Learn Human Rights بالعربى

الإعلان العالمي لحقوق الإنسان

المادة # 5

لا يجوز إخضاعُ أحد للتعذيب ولا للمعاملة أو العقوبة القاسية أو اللاإنسانية أو الحاطَّة بالكرامة.

التعذيب من الموضوعات اللى حواليها جدل كبير

يعنى مثلاً الامم المتحدة ربطت جريمة التعذيب بان اللى بيعذب يكون عايز يحصل على معلومات او اعترافات من اللى بيتعذب

.. بينما هناك حالات تعذيب و معاملة لا إنسانية و كمان حاطة بالكرامة بتحدث فى اماكن كتير حول العالم و مبيكنش الهدف منها الحصول على معلومات او اعترافات ولا حاجة و لكنها بتشكل جريمة تعذيب كاملة

عايزين نقول كمان ان التعذيب ليس من الجرائم التى تسقط بالتقادم

يعنى عاتفضل تطارد اللى عذب و مش بس كدة دة عاتطارد اللى اصدر الامر بالتعذيب طوال حياتهم و توصمهم بالعار بعد وفاتهم سواء كان هذا التعذيب ممنهج او غير ممنهج

هناك اشكال اخرى للتعذيب

زى لما زوج يحبس زوجتة او احد افراد اسرتة او حتى عاملة المنزل و يمنع عنهم الاكل او الشرب او الذهاب للحمام لمدة طويلة كشكل من اشكال العقاب دة بيعتبر تعذيب لانة شكل من اشكال المعاملة الا إنسانية

من الاخر كدة لو شخص رسمى او غير رسمى احتجز اى شخص فى مكان غير ملائم او غير ادمى و قام بأذائة جسدياً او نفسياً و عقباً باستخدام وسائل عنيفة او غير عنيفة و نتج عن الافعال دى الم اثناء الاحتجاز او بعدة سواء بهدف الحصول على معلومات او اعتراف او لاى اسباب اخرى احنا كدة امام جريمة تعذيب كاملة

المادة العلمية و التعليق الصوتى

ماجد سرور

خبير المناصرة فى مجال حقوق الانسان

[email protected]

الإعلان العالمي لحقوق الإنسان

المادة # 4

" لا يجوز استرقاقُ أحد أو استعبادُه، ويُحظر الرق والاتجار بالرقيق بجميع صورهما."

عاتسألنى هو لسا فى رقيق و عبيد لغاية دلوقتى

عاقولك اة طبعاً لكن باشكال و مسميات مختلفة و كمان بحالات و مواضع مختلفة

زى أية

زى شبكات الدعارة و شبكات خطف و  بيع الاطفال او استغلالهم فى النزاعات المسلحة فى العالم و اللى بتسمى بالاتجار بالبشر

وفى افعال تانية الناس بتماسها و هم مش واخدين بالهم انهم بيمارسوا شكل من اشكال الاستعباد او الاتجار بالبشر

زى اية

انك تستلف فلوس من حد و تفضل بقية حياتك انت و باقى افراد اسرتك تخدم هذا الشخص مقابل الدين اللى انت استلفتة لاى سبب لانة واخد عليك اوراق و تخاف يقدمها للشرطة او انة يطلب يجوز بنتك لابنة مقابل الدين

وزى انك تكون عايش او ساكن عند حد و معندكش مكان تانى تروحة و الحد دة يستغلك انت او حد من اسرتك فى خدمتة او تقديم اى نوع من الخدمات لة و لاحد من اسرتة او ان هو او حد من عيالة يطلب ممارسة الجنس مع حد من افراد اسرتك مقابل انكم مضطرين

كمان لما صاحبة البيت تفرض على زوجة حارس العقار انها يومياً تقوم بخدمات داخل منلها الشخصى لمجرد انهم من محافظ نائية و يخافوا تطردهم دة شكل من اشكال العبودية و الاتجار بالبشر

على فكرة كمان لما واحد يصور واحدة و يهددها بالصور او بفضح امرها دة شكل من اشكال العبودية و الاتجار بالبشر

