【詩名】：綿綿的台灣情愛-賀葉俊麟老先生七十大壽

【作者】：黃勁連

【詩文】：

落雨的暗暝

異鄉的港邊

阮時常唱你的歌詩

你的歌你的詩

解消阮滿腹的稀微

阮的細漢時

小小的年紀

雖然毋捌你

但是月光閃爍的暗暝

若唱你的「淡水暮色」

若唱你的「舊情綿綿」

會感覺趣味

感覺人生的歡喜

阮漸漸大漢

出外心悶的時

看著異鄉的船隻

來來去去 阮也是唱

你的歌詩 「放浪人生」

「再會夜都市」

你的歌你的詩

陪伴阮流浪的日子

如今阮已經大漢

阮已經捌代誌

若唱著「悲情的城市」

猶原不覺珠淚滴

阮知影你寫規千首的歌詩

攏是優美的台語詩

無輸日本的西條八十

阮知影這層代誌

伊代表的意義

親像春蠶吐絲

一絲一絲一絲一絲

阮欲追隨你的跤步

寫台灣味的台語歌詩

寫出台灣人的悲情

寫出台灣人的哀悲

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。