出家的師父表妹去斗六慈濟病院的安寧病房，實習臨終照護，拄著一個病人阿伯，跟阮母仔的名差一字爾。跟阿伯相借問了，就敲電話起來共怹六舅（阮阿爸）講，伊拄著阮母仔的表親啦。

電話講了，伊就寄一份資料起來予阮爸，原來是安寧醫療跟無欲急救的同意書。這是伊佇病院實習的感想，簽這同意書對咱足重要的，會使減少健保足濟的過度醫療、無效醫療，嘛會使予咱欲走進前免遐拖磨。

定定攏有聽人咧講，瑞典的老人福利做甲足好矣，毋旦老人平均年歲比台灣較長，欲過身進前倒咧眠床頂的時間嘛才兩禮拜爾，無像台灣愛倒七八年予人照顧。

嘛有人講這資料是毋對的，福利好的國家，對無健康老人照顧的時間，一定比咱台灣較長，看國際的平均年歲跟健康的平均年歲，兩個數字相減就知矣。咱毋知影這統計講的無健康，是毋是就是倒咧眠床頂愛人照顧的狀況，因為瑞典有足濟幫助老人的福利設施，是設計予老人會使家己照顧家己，自理家己的生活為主。

牽仔過年時陣嘛有跟怹對荷蘭轉來台灣的同學講到這個話題，怹同學講伊佇街仔路看到的荷蘭老人，較濟攏行動自如，無像台灣遐濟予人用輸椅捒出來行的。

咱每一個人攏希望，未來會使作一個健康快樂的老人，除了政府為咱準備的老人福利環境之外，上重要的應該是有一寡過時的醫病觀念，咱家己愛先來改過來，譬如講，愛踅病院的現象。親像福利遮好的瑞典，怹的國民一年嘛才看2.7擺的醫生爾，咱台灣人一年會使去看醫生13.2遍，真正毋知影多出來十外遍是咧看心適的，抑是咧看啥物？