မင်းထွက်သွားတုန်းက

အာဏာသိမ်းပြီးစ

ညနေ နေဝင်ရီတရောပေါ့

စစ်တပ်အိမ်ကိုလာဝိုင်းတယ်

မင်းအမေ ကြောက်လိုက်တာ

ကြက်သီးမွေးညှင်းထ

အသားတွေဆတ်ဆတ်တုန်ပေါ့

အိမ်သားတွေလည်း

ချောင်မှာဝပ်လို့ ။

မင်းထွက်သွားတုန်းက

မင်းညီကို မင်းနဲ့မှားပြီး

ရဲတွေလာဖမ်းသွားတယ်

နောက်ကျမှ တစုံတယောက်က

သူဟာ မင်းမဟုတ်ဘူးဝင်ပြောမှ

သူ့ကို ပြန်လွှတ်ပေးလိုက်တယ် ။

မင်းထွက်သွားတုန်းက

မင်းညီမ

ဌာနဆိုင်ရာ အလုပ်ကောင်းကောင်း

တခုရဖို့ ကြုံတယ်

ဒါပေမဲ့

နောက်ကြောင်း ရာဇဝင်လိုက်တော့

( သူတို့အလို )

မင်းက ဆန့်ကျင်ရေးသမားဖြစ်နေတာနဲ့

မင်းညီမ ခန့်စာနဲ့လွဲသွားတယ် ။

မင်းထွက်သွားပြီး

နောက်နှစ်တွေ

သူတို့ ငါ့ဆီ ခဏခဏလာတယ်

မင်းအကြောင်းလာစုံစမ်းတယ်

မင်းသတင်းတွေ လာလာမေးတယ်

နောက်ဆုံး

မင်းနဲ့အခင်ဆုံး သူငယ်ချင်း ဘယ်သူလဲ

မင်း ရည်းစား ဘယ်သူလဲ

ဒါတွေကအစ

ငါ့ကို လာလာ မေးတယ် ။

တရက် ...

ငါလည်း စိတ်မရှည်တော့တာနဲ့

ဆရာတို့ရယ်

ဆရာတို့က ထောက်လှမ်းရေးတွေပဲ

သူဘယ်ရောက်နေမှန်း

ဆရာတို့တောင်မသိတာ

ကျနော် ဘယ်လိုသိနိုင်မှာလဲ

ဆရာတို့သိရင် လည်း

ကျနော့် ပြောကြ ပေါ့

ကျနော်လည်း

ကျနော့်သား ဘယ်ရောက်နေတယ်

သိချင်တာပေါ့လို့

ဒီတည်းက...

သူတို့ ငါ့ဆီ မလာတော့ဘူး

မင်းသတင်းလည်း မကြားရတော့ဘူး။ ။