Goeie Naand,

Hoevele male het jy nie al gehuiwer om die regte woorde te vind nie. Selfs met gebed sukkel jy, wat is dit wat jy graag wil bid, wil vra, wil afsmeek by Die Here.

Jy wil nie selfsugtig klink nie, ook nie te desperaat nie, miskien wonder jy of Die Here sal verstaan en antwoord.

Sal jy iemand glo wat moord goedgekeur het, mense wreedaardig vervolg het, in die tronk was, weggejaag is uit dorpe en met klippe gegooi was, so hardkoppig dat hy met ‘n sweep paar keer geslaan was as straf, opstandig teen die regering en kerkleiers.

Dis die einste persoon wat ons aanhaal vanaand, Paulus, wat sê “Die Gees staan ons ook in ons swakheid by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie. En God, wat die harte deurgrond, weet wat die bedoeling van die Gees is, want Hy pleit, volgens die wil van God, vir die gelowiges. Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is.”

Paulus het geweet dat hyself aan woorde en antwoorde kortkom en in daardie stil oomblikke pleit Die Gees van God.

Woordeloos word jou gemoedstoestand ook oorgedra omdat God jou hart ken.

Jou gebed geprewel met stilte en in jou swakheid. Jou seerkry, jou vernedering, jou verlede, jou twyfel asook jou hoop op beter dae. Vir jou as gelowige sien God net jou hart raak en luister na wat Die Gees pleit.

Mag jou gebed vanaand jou gerus stel en jy glo dat God alles ten goede sal laat meewerk sodat Sy Liefde in jou en deur jou kan werk.

Twyfel nie, jy het iets om vir Die Here jou God te doen. Jou gebed is jou Dankie sê, Die Gees antwoord namens jou.

AMEN

Nagsê Here. Afrikaans.Radio · Nagsê Here

Goeie Naand,

Die dinge of goeters wat met mens gebeur, baie keer deur eie keuses, dom keuses of onwetend laat jou nogal met hande in die hare.

Hoe gaan jy deurkom, hoe gaan jy oorlewe, hoe kan jy dinge regmaak, wat moet jy antwoord en aan wie, wat moet jy doen?

Dis alles vrae wat jou op een plek vasgevange hou?

Dawid skryf dat Die Here vir die opregtes sorg in Ps 7. Miskien vra jy vanaand waarom dan al die onreg, die omkopery, die kwaadwilligheid van mense, die seermaak en seerkry, hoekom is daar soveel hartseer, wat maak ek met tyd en plek?

Jy voel dalk soos ‘n teiken en almal skiet hul pyle na jou, dalk voel jy dat alles wat verkeerd kan gaan, gebeur met jou.

Dit is net geloof wat jou staande hou met al hierdie vrae.

Daarom sê Dawid in vers 11 en 12 “My skild is by God wat die opregtes van hart verlos. God is 'n regverdige regter, en 'n God wat elke dag toornig is.” Hierdie skild van God kan die pyle keer, dit kan skaduwee verskaf in gloeiende son en snags gebruik word as ‘n dak en in stormweer as ‘n sambreel.

Dit help jou om alles wat met jou gebeur te deurstaan omdat Hy jou beskerm sodat jy verlos kan word tot Sy eer. Hy bly Die Regter wat regverdig is, Hy sien die onreg en kwaadwilligheid en daaroor is Hy woedend, elke dag.

Die 1983 vertaal die verse “God wat die opregtes help, is my beskermer. God is 'n betroubare regter, 'n God wat altyd die skuldiges straf.”

Dit klink amper soos die spreekwoord “Die wiel draai” maar daarvan moet jy jou asseblief weerhou, Hy het in Sy liefde ook jou liefde nodig wat jy met jou lewe moet bewys.

Mag jy eerder antwoord op al die dinge wat in jou lewe gebeur, die mooi en die lelik, die soet en die suur, die reg en die verkeerd soos Ps 7 eindig “Ek wil die Here loof na Sy geregtigheid en die Naam van die Here, die Allerhoogste, psalmsing.”

Mag jou lewe ‘n lofsang aan Die Here jou God bly. Hy sal jou verlos op Sy tyd vir jou bestem.

AMEN Afrikaans.Radio · Nagsê Here

Goeie Naand,

Dink jy Die Here het ‘n droom vir jou? Sou dit beter klink as die vraag is; het Die Here het gedroom en jou vir ‘n doel geskep hier op aarde?

