2021的牛年開始，我就用台語來寫阮兜的春聯，經過牛、虎、兔三個生肖了，今年2024是兔仔年欲來迎接咱的龍年，春聯又閣輪轉來愛用阮某的名跟龍字來鬥矣。古早人的觀念來底，龍是足好的生肖，譬如講，皇帝的一切攏跟龍有關係，毋管是穿的用的，攏有龍的形體佇頂懸。若皇帝的身體無爽快，人攏講是「龍體欠安」。所以，我會記持以早做囡仔的時陣，嘛是台灣經濟起飛的年代，龍年出世的紅嬰仔就是比其他生肖年出世的較濟。佇龍年出世的囡仔，爸母向望的，就是這個囡仔會使跟古早的皇帝仝款，一世人平安順序，有享受榮華富貴的皇帝命。

欲用阮某的名來鬥春聯進前，我想欲先來雜唸一下仔最近發生的代誌。有一工，高雄的朋友line來問講，今年的尾牙辦佇拜五暗，看我有閒通落去參加無？會使閣𤆬一個伴鬥陣去。彼工拄好是阮某的生日隔工，我想講食了應該嘛暗時九點偌矣，隋坐暗車轉來桃園有淡薄仔忝，無若阮翁仔某兩人鬥陣落去，就順紲過一暗，隔轉工拜六佇高雄𨑨迌一工才轉來就好。我隋共阮某問講遐兩工伊敢有代誌？無就鬥陣去高雄食尾牙。結果伊佇彼躊躇半工，不知咧想啥？人對方是趕緊欲等我的回覆通確定人數！無奈何，只好回覆一個人參加，順紲共高鐵票先訂訂予好，無到時陣才買，驚會佇歇睏日前傷濟人會買無坐票！

阮翁仔某猶未結婚進前，做男女朋友咧交往，總有兩人出去𨑨迌過暝的時陣，結婚了隋有囡仔，會過暝的遊覽攏是規家伙仔鬥陣出門，若干焦兩個人的活動，一定是一工來回，無咧過暝。今馬查某囝大漢矣，有伊家己的活動，我心裡想講，就趁今馬阮猶閣行會振動，會當好好享受兩人世界的時間。阮兩個人的個性，攏毋是彼款會定定揣人去活動的𨑨迌跤，若阮某伊彼些姐妹仔伴有人招，我攏是鼓勵伊有閒就去。舊年伊就跟無仝時陣熟識的姐妹仔伴，去澎湖、高雄、屏東，三工四工五工𨑨迌幾偌逝矣。

姐妹仔伴招𨑨迌就答應緊緊，按呢做伙生活已經二三十冬的翁婿招𨑨迌，應該免用跤頭趺想就隋會答應才對吧！結果明明就無代誌，猶閣佇彼咧想規晡，我是欲趕緊共人回覆，予人較好做代誌，佇邊仔聽候到紲規个起毛䆀起來！阿就毋是今仔咧交往的少年男女朋友，愛閣問過怹阿爸阿母，跟我這個查晡囡仔出去過暝敢會使？抑是猶毋知欲揣啥物理由，予怹爸母會當允准伊跟我這個查晡囡仔出去𨑨迌無？一件足簡單的代誌，哪會遐歹做決定？

起毛當咧䆀，人就失去反省能力，我攏無想到，是毋是家己佗位做了無好，才會予人躊躇「跟你出去敢好𨑨迌？」人若好鬥陣，彼字「好」字就袂予人遐歹講出嘴。反省了，心情嘛較平靜矣，後來看到伊的姐妹仔伴，約伊仝款佇尾牙彼工欲請伊食中晝，伊隋佇怹的 line群組內底講好的時陣，我就無啥物袂爽的感覺矣。誰叫咱這張老面皮，普通時嘛毋知愛共保養セット，連續看三四十冬一定會懶的嘛！

食尾牙彼工早起，牽仔差不多八點偌出門，怹先去台北看茶葉博覽會，順紲買茶，中晝才坐捷運去板橋食飯。我是下晡四點半的高鐵，本來無其他的安排。牽仔出門了，一個小學同窗敲line予我，講欲揣我食中晝。我較捷有聯絡的小學同窗，若是查某的，一定是聯絡阮某較濟，誠少直接揣我。伊講是蹛北京的同學轉來投票，舊年伊去北京𨑨迌的時陣，人特別請假陪伊，今馬換伊請倒轉來。我幫怹倆人佇wechat頂懸會使相通，嘛算有功勞，順紲請我。

叫我去食飯是小學同學臨時想到的，怹欲共原本訂位的餐廳改人數，佇網路頂懸紲無通改。我驚到時陣人去到位，紲無通坐愛徛咧食，就建議同窗換所在，徒去跟阮某怹仝間餐廳食好囉，坐捷運就會到，交通對怹來講嘛誠利便。雖然招我食飯的同窗攏是查某的，怹跟阮某嘛攏比我較熟，但跟阮某的姐妹仔伴就是無熟識，我共怹講「咱食咱的，怹食怹的，無欲坐做伙，按呢就袂礙虐。」

我會想講共兩爿的人安排去仝間餐廳，主要是兩爿的人攏共阮翁仔某足熟的，但這遍食飯干焦一爿揣一個人去爾，我是食飯飽就愛轉來桃園坐高鐵，阮某伊若食飯飽無閣紲攤，嘛會使綴我的車轉來，免閣家已坐公車。當然，招無通鬥陣去吃尾牙的きもち袂爽，嘛予我有想欲趁這遍食飯的時陣，跟阮某拼場一下，證明怹翁的查某人緣猶誠好咧，無那會攏查某的同學跟我食飯。

雜唸煞矣，會使轉來鬥龍年的春聯矣。毋知是不是寫幾偌冬，寫了有慣勢，這遍用阮牽仔的名鬥龍字，誠緊就想有。過咱的年進前，家家戶戶除了攢年貨大摒掃之外，嘛攏會去銀行換新錢，按呢硩年的紅包才有新錢通包。阮某本來嘛攏是過年前才會去換，但有一年毋知是毋是傷晚去紲換無，後來伊就隨時提到新錢就先收起來囥，無欲共開掉，囥到過年就有新錢通好硩年，免閣去銀行換錢矣。

今馬硩年的紅包無一定是包咱台灣的錢，因為有誠濟蹛佇國外的台灣人，會趁這個年節轉來台灣過年。若有親情過年了欲攜去外國開的，包美金就應該誠好用。美金的美字，就是牽仔的名其中的一字。所以頂聯是：

美金台票換新錢

龍、鳳這款神話傳說中的吉祥動物，佇咱過年時一定攏看會到怹的形影，譬如講挵龍挵獅的表演，抑是穿的用的，不管是用印的畫的抑是繡的刺的，攏會看到龍鳳的圖面，代表好吉兆，歡喜慶祝的氣氛。若是佇古早，就是會曉針織刺繡的查某人，展現伊好手藝的時陣。按呢下聯會使寫：

繡龍刺鳳過好年

落尾，用台語的「攏」字，替換做中語的「龍」字，祝賀逐家：

龍誠勇健

龍趁大錢

龍食百二