最近跟丈人開講，講到阮爸身體欠安，感冒咳嗽，規身軀僐鬥鬥軟夠夠，倒咧眠床頂紲爬袂起來。彼工四跤柺仔無徙好，重心無穩，規个人跋落去塗跤，佳在我有佇邊仔咧看，七八十公斤的人軟跤，根本就捧袂牢，干焦會使予伊順我的手，慢慢的溜落去，佇塗跤稍倒一下，我才共扶起來眠床邊坐。

丈人聽我按呢講，伊就講阮丈姆彼工嘛是仝款，佇伊的眠床邊坐無好勢，溜落去塗跤坐，嘛是爬袂起來，佇遐叫人叫規晡，伊聽著聲才趕緊去共拉起來。丈人講佳在伊有佇厝內底，無伊若出去，阮大姨仔咧睏，一定是睏到聽袂著聲叫袂起床，阮丈姆仔就愛佇眠床邊坐到暗頭仔，聽候伊轉來，才會使爬起來矣。

丈人講話足旺聲，但若講到阮大姨仔，伊就隨變做輕聲細語，尤其是咧投予阮聽的時陣，足驚予阮大姨仔聽到，怹兩人就開始欲相駡矣。我知影跟阮丈人丈姆蹛做伙的是阮大姨仔，人若傷過親近，難免講話會較無客氣，咱毋是照顧序大的人，就盡量毋通對人的做法有意見。雖然丈人是咧投予阮聽，阮嘛是聽過就好，袂閣綴咧唸。大姨仔無結婚，伊若家己一個人蹛外口，跟阮仝款無跟序大人蹛做伙的時陣，阮丈姆爬袂起來咧咻人，嘛是干焦阮丈人聽會到爾，跟伊是毋是拄好佇房間咧睏，聽袂到聲叫袂起床，根本就無底代，咱袂使共這款發生意外的責任，攏擲予伊擔。

最近有一條社會新聞，一個嬰仔予一個有牌的保母虐待死，因為彼個嬰仔無父母通照顧，是社會局委託兒童福利聯盟基金會介紹保母來照顧的，基金會嘛有一個社工專門負責訪視紀錄，這個嬰仔佇保母遐過了按怎的報告。這個案件，除了保母去予人掠起來之外，負責的社工嘛予警察銬走，聽講是雖然有寫報告，但並無確實有去看嬰仔，才會造成這個悲劇。我臆這個社工手頭的案件，應該毋旦這個嬰仔爾，若這個虐待嬰仔的保母存範欲共騙，伊愛分予遐濟案件的心思，有可能就袂發覺到保母有問題。

其實，有牌的保母遐濟，變態有問題的是足少的，這個嬰仔跟社工會去拄到這個保母，就敢若阮丈姆溜落去塗跤坐的意外事件仝款，咱愛思考的，是如何改善制度，去避免這款保母的存在，毋是去怪案件濟薪水少的社工人員，就敢若阮是叫阮丈姆無通閣做仝款的代誌，抑是講來改善阮丈姆房間的設施，伊若是閣做仝款的代誌，發生意外的時陣，予伊有通扞抑是拉，就袂閣坐落去塗跤，毋是去怪阮大姨仔是按怎睏到予人叫袂起來。

雖然會去拄到這款有問題的保母的機會是足少的，但是經過新聞佇電視、網路頂四界放送了後，我看愛揣保母鬥𤆬囡仔的爸母，一定規頭殼帽咧燒，心肝頭足驚足煩惱毋知會去揣著這款保母無？其實，拄到這款歹保母的機會應該足少足少的，咱毋通對咱社會中，做保母這途的人失去信心。就敢若新聞定定咧報車禍，咱嘛袂因為按呢就毋敢駛車，路上遐濟車咧駛，人咧行，較濟攏是安全的，保母嘛仝款，較濟攏是對囡仔好的。