Miskien wil jy nou antwoord dat die lewe geen droom wêreld is nie, met dit gesê kan jy ook nie die lewe as ‘n nagmerrie beskryf nie of van nagmerrie ervarings praat nie.

Elkeen het sy drome, ideale, wense en doelbereikings met oop oë hier op aarde.

Jyself het dalk ‘n plan B as plan A nie uitwerk nie.

As dit anders gestel word in die lewe wat ons ervaar, tussen drome, wat van die volgende stellings tussen Plan A en B; Niemand trou om te skei nie, niemand kry kinders net om hulle weg te gooi nie, niemand plant sonder om ‘n oes te verwag nie, niemand maak ‘n vriend om van die ‘n vyand te maak nie.

Eenvoudig is dit dat niemand lewe sonder om asem te haal nie, en solank jy lewe, leef jy Die Here se droom en doel vir jou. Hy het jou buite beheer geplaas van sekere spiere soos ooglede, hart, maag en organe soos longe, lewer, niere.

Jou brein vermoë bepaal jou wilskrag, jou verantwoordelikheid, jou besluite van liefde en omgee, dit bepaal jou menswees.

Alles deur Die Here geskep, maak nie saak hoeveel planne jy het nie. Ps 56 sê Dawid, in moeilike omstandighede “Deur God sal ek die woord prys; deur die Here sal ek die woord prys. Ek vertrou op God, ek vrees nie; wat kan 'n mens my doen? Op my, o God, rus geloftes aan U gedoen; lofoffers sal ek U betaal; want U het my siel gered van die dood - ja, my voete van struikeling - om te wandel voor die aangesig van God in die lig van die lewe.”

Mag al jou woorde en gedagtes vanaand deel wees van Die Here se Droomdoel met jou en jy Hom daarvoor loof en prys want selfs wanneer die donkernag verdwyn bly Hy die God van jou lewe, met elke spier en orgaan leef jy in Sy Lig van die Lewe, gered van die dood, ‘n wandeling met vergifnis sou jy struikel.

Mag jy lekker slaap en weet Die Here ontmoet jou, met jou menswees in Sy Droom, ons bid vir diegenes wat buite Sy Droomdoel lewe.

AMEN

Nagsê Here. Afrikaans.Radio · Nagsê Here

Goeie Naand,

Jy lees ook Die Bybel en soms tref verse jou net anders asof jy dan eers die werklike betekenis verstaan.

Die onlangse jare het my ook deur spanningsvolle tye gebring en vrae na waarheid en opregtheid.

Willens en wetens het ek ook gewaag waar engele sou huiwer, mense onmoet, gehelp waar ek kon, al is dit net met woorde en liefde deur aanvaarding, selfs konfrontasie met afleidings en idees van ander. “Tussen heidene, dronkaards, kerkloses en sondaars” sou so baie ander beskuldigings kon gooi.

Dan wonder ekself “Hoekom Jesus sou verwag dat ‘n herder 99 skape los en na een gaan soek?” Die sommetjie maak nie sin nie, behalwe as Hy seker was hulle is veilig. Met die lees van Ps 23, Esegiël 34 en Sagaria 11:17 dan is dit te betwyfel of die 99 werklik veilig was, tensy steeds deur Die Herder beskerm, as gevolg van geloof, in Sy Genadekraal.

Dan kom ons by Romeine 9 en Paulus begin dadelik met die woorde “EK spreek die waarheid in Christus, ek lieg nie — my gewete getuig saam met my in die Heilige Gees — dat dit vir my 'n groot droefheid is en 'n onophoudelike smart vir my hart.

Hy doen ‘n belydenis en jy kan die smart, die seerkry hoor waarmee hy praat. Hy praat dan oor die geloof in Israel, die wat hul geloof definieer as nageslag uit Adam, die uitverkorenes. Paulus haal tekste aan uit Genesis, Hosea, Jesaja en andere, hartverskeurend verwys hy na die optrede van die sogenaamde gelowiges, mense beheer, gekondisioneer deur eie afleidings.

Hoe sou jy geloof definieer? Wie sou jy as voorbeeld van geloof gebruik in vandag se tyd? Watter reëls heg jy aan geloof? Voel jy nie ook harstseer oor die hoeveelheid gewondes, stukkendes, uitgeworpenes en soekendes wanneer jy aan jou antwoorde op hierdie vrae dink nie?

