厝邊阿姨跟阮母仔差不多年歲，體格保持了袂歹，定定會佇社區內底走動，無論大人囡仔，攏叫伊momo桑。我臆伊應該無染頭毛，規頭殼白蒼蒼，頭毛白甲足齊勻的，一支黑頭毛就看無。逐改佇社區拄到，看伊的穿插一定攏有梳妝打扮過，我臆伊應該若有欲出門就會妝娗一下，無論食到幾歲，無論欲去偌遠，無論是佇厝裡附近抑是去重要的場所，伊一定會維持伊上優雅的儀態來予人看到。

我若上班時間出門，坐電梯落樓，三不五時會拄到momo桑怹查某囝抑是怹囝婿，嘛拄好佇仝一個時間出門，看起來伊是跟怹查某囝囝婿蹛做伙。最近佇社區附近，捷捷有看到另外一個生份面的查某人，跟momo桑手牽手佇路咧行。彼工欲去讀冊會，拄好佇電梯內拄到momo桑ui二樓入內，我就共問講「是毋是有親戚來恁兜蹛？」伊講遐是怹大查某囝啦！今仔ui中興病院退落來爾。大查某囝誠友孝誠有心，今馬較有閒，會定定來陪伊。

本來我叫是電梯坐到一樓出來了，momo桑就袂閣講落去，但我看momo桑敢若無想欲停的感覺。出電梯了我先看手機仔幾點，去讀冊會的時間猶誠冗咧，就無趕緊去騎ubike，直接跟momo桑徛佇阮彼棟的樓跤講一下。

momo桑繼續講伊第二個查某囝嘛佇中興病院，猶未退咧，這兩個查某囝攏是怹先生𤆬入去病院的。怹先生已經過身矣，較早是佇中興病院做醫生，家己嘛有佇林森北路開診所。怹先生本來是準備欲接病院的院長，伊的一寡同事學生知影了，就招伊去吃飯啉酒，提前共祝賀慶祝。

彼工怹先生可能酒啉袂少，怹的徛家就佇診所的樓頂隔壁，兩爿是有拍通的。彼暗怹先生無爬起來樓頂睏，直接佇一樓診所，怹的診所內底嘛有一頂眠床通睏。毋知是毋是怹先生睏到半暝仔欲起來便所，有可能燒酒醉頭殼暈，跤步袂在去跋落去，頭殼閣去槓到桌仔角紲暈倒。momo桑聽到聲，趕緊叫人來救，先送上近的馬階，彼時陣馬偕無腦科的醫生，就想講共怹先生轉來中興病院，有較濟醫生會使參詳，經過無偌久了，怹先生就過身矣。

干焦聽momo桑講，我嘛愛共回應一下，就共問講「兩個查某囝佇病院做醫生護士，前一站仔的疫情期間毋就足辛苦些？」「嗯呀，攏無閒工去便所，而且穿防護衫閣悶閣熱，出去一逝就愛規軀換掉。」我閣共問講「大的二的攏佇病院，今馬跟妳蹛做伙佇銀行上班的毋就排第三個？」「這個是上細漢个，我生四個攏查某个，第三個咧做旅行社，伊就較無閒，愛走來走去。怹頭家蹛佇國外，台灣的工課就攏放予伊咧扞......」我驚momo桑若閣講落去，會親像較早警察咧查戶口仝款，規家伙仔攏講予我熟識，我就緊換話題共問講「momo桑妳遮早是欲去佗位？」「顧媽媽揣我啦！喔！你趕程時間喔！未赴矣喔！緊去緊去！」我就緊去騎ubike矣。

跟序大人開講就是遮趣味，莫怪人講老人囡仔老人囡仔，人食老了返倒轉變跟囡仔仝款天真可愛。我毋知影momo桑遮愛開講，以早拄到攏干焦會頕頭相借問爾，伊予阮翁仔某的感覺就是一個足笑面神，穿插足有家己的風格，儀態優雅大方的阿姨，逐改阮某拄到伊了後，一定會共我講，伊若食老嘛欲像momo桑仝款，出門攏愛先セット過才會使。