【詩名】：袂使放手

【作者】：韓滿

【詩文】：

騎跤踏車

人 兩輪

阮 四輪

人 兩隻手

阮 四隻手

阿爸阿爸

頭前有石頭仔 誠歹 行

你袂使放手

來去學校讀冊

人 一个人

阮 兩个人

人 一雙跤

阮 兩雙跤

阿母阿母

老師是鬼 會掠 人

你袂使放手

踅夜市

人 一手牽一人

阮 兩手牽兩人

人 踅夜市唱情歌

阮 踅夜市

走揣 較早的記持

阿爸阿母

恁 會走拍毋見

阮袂使放手

來去公園散步

人 一人坐一條

阮 兩人坐一條

閣一手牽一手

焦脯 的手一直勼

閣強欲偷走

阿爸阿爸

大路誠危險咱愛行烏白馬遐

阮袂使放手

蹛 套房

人 蹛別莊

阮 蹛套房

門床頂有

阿母的消瘦落肉

椅頭仔頂有

阮的毋甘

阮 兩手牽一手

阿母阿母

汝若放手

是欲叫阮去佗

閣牽汝的手

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。