لو كنتْ خطوة فـ الخريف.. تحت المطر مالهاش أثر

لو اتحاوطتْ بليل مخيف.. وفجأة على روحي انتصر

لو كان معاكم ألف سيف.. وسيفي مِن خبطة انكسر

مش هـ أخاف

مهما مِن أهوال عذابكم قلبي شاف

لو مافيش ولا شيء فاضللي

لو هـ أنام على لحم ضلِّي

لو فشلتْ أطلع فـ حلمي بلُقمة حاف

مش هـ أخاف

شَمشِموا زيّ التعالب

وارشقوني بالمخالب

مش هـ أعيش مذلول فـ قالب

مش هـ أموت

اللي ماشي واللي راكب

الجبابرة والعناكب

لو داسوني فـ المواكب

مش هـ أموت

لو داستني كمان سنيني.. عشان تفوت

مش هـ أموت

لو كنتْ فار فـ المصيدة.. تايه ومش لاقي الطريق

لو كنتْ نجمة فـ الفضا.. مرسومة بالنزف البطيء

لو كنتْ أضعف م الصدى.. أو بيت مهدَّد بالحريق

مش هـ أخاف

مهما من أهوال عذابكم قلبي شاف

مش هـ أخاف

حتى لو شُفتْ فـ عينيكم موت "رِهَاف"

صمتي أطهر مِن رعودكم

مش هـ أكون صرخة فـ حشودكم

صوتي مايغطِّيش مجازر بالهِتاف

مش هـ أخاف

شَمشِموا زيّ التعالب

واهزموني بالمخالب

وحدُه فيَّا الصِّدق غالب

مش هـ أموت

عن جنوني مهما قالوا

لو طاردني الكون بحالُه

لو خانوني أو نفوني

مش هـ أموت

لو ما بين النور وبيني.. ميت تابوت

مش هـ أموت

مش هـ أموت مهما كان

مهما تتفتَّح جِراح.. مهما تتقفِّل بيبان

مش هـ أموت مهما كان

مهما يكرهني البِراح.. مهما تندهني الغِيلان

مش هـ أموت مهما كان

مش هـ أموت

لإنِّي ميت مِن زمان

-------------------

كلمات وألحان: أنطونيوس نبيل

توزيع: جون إسطفانوس

جيتار: أصلان

بيركشن: ضياء بدر

كمان اليكتريك: محمد علي

ميكس وماستر: ميشيل عبد الملك

رسوم: محمد السعدني