最近阮牽手足興咧做影片，ui日本轉來了後，伊就共伊手機仔內底翕的相片、影片濫做伙，用ipad內底免錢的音樂做背影，做三四齣這遍去日本𨑨迌的影片出來，貼起哩網路頂予親情朋友欣賞。

伊較早毋捌學過做影片這款軟體，算是第一擺家己學ipad內底提供的影片編輯功能。較早這款代誌攏是我跟阮查某囝用電腦咧做，伊看怹同學攏家己來，伊嘛想欲試看覓。

我共講莫閣用電腦的軟體編矣，怹同學攏是用Apple的產品，無論是手機仔抑是平板，所以我共建議，伊就直接用厝裡的ipad內底附的軟體做就會使矣，聽講Apple的軟體誠巧，用的人真緊就學會曉。

編輯影片的時陣，伊愛一遍閣一遍放出來看，看這段編了按怎？若無佮意就愛閣調整重編，編煞伊感覺兩蕊目睭強欲挩窗。我聽伊按呢講，叫是伊可能誠緊就會感覺懶矣，至少愛歇睏一段時間，這層仔伊應該袂閣想欲做影片才對。

想袂到的是，伊竟然問我進前去日本四國，佮去奧地利捷克𨑨迌的相片囥佇佗位？伊去雲端的硬碟內底揣無。自從Google共免錢閣無限制空間的大學校友雲端硬碟取消了，我就干焦用伊免錢的空間爾，較早囥佇頂懸的相片影片，攏收轉來囥家己厝裡，會使接佇電腦外口的行動硬碟內底矣。

伊講做這款影片，會使共這遍旅遊行過的所在，參加的活動，做一個整理記錄，以後放出來看，就敢若閣去𨑨迌一遍仝款，對咱的記持真有幫助。所以這遍日本東北的影片做煞，伊閣繼續做進前去日本四國佮去奧地利捷克𨑨迌的影片，差不多有十偌齣矣。

阮某講，伊有感覺到進前去𨑨迌翕的影片，攏比伊這遍翕的較長。我共解釋講，這是足自然的演變。較早攏我咧翕較濟，彼當陣會想講開遐濟錢出國，無共看過行過食過耍過的物件攏共記錄起來，毋就足拍損矣。結果轉來了，共相片徙去囥咧行動硬碟內底，就毋捌閣提出來看。漸漸就愈翕愈少，愈錄愈短。後來的感覺是有翕就好，有錄就好，免翕傷濟錄傷長，因為轉來嘛袂閣提出來看，顛倒是應該把握逐遍出去𨑨迌的時機，拍開咱家己身上的五感，去感受當下美麗的風景，好聽的聲音，迷人的氣味，當地的食材，佮咱規身軀佇彼時陣會使感觸到的任何物件。按呢的改變，會共剾洗的歹聽話是講阮是愈老愈貧惰，但若修養較好的朋友，一定感受到阮是愈老愈有智慧才對。

# https://is.gd/xlQkPV