صوت صابرين شواهنة وأحمد قطليش

شعر أحمد قطليش

من كتر ما دبل الحكي ووطحلب نمي ع شفاه.

بيطلع ع بالي إلمحك تا تطلع الكلمة ورا الكلمة بحبق انخلق من طلعتك.

وييجي ع بالي ضيعك . ليصير هالطحلب شجر ويظللك لما عبالك تتكي.

كل ما بضيّع طلعتك بفرش زغب بالعتم وانطر تا تجي..

شو هالعتِّم..

طلي تيضحك هالعتم بنجوم.

وعدّ الشغف تا نام!

نجمة ورا نجمة تلملم ضحكتك

ما بنام!

لولا تجي!... لولا ترجع الضمّة

اقطف غمامة تستّر غرقتي بشعرك.

تستر ربكتي كل ما لمحت على عنقك غفي...

وشم الحكي منك..

وارجع ضيّعك.

بالغيب؛ انتِ

ما اذكرك لحظة ورا لحظة.

لكن إذا ما بذكرك لحظة

بيطلع عبالي نبيد

وكنكن عليكي وعتقك فيي

يمكن شي مرّة تغرقي فيي

ونتوه من قارب خشب تحنن عليه الموج.

عالسكت ... كل ما إجي تا قبلك تتمرجح الموجة!

ما ألأمه هالبحر!

كيف الحكي رح ينختم..

ما بينختم..

ما بكتفي... كل ما تروحي وتختفي..

ما بتختفي

______

غافي الحكي بيناتنا وصاحي الغياب

لو شي طريق يضيعك تانلتقي

ما بنلتقي الا بضياع

يضوي الرصيف بخطوتي تا ينولد ظلك

ويمتد لعيوني

وشو تاهت عيوني انا تتجدلك

شو ضيعك قلي

أشرد انا بالليل والنجمة

شو باردة النجمة إذا انتا نمت

شو دافية النجمة إذا مرئت عليها نظرتك وبمية عيونك ضوت وتعمدت

شو غربك قلي

وتجويف صدرك ما امتلى من لم ترك راسي

من لم دبل شعري براسي وجف ...

شو غربا ايدك

شو غربك قلي

وكلما يجي طيفك تا يروح من روحي

ترجع على بابي حكاية الدقة.

تجي وتدق تقلي انا روحك

تقلي اشتقتلي

وارجع انا لراس السطر

شو رجعك قلي