و زى اية كمان

زى ان اب او ام تجوز بنتها القاصر و اللى عايشة معاها نظير حصول الام او الاب على مبلغ مالى او امتلاك ارض او عقار و النت خايفة ترفض

زى لما الاسرة تزوج ارملة الابن الاكبر لشقيقة الاصغر بدعوى تربية الصغار او انها متتجوزش حد غريب عن الاطفال

و طبعاً لو اب او ام باع حد من الاطفال الصغار بسبب عدم قدرتهم المادية دة شكل من اشكال العبودية و الاتجار بالبشر

من الاخر كدة اى شخص عايستغل اى شخص تانى من اجل انة يقوم بافعال او تصرفات او يقدم خدمات دون ارادتة او بأردتة لكنة مضطر تحت اى سب دة بيكون شكل من اشكال العبودية او الاتجار بالبشر

المادة العلمية و التعليق الصوتى

ماجد سرور

خبير المناصرة فى مجال حقوق الانسان

[email protected]

الإعلان العالمي لحقوق الإنسان

المادة # 3

لكلِّ فرد الحقُّ في الحياة والحرِّية وفي الأمان على شخصه.

تعتبر المادة الثالثة من الاعمدة المهمه للإعلان العالمي لحقوق الإنسان و مادة مؤسسة للعهد الدولى الخاص بالحقوق المدنية و السياسية

الحقيقة أن الحق فى الحياة لايقتصر فقط على الحماية من القتل او التعذيب او استخدام العنف سواء بين الافراد او من جانب السلطات الرسمية لاى دولة .

لان الامور دى و غيرها مكفولة بالمنع و الحماية من قبل اى دولة تجاة مواطنيها بل و اى فرد بيعيش داخل حدودها و الحماية بتأتى بالقوانين و التشريعات و الاتفاقيات الملتزمة بها الدول

لكن هناك عدد من الامور المهمة على كل دولة تتصرف و تأخد أجراءات فى عدد من الامور و اللى تحافظ بيها على الحق فى الحياة

زى العمل على تخفيض معدلات وفيات الاطفال بسبب سوء التغذية او الامراض او الاوبئة مش بس كدة لكن كمان تعمل على زيادة معدلات الاعمار المتوقعة للأفراد

مش بس كدة .. على اى دولة انها تشتغل على تحسين الحق فى الغذاء يعنى محدش يموت من الجوع .

و الحق فى الصحة يعنى محدش يموت بالاوبئة و الامراض المعدية

مش بس كدة يجب على اى دولة ان تعمل على حماية الحق فى الامن و السلام يعنى محدش يموت بسبب اعمال العنف او الارهاب او الصراعات القبلية او الطائفية او الصراعات المسلحة .

المادة العلمية و التعليق الصوتى

ماجد سرور

خبير المناصرة فى مجال حقوق الانسان

[email protected]

الإعلان العالمي لحقوق الإنسان

المادة 2.

لكلِّ إنسان حقُّ التمتُّع بجميع الحقوق والحرِّيات المذكورة في هذا الإعلان،

دونما تمييز من أيِّ نوع،

ولا سيما التمييز بسبب العنصر، أو اللون، أو الجنس، أو اللغة، أو الدِّين، أو الرأي سياسيًّا وغير سياسي،

أو الأصل الوطني أو الاجتماعي، أو الثروة، أو المولد، أو أيِّ وضع آخر.

وفضلاً عن ذلك لا يجوز التمييزُ علي أساس الوضع السياسي أو القانوني أو الدولي للبلد أو الإقليم الذي ينتمي إليه الشخص،

سواء أكان مستقلاًّ أو موضوعًا تحت الوصاية أو غير متمتِّع بالحكم الذاتي أم خاضعًا لأيِّ قيد آخر على سيادته.

زي اية المساواة و عدم التمييز ... ااقولك انا

زى مبدأ تكافؤ الفرص في العمل .. يعنى بغض النظر عن اى خلفية الا ان اى شخص زى التانى بالظبط فى المعاملة .