Paulus sluit af en ek lees die 83 vertaling “Wat is nou ons gevolgtrekking?

Dít: heidene het nie God se vryspraak gesoek nie, maar dit wel gekry – die vryspraak deur die geloof. Israel, daarenteen, het 'n wet gesoek waardeur hulle God se vryspraak sou kon kry, maar by so 'n wet het hulle nie uitgekom nie.

Waarom kon hulle nie die vryspraak kry nie? Omdat hulle nie op die geloof wou bou nie, maar op hulle eie prestasies. Hulle het oor die struikelblok gestruikel waarvan daar geskrywe staan: “Kyk, Ek sit in Sion 'n klip neer waaroor 'n mens struikel, 'n rots waarteen jy jou stamp, maar wie in Hom glo, sal nie teleurgestel word nie.”

Mag jy nie teen die rots vasloop nie maar deur jou geloof in Die Rots, jou lewe leef.

Christus Jesus is as God ons Hoop en Verlosser. Glo dit en gun dit ook vir ander, Hy bly onse Rots.

AMEN

Nagsê Here. Afrikaans.Radio · Nagsê Here

Goeie Naand,

Hoe lekker sal dit nie wees as almal saam kan lag en vrede hê nie?

Sou jy gevra word wat hoop beteken, sal jy kan antwoord dat almal gelukkig moet wees?

Kyk en luister maar na mense, feitlik almal beleef een of ander tyd mislukte verhoudings, seerkry verhoudings, onseker verhoudings en liefdelose verhoudings. Die gesonde verhoudings weërspieël daarteenoor ‘n kragbron van geluk, verhoudings waar mense mekaar aanvaar, bemoedig, bystaan en in liefde leef.

Paulus skryf hiervan in Romeine 15 “En mag die God van lydsaamheid en bemoediging aan julle gee om eensgesind onder mekaar te wees ooreenkomstig die wil van Christus Jesus, sodat julle die God en Vader van onse Here Jesus Christus eendragtiglik uit een mond kan verheerlik. Neem daarom mekaar aan, soos Christus ons ook aangeneem het, tot heerlikheid van God.”

Paulus vra hierdie openhartige aanvaarding van mekaar sodat God verheerlik kan word deur eensgesindheid. Miskien het jy dalk vanaand ‘n moedelose gevoel, nie in jouself nie maar as gevolg van verhoudings en ooreenkomste wat skipbreuk lei, dalk voel jy, jy het hoop verloor.

Die woorde klink maklik om te sê en tog is dit waar, “Ons dien ‘n God van hoop, in Christus Jesus skep Hy hoop in hopelose situasies, Sy Liefde skep in jou ‘n deursettingsvermoë om jou denke en dade te vul met hoop.

Paulus sluit hierdie gedeelte af met ‘n seën wat vanaand vir jou ook gebid word

“En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees!”

AMEN

Nagsê Here. Afrikaans.Radio · Nagsê Here

Goeie Naand,

Dit is altyd ‘n voorreg om opregte vriende te hê. Nou gesels ons nie oor kenisse nie maar vriende as waarde toevoeging. Reël maar ‘n reunie en terwyl jy die boodskappe lees onthou jy die mense, die verlede, die lag en huil, die groei saam en die waarde wat hulle aan jou lewe geheg het.

Dalk het jy vandag vriende wat jou werklik ondersteun, jy voel jy kan jou lewe in hulle hande plaas. Jou hartsgeheime met hulle deel, jou toekomsdrome saam beplan en weet hulle sal jou bystaan.

In Mattheus 6 lees ons “Kyk na die voëls van die hemel; hulle saai nie en hulle maai nie en hulle bring nie bymekaar in skure nie, en tog voed julle hemelse Vader hulle. Is julle nie baie meer werd as hulle nie? Wie tog onder julle kan, deur hom te kwel, een el by sy lengte voeg? En wat kwel julle jul oor klere? Let op die lelies van die veld, hoe hulle groei; hulle arbei nie en hulle spin nie; en Ek sê vir julle dat selfs Salomo in al sy heerlikheid nie bekleed was soos een van hulle nie.”

Hierdie is ‘n vriendskap verhouding met Die Here. Jou lewe is in Sy Hande. Hy is die vlieënier, jy die passasier, hoewel Hy toertjies ver bo die grond maak, jy voel bang en onseker, bring Hy jou veilig tuis.

