تكلّمنا بالحلقة هذي عن مسيرة مصطفى العقاد، المخرج السوري اللي انشهر في عالم هوليوود، شلون دخل مجال الإخراج السينمائي، وبداياته الصعبة كعربي في المجال الفني في أمريكا، تكلّمنا عن صداقته الوثيقة مع محمد السنعوسي والأعمال اللي جمعتهم، بعدها ناقشنا فلم الرسالة، والأسرار والكواليس اللي سبقت ظهور الفلم، وكم الصعوبات اللي واجهها العقاد أثناء عمله، وفلم أسد الصحراء (عمر المختار) والنقلة اللي أحدثها.

ضيفنا بديوانية الكوب كان يوسف مجيم، سولفنا معاه عن بدايات ظهور أفلام الرعب، وشلون برزت هالفئة بمجال صناعة السينما، وشنو اللي ميزها عن غيرها وكان السبب في استمراريتها مقارنةً بفئات أخرى شبه اختفت عن الساحة. شاركنا تجاربنا مع أفلام الرعب قبل، وذكريات الطفولة وتأثير هالأفلام علينا، وشلون تغيرت الصناعة بشكل ملحوظ بأفلام الرعب الحديثة.

بكوبنا السينمائي هذي المرة رحنا لعالم السينما المصرية، برفقة ضيفنا الدائم المخرج البوليسي داوود شعيل، كلّمنا عن يوسف شاهين، أحد المخرجين أصحاب النمط المختلف في السينما المصرية تحديداً والعربية عموماً، كلّمنا عن أسباب تميزه وطرحه المختلف عن باقي المخرجين في الساحة المصرية، وشنو الأهداف اللي كان بيوصل لها من وراء هذا الطرح.

ضيفنا بالحلقة هذي كان عبدالعزيز العبيد، تكلّمنا معاه عن وكالات التسويق ونشأتهم، شلون بدوا بالترويج التقليدي ولين وين وصلوا بالخروج عن المألوف، وناقشنا أساليب التسويق واختلافها حسب الجمهور المستهدف، ودور عامل الخبرة في نجاح خطط الترويج من عدمه. تكلّمنا عن مفهوم الضجة الإعلامية، والأفكار اللي تحتاج جرأة في تطبيقها، وثقة من المُعلنين للوصول لشريحة أكبر، وذكرنا أمثلة لبعض الحملات الإعلانية اللي حققت أصداء واسعة.

كوبنا السينمائي كان برفقة المخرج داوود شعيل، تكلّمنا بشكل مُفصل عن ستيڤن سبيلبرغ، عن دخوله لعالم الإخراج وبداياته، وشنو الأسباب اللي خلته يتجه للمجال هذا، ومدى تأثير العايلة والبيئة المحيطة على قراره بدخول عالم الإخراج وطريقته الإخراجية. تكلّمنا عن مرحلة ستيڤن سبيلبرغ الهاوي والأفلام القصيرة، وبعدها صراعه الذاتي ومحاولاته لإيجاد نمطه المناسب، وصولاً إلى مرحلة التألق، الصعود إلى القمة، وفوزه بجائزة الأوسكار.

ضيفنا كان الناشط في مواقع التواصل الاجتماعي خليل حيات، تكلّمنا معاه عن نشأة مواقع التواصل الاجتماعي، شلون دخلت لمجتمعنا في البدايات، وشلون كان تقبل أفراد المجتمع لها وطُرق استخدامهم لهذه المواقع. ناقشنا تأثير هذه الثورة التقنية على حياتنا، وشلون بدت تتغير سلوكياتنا تدريجياً بسبب مواقع التواصل والمحتوى اللي نتابعه بشكل مستمر، وشلون هالتأثير كبير وجوهري لكن أغلبنا مو واعي له.

ضيفتنا بالحلقة هذي كانت الدكتورة منى بن علي، تكلّمنا معاها عن الفرق بين ال life coaching والطب النفسي، وشلون شهادة المدرب المعتمد صارت شي سهل وبسيط ولكنها تعطي انطباع للشخص أكبر من قدراته. تطرّقنا لمفاهيم مهمة لكل شخص، الوعي الذاتي، وشلون الإنسان يعرف شنو هدفه، وهل فعلاً مفهوم كره الذات مثل ما احنا نعرفه، وبعدها ناقشنا المشاكل الزوجية المنتشرة بمجتمعنا، واختلاف مفهوم الخيانة بين الجنسين، وأدوات التواصل بينهم.

ضيفنا كان المخرج زياد الحسيني، وحوار عن فلم ( How I Got There شيابني هني) اللي كان من إخراج وكتابة زياد. كلّمنا عن بداياته في المجال وشلون كل الشغل والأعمال السابقة كانت تمهيد لصناعة فلم شيابني هني على مستوى عالي مثل ما كان مخطط له، قال لنا عن تجاربه مع فرقة ميامي، وشركة النظائر للإنتاج الفني، والأعمال اللي اشتغل عليها محلياً وعالمياً لصقل موهبته عشان يقدر يقدم هذا المستوى الاستثنائي والجديد على مجال صناعة السينما الكويتية.

ضيفنا بالحلقة هذي مساعد خالد، تكلّمنا معاه عن مجال التمثيل والكتابة، شلون دش المجال وبداياته في مسرحيات الجامعة اللي كانت عامل مهم لدخوله المجال ومعرفته فيه بشكل أكبر. تكلّمنا عن سلسلة الأوابد والتجربة الفريدة من نوعها ذات الطابع المختلف، وشلون قدروا يقدمون شي يتسم بطابع الغرابة والخيال يتناسب مع المجتمع الكويتي، بعدها قال لنا عن تجربته بالتمثيل في أحد الأفلام من إنتاج شركة ديزني، وشلون كانت بحكم إنه كان الكويتي الوحيد بطاقم الفلم. وناقشنا أسباب وصول مسلسلاتنا للمستوى الحالي وتأثير سيطرة المحتوى التجاري.