في الحلقة العاشرة من بودكاست انا البطل .. بنناقش فكرة الحصان الاسود لأنه زي ما اتعودنا .. البودكاست بتاعنا مش بيناقش قصص الابطال بشكلهم التقليدي اللي بيكسبوا كاس العالم .. لا فيه ابطال تانيين حلمهم بس يوصلوا كاس العالم .. و فيه ابطال هدفهم دور ال16 .. واخد بالك انت؟! .. المهم ان الحصان الاسود دة هو الفريق اللي بيقدر يحقق مفاجأة و يحرج الابطال و الفرق اللي عندها الفلوس و الموارد اللي تخليها تكسب كاس العالم!

بنتناقش بقي انا و اصدقائي كريم عبدالنبي و هادي الجندي في معايير تحديد الحصان الاسود دة! .. فيخلينا نسأل السؤال المهم .. تفتكر مين الحصان الاسود في قطر 2022 اللي هيقدر يقول أنا البطل!؟

https://www.instagram.com/halawelah/

و هرد عليك بنفسي لو بعتت لي في اي وقت غير وقت الماتشات

#قطر #كاس_العالم #كأس_العالم #الحصان_الاسود #بودكاست #بودكاست_عربي #الافتتاح 

الحلقة دي سريعا كدة سجلتها في البلكونة عندي عشان بصراحة ماقدرتش ماتكلمش علي فوز كريم بنزيما بالكورة الدهبية .. و اللي يعرفني كويس يعرف قد ايه انا كنت مش بطيق اشوفه في التلفزيون و نفسي انه يمشي من ريال مدريد .. بس اللي حاصل دلوقتي مختلف .. و بقيت مش قادر اشوف ريال مدريد من غيره!

ممكن يكون لكل واحد فينا مفهوم للفشل .. بس كلنا هنتفق ان مفيش طريقة نقدر نحول بيها الفشل لنجاح الا بالإعتراف بالفشل و بعدين نبدأ نشوف ازاي نتغلب علي أسباب الفشل دي! ممكن حتي نسيب المجال خالص لو شايفين اننا مش هنقدر و نشوف مجال تاني يمكن ننجح فيه!

في الحلقة دي بنشوف مثال كبير اوي علي الفشل و الاستمرار فيه .. و مفيش أي نية للنجاح! .. مفيش خطة .. مفيش خطوات واضحة لينا كدة .. و بالتالي مفيش أمل!

مش هنستني حاجة من منتخب مصر .. و كلها هتبقي اجتهادات شخصية من محمد صلاح و بقية اللعيبة..

 اسمع الحلقة الخامسة و خلينا نتناقش .. منتخب مصر هيعمل ايه تحت قيادة المدرب الجديد ايهاب جلال.

في الحلقة دي بنحكي قصص أبطال قدروا انهم يحققوا احلامهم في سن كبير زي ستان لي مخترع شخصية سبايدرمان و الأفنجرز .. الفنانة عارفة عبد الرسول .. و الكولونيل ساندرز مؤسس سلسلة مطاعم دجاج كنتاكي. متنساش تسمع الحلقات اللي فاتت و تعمل شير للحلقة دي و خلينا نتناقش علي الإنستجرام هل فيه سن مناسب للنجاح؟ هل انا متأخر؟

فكرة الحلقة دي صعبة شوية عشان مش كلنا هنبقي متفقين مع قرارات ابطال القصص اللي هنتناقش فيها في الحلقة دي .. فيه شعرة رفيعة اوي بين المزايدة و الأخلاق طول ما هي حاجة مش فجة و واضحة.

في الحلقة دي بنحكي قصة اسطورة الجودو محمد رشوان و الجندي المسعف ديزموند دوس و ازاي كل واحد فيهم انتصر لمبادئه و أخلاقه ..

ساعدني في الحلقة دي:

منة الله مصطفي - خالد السبيعي - ابتهال فؤاد - يوسف بدوي - بشاير عوض

لكل واحد موهبة في حاجة غير اللي درس فيها .. أكيد بتعرف تعمل حاجة غير اللي بتدرسه .. ممكن تستخدم الحاجة دي في انك تتشهر او انك بس بتضيع وقت و تستغله صح .. ممكن تتعرف علي ناس جديدة .. ممكن تسيب المجال اللي درسته كله اصلا و تبدأ تشتغل بموهبتك دي و دة اللي بنسميه الكارير شيفت

هيكون معايا ضيوف .. المهندسة مريم موسي و اللي بتشتغل موديل و كمان عندها براند منتجات يدوية اسمه "سلام" و الدكتور عمرو زكريا الصيدلي صاحب الصوت الجميل.

لو عجبتك الحلقة ماتنساش تعمل لايك و شير علي السوشيال ميديا .. و تابعني علي الانستاجرام في اللينك اللي تحت دة

https://www.instagram.com/halawelah/

في الحلقة الأولي من برنامج "أنا البطل" .. بنناقش تعريف جديد لمعني النجاح اسمه "النجاح النسبي" .. بحكي لكم قصص بتبين لكم ان مش دايما النجاح بيكون في الفوز بشكله المعروف .. بالعكس النجاح الحقيقي هو انك تعرف تحدد معايير النجاح بالنسبالك و ماتضحكش علي نفسك .. و ساعتها بس هتقدر تقول أنا البطل