سواء  رجالة او ستات – اصحاء او معاقين – فقراء او اغنياء

الكل بيتساوا لما يقدموا او يتقبلوا او يترقوا فى اى عمل و كذلك بيتساوا  فى مواعيد وعدد ساعات العمل

وفى الاجور  و حتى لو اتفصلوا بيتساوا فى طريقة تعوضهم و كذلك تمثيلهم فى مجالس الادارات .

فى مجال الصحة يبقى  من حق الناس جميعاً الحصول على نفس مستوى الخدمة الطبية دون تمييز .

و فى مجال  التعليم من حق كل حد من سكان نفس المنطقة قبول ابنة او بنته فى  اى مدرسة طالما مستوفى الشروط .

وطبعاً مننساش ان النساء لهم وضع خاص بسبب تاخر حصولهم على حقوقهمم مدد طويلة يعنى تيسير وصلهم للمناصب القيادية او تيسير  تمثلهم فى البرلمانات من الامور اللى تعتبر تمييز ايجابى .

المادة العلمية و التعليق الصوتى

ماجد سرور

خبير المناصرة فى مجال حقوق الانسان

[email protected]

المادة الاولى

الإعلان العالمي لحقوق الإنسان

يولد جميع الناس أحرارا ومتساوين في الكرامة والحقوق. و قد وهبوا العقل والوجدان وعليهم أن يعاملوا بعضهم بعضاً بروح الإخاء.

من النظرة الاولى ترى أن كلمة الكرامة تسبق كلمة الحقوق وذلك لأن الكرامة هى أساس كافة حقوق الأنسان

قبيل أعتماد الإعلان العالمي لحقوق الإنسان سنة 1948 جاء مصطلح الكرامة الانسانية فى دساتير 5 بلدان فقط

أما الان فهى معترف بها كحق أساسى فى أكثر من 160 من دساتير العالم من بين 193 دولة عضوة فى الامم المتحدة

على فكرة الكرامة الانسانية هى انك تحترم الاخرين فى كلامهم و تصرفاتهم و افعالهم فقط لانهم بنى ادمين ذيهم ذيك

طيب زى أية المساس بالكرامة الانسانية

زى ان تلميذ يشتم تلميذ تانى أثناء الحصة – لانها تعتير شكل من أشكال الاهانة

او ان تلميذة تنشر على الفيس بوك اشاعه كذب عن تلميذة ثانية لان دة شكل من اشكال الاضرار بالسمعة

او ان مدرس يتجاهل ان التلاميذ بيطلقوا القاب و مسميات غير لائقة على بعض لانة كدة تسبب فى عدم منع أهانة

عندك كمان لو نشر أن المدرس دة مطلق و عندة مشاكل عائلية . لانة كدة تدخل فى خصوصيتة

ولو ناظر نفس المدرسة منع المدرسين من أنتقاد ظروف العمل هو كدة أنتهك حريتهم فى التعبير

وعلى مستوى تانى فى امور تمس الكرامة الانسانية فى أماكن ولا تعتبر انها تمسها فى أماكن أخرى

زى مثلاً تخصيص المقاعد الخلفية فى الاتوبيسات العامة للنساء . لو فى دولة اوربية يعتبر انتهاك لحقوق المرأة لكن لو فى دولة متشددة دينياً لن يعتبر انتهاك

وفى كل الاحوال لو أتفق كل ركاب نفس الاتوبيس على شىء و تراضوا علة و التزموا بية لن يكون هناك أى مشاكل .

المادة العلمية و التعليق الصوتى

ماجد سرور

خبير المناصرة فى مجال حقوق الانسان

[email protected]

الاعلان العالمي لحقوق الانسان

الشرعه الدوليه

تاني مش انتم اتكلمتوا عليه قبل كده هو ايه واسطه؟

بص هو مش واسطه لكن تقدر تقول راس او المايسترو بتاع حقوق الانسان

ازاي يعني ؟

بص يا سيدي الاعلان العالمي لحقوق الانسان زي ما قلنا انهبيتكون من  30 ماده لكن فيه عمودين مهمين جوا هذا الاعلان اول عامود هو الماده 3 واللي بتقول ( ان لكل فرد الحق في الحياه والحريه والامان على شخصه) والماده دي تعتبر تقديم او تمهيد للمواد من 4 الى 21 . على فكره المواد دي تعتبر الاساس في العهد الدولي الخاص بالحقوق المدنيه والسياسه والي دخل حيز التنفيذ مارس والي بيعتبر واحده من قدمين اللي واقف عليهم الاعلان العالمي في حمايه حقوق الانسان.

