah noh. 11Mynba nga dang khynnah, ka jingkren jong nga, ki jingsngew, bad ki jingpyrkhat ki long baroh kum ki jong u khynnah; mynta ba nga la rangbah, nga iehnoh ïa ki rukom khynnah. 12Kaei kaba ngi ïohi mynta ka long kum ka dur kaba byrngut ha ka ïitkhmih; nangta ngin sa ïohi markhmat. Kaei kaba nga tip mynta ka long tang katto katne; nangta kan sa long kaba dap pura — kaba dap pura kum ka jingtip jong U Blei ïa nga. 13Kine lai tylli kin ïaisah: Ka jingngeit, ka jingkyrmen bad ka jingieit; bad kaba khraw tam na kine ka long ka jingieit.