Mag jy vanaand as jy voel dat jy die vastigheid van die grond verloor het en blootgestel is aan enige iets wat verkeerd kan gaan weet dat Hy die stuurstang vashou terwyl Hy vir jou sorg.

Sien die voëls in die lug raak, die lelies op die grond en glo dat jy vir Hom baie werd is, mag al jou kwellinge verdwyn met die wete dat Die Here, jou God, in beheer is.

AMEN

Nagsê Here. Afrikaans.Radio · Nagsê Here

Goeie Naand,

Hoekom dink jy wil mense soveel ander mense, veranderd kry.Soort soek soort, lui die spreekwoord, tog is daar altyd mense wat iets anders verwag en vereis. Mense sukkel om mekaar te aanvaar, om onvoorwaardelik die medemens te help wat werklik hulp nodig het. Dit word amper soos mense wat hulself as engele ag teen die sondaars in die lewe, net omdat ons nie die andersheid kan aanvaar nie.

Onthou jy die storie van son en wind wat ‘n weddenskap aangegaan het oor wie die vinnigste ‘n mens se jas kan wegneem. Son het agter ‘n wolk weggekruip en wind het begin blaas in stormwind. Hoe harder hy geblaas het hoe stywer het die mens sy jas vasgeklou. Na dit was dit son se beurt, glimlaggend het hy met warmte die mens saggies en liefdevol aangeraak met sy sonstrale. Na so rukkie het die mens sy jas uitgetrek. Son het gewen.

Dit is nie met brute krag wat jy mense laat verander nie, hoekom is dit in elk geval nodig om jou sin te kry om mense te verander. Jakobus skryf in hoostuk 2: 15-17 “WAT baat dit, my broeders, as iemand sê dat hy die geloof het, maar hy het nie die werke nie? Dié geloof kan hom tog nie red nie? As daar nou 'n broeder of suster naak is en aan die daaglikse voedsel gebrek het, en een uit julle sou vir hulle sê: Gaan heen in vrede, word warm, word versadig, maar julle gee hulle nie wat vir die liggaam nodig is nie — wat baat dit?

Net so is ook die geloof, as dit geen werke het nie, in sigself dood.”

Mag jy vanaand besef Die Here wil jou gebruik met ‘n glimlag teenoor ander, om hulle met ‘n warm liefde aan te raak. So bewys jou werke jou geloof, jy kan iemand help met jou uitreik.

Die Here het jou aangeraak, het Hy nie? Met Sy sagmoedigheid, oor jou Sy Sonstale gebied, gun dit ook vir ander!

AMEN

Nagsê Here. Afrikaans.Radio · Nagsê Here

Goeie Naand,

In Markus 2 lees ons vanaand ‘n besonderse verhaal. Die verhaal se fokus is nie geloof en genesing nie of geloofsgenesing nie maar wel vergifnis. Jesus was in iemand se huis, besig om God se Woord te verduidelik aan ander. Die dakke was maar laag, bedek met gras of riete en klei daaroor gesmeer.

Vier vriende bring hul verlamde vriend na Jesus toe, die huis toegepak met mense, selfs voor die ingang was daar ‘n samedromming. Hulle vat toe kortpad, klim op die dak en begin dit oopbreek en sak hul vriend neer voor Jesus.

Kan jy jou indink aan die hoeveelheid stof, gras, riete en klei klonte neergeval het op Jesus en die wat naby Hom was. Meer nog, dis baie disrespekvol om iemand te steur terwyl hy praat, wat dan van ‘n hele vergadering ontwrig.

Sulke gedrag ontlok irritasie en aggressie in elke mens, jy kan jouself en jou reaksie voorstel, woede, vloekwoorde, misnoë en beskuldigings, sal ons maar net sê - gedrag vol sonde gelaai. Maar Jesus was nie net mens nie, ons lees vers 5 "En toe Jesus hulle geloof sien, sê Hy vir die verlamde: Seun, jou sondes is jou vergewe!”

In ‘Stories van die Lewe’ word vertel van ‘n priester wat gehoor het van ‘n vrou wat reken Die Here praat direk met haar. Skepties en jaloers gaan besoek hy haar, dit klink net te onwaar. Hy toets haar om Die Here die volgende keer te vra wat sy grootste sonde as priester is.

Nuuskierig, na ‘n maand besoek hy haar weer om te hoor wat Die Here se antwoord was. Haar woorde was “Die Here het vir my gesê om jou te sê “Watter sonde? Die sonde wat Hy vergewe, vergeet Hy ook.”