طيب وايه هي القدم الثانيه

شوف يا سيدي العمود التاني في مواد الاعلان العالمي هي الماده 22 واللي بتعتبر هي كمان تقديم للمواد 23-27 من الاعلان ومجموعه المواد دي هي كمان تعتبر الاساس في العهد الدولي الخاص بالحقوق الاقتصاديه والاجتماعيه والثقافيه والي بتعتير القدم الثانيه للاعلان العالمي والي دخل حيز التنفيذ  يناير 1976 بعد 10 سنوات تقريبا من اقراره.

طيب مش تقولنا العهد الدولي الخاص بالحقوق المدنيه والسياسه بيتكلم عن ايه اقول لك العهد ده بيتكلم عن مجموعه حقوق زي الحق في الحياه, حق المحتجزين في المعامله الانسانيه وحريه الرأي والتعبيير والحق في المساواه امام الفانون.

امال العهد الدولي الخاص بالحقوق الاقتصاديه والاجتماعيه والثقافيه بيتكلم عن ايه؟  العهد ده بيتكلم عن الحق في العمل والصحه والتعليم والحق في التنميه

طيب انت عايز تقول ايه في الاخر

عايز اقول ان الاعلان العالمي لحقوق الانسان بالاضافه الى العهد الدولي الخاص يالحقوق المدنيه والسياسيه والعهد الدولي الخاص بالحقوق الاقتصاديه والاجتماعيه والثقافيه والبروتوكولات الاختياريه بيشكلوا منظومه حقوق الانسان او ما يسمى بالشرعه الدوليه

المادة العلمية و التعليق

ماجد سرور

خبير المناصرة فى مجال حقوق الانسان

[email protected]

الاعلان العالمي لحقوق الانسان

الحقيقة ان العباره دي من العبارات الغامضه عند البعض والمقلقه عند البعض الاخر واللي بيستخدمها البعض في اي حاجه غير معناها الحقيقي

لكن ما هي حقوق الانسان

الحقيقية ان المفهوم ده ظهر للنور عقب الحرب العالميه الثانيه وتحديدا سنه1948 ومن خلال الاعلان العالمي لحقوق الانسان

والي صاغته لجنه مكونه من تسع افراد منهم اللبناني تشارلز مالك وبرئاسه زوجه الرئيس الامريكي الاسبق روزفلت .

الاعلان العالمي لحقوق الانسان والي بيتكون من 30 ماده تم ترجمته الى 500 لغه ووافق عليه وقتها 50 دوله ولم تعترض اي دوله اخرى  الا 8 دول امتنعوا عن التصويت ولكنهم لم يرفضوا.

يعني العالم من خلال الامم المتحده وافق في هذا التاريخ ان يحاول ان يحمي حقوق الانسان خصوصا بعد ما تعرض له الافراد اثناء الحرب العالميه الثانيه

طيب تقصد ايه بحقوق الانسان. الحقيقه حقوق الانسان قامت من اجل حاجه سهله جدا وصعيه جدا في نفس الوقت, الحاجه دي هي حمايه الكرامه الانسانيه, والكرامه الانسانيه لها تعريفات كثيره لكن ابسطها هي حمايه الانسان من التعرض للاذلال خلال ان يتم توفير المأكل والمشرب والمسكن والتعليم والعمل وعدد كبير اخر من الامور التي بسبب الاعلان العالمي لحقوق الانسان سميت بالحقوق , زي الحق في الغذاء والحق في التعليم والحق في التنقل والحق في الحياه الى اخره من هذه الحقوق

المادة العلمية و التعليق

ماجد سرور

خبير المناصرة فى مجال حقوق الانسان

[email protected]