最近因為一帖食咳嗽的藥方，我介紹誠濟親情五十，去看一本中醫冊叫「四聖心源」，是一個傳奇的清國御醫，名叫做黃元御所寫的，伊會使算是彼時陣乾隆皇帝的家庭醫師。阮阿舅是開中藥店，我自細漢就共中藥有咧接觸，但就是干焦比別人較慣勢食中藥爾，對中醫所講的陰陽，五行六氣，五臟六腑攏無啥了解。讀冊的時陣，受到較濟的訓練，嘛攏是現代科學所講的遐的原理、實驗、觀察的方法。

開始接觸中醫冊，是看到古早人咧講的陰陽環境變化，跟家己所讀過的，現代的時間空間，天文物理所講的，雖然解釋的方式無仝，但是怹所推演的現象，其實有誠相仝的感受。我就共九冬前所寫過的一篇面冊網誌，改寫做漢字台文，來跟逐家交流。

陰陽未判，一氣混茫。氣含陰陽，則有清濁，清則浮升，濁則沉降，自然之性也。升則為陽，降則為陰，陰陽異位，兩儀分焉。（四聖心源卷一，天人解）

古早人講，欲熟識人體進前，你愛先去捌人所生活的環境，所以清朝名醫黃元御佇伊所寫的冊「四聖心源」內底，一開始就講天地跟人的關係。誠趣味的是，古早人用陰陽的相對性，來描寫對天文地理的觀察，跟現代科學家對空間時間的論述，其實有誠相仝的體會。

什麼是空間？這敢若是一個無好回答的問題，因為空間對人來講，就是一種足直接的感覺，譬如講，佇厝裡，厝內底就是一個空間；逐工上班坐捷運，捷運車廂就是一個人足濟足擠的空間；舉頭看天星月娘，天頂宇宙就是一個無邊無際的空間。假使若欲予空間一個科學上定義，使會回想一下仔咱做囡仔時代，讀過的數學。大家都有學過空間幾何，咱若是佇紙面頂懸畫三條巡出來，橫的巡叫x，徛直的巡叫y，斜的巡叫z，這就表示是一個空間。所以，什麼是空間？簡單來講，就是會使表示你徛的彼點，講出彼點佇佗位，佇啥物所在，我們就會使感受到空間的存在。

時間咧？啥物是時間？時間比空間閣較毋知欲按怎來講伊的定義。看著日頭出，日頭落山，咱就知影一工過去矣。經歷過春天播田，夏天耕作，秋天收成，冬天覕寒，咱就知影一年閣過去矣。囡仔愈飼愈大漢，爸母慢慢仔愈變愈老，人就會有感嘆，時間一分一秒咧過，無欲等人嘛袂閣翻頭，按呢到底時間是啥物咧？咱是毋是會使跟空間仝款用畫的？予目睭看有的方式來實際感受伊的存在。時間敢若無法度按呢做，伊若像是超然獨立，絕對存在佇咱五官的感受之外。毋過對頂懸所講到的，人會感受到時間，無論是日出日落，四季的輪變，抑是生、老、病、死，人是因為看到四箍圍的變動，才感受到時間。反倒轉來講，咱若佇一個無任何變化的所在，就感覺袂到時間矣。所以，若欲講時間是啥物？其實時間就是變動、變化，因為這世界無時無刻無咧變化，我們才會感受到時間若像海湧潮水仝款直直過去，川流不息。

是按怎講這款現代的時空觀察，跟古早人的陰陽有誠相仝的體會呢？咱先來看空間。佇數學的空間幾何，咱欲表示一個點的位，會予伊一個坐標（X,Y,Z），這是相對彼三巡交叉的中心點原點（0,0,0）來講的。若是無原點的存在，我們就無法度予這三巡所畫出來的空間內底，凊彩一個點就會使寫出伊的坐標。所以，會當講出一個點是佇空間內底的佗位，這是一種相對的概念，若這個世界干焦有一點爾，攏無其他的點，按呢就無法度講出這個點是佇啥物所在，空間就不存在矣，一定愛有一個原點跟伊來比較，才會使講出彼點的坐標。

閣來看時間，咱講的時間就是變動、變化，有變動抑是無變動，嘛是比較出來矣，變化本身就是一種相對的概念。所以時間跟空間攏是相對的，假使講這個世界干焦有一個點爾，無其他的物件跟伊相比較，就毋知影這個點有變化無？按呢時間嘛不存在矣。若這個世界干焦有一個點，攏無其他跟這個點相對會使比較的物件，按呢咱就感受袂到空間，嘛毋知影時間，這毋就跟頂懸四聖心源天人解頭一句所講的「一氣混茫」干焦「一點」，干焦「一氣」仝款的狀況？

大霹靂宇宙論是目前予較多科學家接受的，咱這個宇宙是按怎生出來的講法，怹認為今馬的宇宙，上開始是一個無實體，密度足大，溫度足懸的點，號做「奇點」，大爆炸了後，佇足短的時間內底，直直膨大擴散湠開，變成今仔日的模樣。若宇宙是對一個奇點的大爆炸開始的，按呢咱一定會想欲問講，佇奇點進前閣是啥物？

2018年過身，捌予媒體讚聲講伊是佇Einstein愛因斯坦之後，上厲害的天文物理學家Stephen Hawking史提芬．霍金，過身前伊嘛是一個世界出名的漸凍症的病人。伊講這個問題袂．當．問，因為時間是佇奇點爆炸才有的，自然就不存在啥物叫做爆炸進前的說法，而且對奇點來講，咱目前所理解的物理定律全部攏無效，咱啥物攏毋知影。「陰陽未判，一氣混茫」，「未判」、「混茫」毋就是啥物攏毋知影的意思。

「氣含陰陽，則有清濁，清則浮升，濁則沉降，自然之性也。」若萬物的起初毋若干焦一氣爾，一氣兩分做陰陽兩儀之後，就敢若現代天文物理所講的，毋是干焦一個奇點的時陣，就有相對的關係，會使表示相對的位置，看出相對的變化。陽升為天，陰降為地，有天有地了後，就有上、下、前、後、左、右，東西南北四方的相對方位，空間就產生矣；有陰陽相對的移動變化，時間嘛產生矣。自一氣混茫到陰降陽升，古早人用陰陽這款的相對性，來推演怹對天地宇宙的觀察，是毋是跟現代科學家，用相對性來定義空間跟時間，有足相仝的體會咧？