Vanaand is dit wat Die Here vir jou ook sê en Hy voltooi dit met “Staan op en neem jou bed op en loop!”

Mag jy jou lewenspad met vreugde loop deur Sy genadige Vergifnis. Jy het ‘n veskil om te maak!

AMEN

Nagsê Here. Afrikaans.Radio · Nagsê Here

Goeie Naand,

“Welgeluksalig is die man wat die Here vrees, wat 'n groot welbehae in sy gebooie het.”

Die Boodskap vertaal die vers in Ps 112

“Die gelukkigste mense op aarde is hulle wat groot respek vir die Here het, wat met blydskap luister na alles wat die Here sê.”

Wat is hierdie alles wat Die Here sê?

Wat beteken die welbehae in Sy gebooie?

In vandag se wêreld en kommunikasie middele en daarmee saam die hoeveelheid van geloofsweergawes raak dit moeilik om Die Here te vrees, om respek vir Hom deur die mense raak te sien. Nog moeiliker raak dit om te hoor wat Hy sê en volgens sy gebooie te leef, asof Sy Stem wegraak tussen die miljoene ander en Sy wil in konstante botsing is met wêreld hiërargie.

Dink maar aan dit wat vroeër jare toelaatbaar was en vandag nie meer is nie, dwelms aan kinders soos opium in hoesmedisyne, kokaine vir tandpyn, sekere woorde.

So het sekere lewensstyle ook verander wat toe ontoelaatbaar was maar vandag is, kleredrag en dobbel om net enkeles te noem. Deurgans het die gebooie van Die Here gegeld en is dit as maatstaf gebruik om sy Woord te gebruik “So sê Die Here”

Wanneer dit jou deurmekaar maak, begin by jou eie gesprek met Die Here.

Ek dink nou aan die liedjie van Bernice West ‘Die Here het my mooi gemaak’

Maak dit saak wat ander mense verkeerd doen, word van jou rekenskap geëis oor ander? Doen jy maar net wat goed is. Glo jy net in jouself en dat Die Here jou spesiaal gemaak het, jy het jou doel in hierdie lewe vir Hom. Sy doel met jou regverdig jou vir mooi dinge omdat Hy jou mooi gemaak het.

Mag jy ook vanaand sê dat jy nie slegte tyding vrees nie want jou hart is gerus, vol vertroue op die Here. Dit bepaal jou geluk.

AMEN

Nagsê Here. Afrikaans.Radio · Nagsê Here

Goeie Naand,

Hoe wil Die Here hê jy moet wees as jy tot Hom nader? Het jy al gewonder oor hierdie vraag, ‘n vraag na jou waardigheid?

Dit hang nie af van jou suksesse nie maar wie jy is. Jy ken ook mense wat skool verlaat het op laerskool en suksesvolle boere of besigheidsmense geword het. Jy ken ook gegradueerdes wat steeds werk soek, ander mense wat op soek is na Die Here maar vind Hom nie. Die gelowiges sê “Dankie” en vra na Die Here om genade, uitkoms en die regte besluite.

Die vraag bly “Hoe kom jy by Die Here uit? Watter etiket moet gevolg word met kleredrag, groetwoorde en gesprekvoering?” Daardie gevoel waarby jy verby moet kom, van om verder as die spreekwoordelike dak te bid, wanneer jy dink jou gebede in die lug verdwyn, jy vind Die Here nie, berusting, aanvaarding en kalmte ontbreek.

In Psalm 24 vra Dawid ook die vraag;

“Wie mag klim op die berg van die Here? En wie mag staan in sy heilige plek?

Hy wat rein van hande en suiwer van hart is, wat sy siel nie ophef tot nietigheid en nie vals sweer nie.

Hy sal seën wegdra van die Here en geregtigheid van die God van sy heil.”

Mag jy vanaand jou gesprek met Die Here so begin “Hier is ek Here, met hande wat rein is, ‘n hart suiwer vir U liefdesdiens, bedrog is daar nie in my nie ek is nie vals nie, ek wil opreg U vind. Mag jy ‘n besonderse ervaring beleef dat jy ook kan sê “Wie is dan tog die Erekoning? Die Here van die leërskare — Hy is die Erekoning! Ek het Hom gevind op Sy Heilige berg”

Dankie my Erekoning vir U seëninge.

AMEN Afrikaans.Radio · Nagsê Here