ليه عينيكي؟

ليه عينيكي بتحلى أكتر

لما عنِّي بتبعدي

ليه فـ قُربك منِّي باقتل

كل حلم بيبتدي

ليه شفايفِك وانتي جنبي

بالدموع متلونين

هوَّ ذنبِك ولاّ ذنبي

نبقى دايماً مجروحين

ميت سؤال شايفُه فـ عينيكي

تبقي جنبي ومش لاقيكي

لو خلاص الخوف ماليكي

عرَّفيني وماتداريش

لو خلاص م الخوف تعبتي

ودَّعيني يا حبيبتي

مش هـ أقولك ليه فارقتي

مش هـ ألومك ماتخافيش

غصب عنِّك بتسيبيني

برضُه أحسن ماتخونيني

واللي كان بينِك وبيني

ويَّا غيري هـ تلاقيه

دوَّري على حلم تاني

تمحي بيه الأولاني

بكره طيفِك لو نداني

هـ ابتسم واعمل ناسيه

------------------------------

كلمات والحان : أنطونيوس نبيل

توزيع : محمد يسري