Historical and biographical account about Norwegian explorer, scientist, polymath Fridtjof Nansen and the first crossing of Greenland. This narrative is in the language -Ilocano. This is the second of 4 parts.

EXCERPT:

"...Napigsa met ketdi ti panagtalek ni Nansen iti kabukbukodanna a pisikal a kabaelan. Nairuam daytoy a mangsubok iti kired ti pakinakemna. Adun dagidi napadpadasanna a karit ti kabakiran iti aglawlaw ti pagtaenganda. Natured daytoy uray maymaysana. Pagaayatna ti isport a ‘cross country skiing’* uray no sol-solona ti agdaliasat. Naunday a panagdaliasat iti rabaw ti hielo babaen ti panagpauyas daytoy nga isport. Ngem napigsa ti pakinakemna ket masansan nga agmay-maysa a mapan agkampo kadagiti adayo a lugar. Mangipatakder iti kampona kadagiti kabakiran ket pasaray ti laeng maanupanna nga ayup wenno makalapna a lames ti pagbiaganna. Idi nagkabannuag, nagkampeon daytoy iti ‘cross country skiing’ iti naminsangapulo ket dua a daras. Idi nagtawen daytoy iti SANGAPULO KET WALO (18), isu ti nangiggem iti rekord a kapardasan nga atleta iti isport nga ‘skating’* iti sangalubongan. Daydi a kompetisyon ket maysa a milya ti kaadayo ti lasatenna.

Nagplano a nasayaat ni Nansen iti daydi preparasyonna iti ekspedisyon a panangdaliasat iti interior ti Greenland. Bininsa-binsana a pinagpanunotan amin dagiti kababassitan a banag maipanggep kadagiti kasapulanda – manipud kawes, sapatos, sagat a paguyas, paglutoan, pagturogan, tolda ken taraon. Malaksid iti nadaing a karne a napakebbet iti taba (pimmican), nangitugot daytoy iti napatangken a tinapay ken biskwit, asukar, nagango a kardis a mapaburek a makaldo, tsa ken kape. Nagkonsulta daytoy kada Nordenskjold ken iti maysa pay a beterano a managdaliasat a managan Gustav Holm maipapan iti gargaret ken suplay.

Idi damo, pinanunot ni Nansen a mangitugot daytoy iti aso nga agguyod kadagiti pasagad ngem gapu ta awan padasna iti panang-patrabaho iti aso, dinan intuloy daytoy. Napanunotna pay ti ugsa ngem naamirisna a kasapulan dagitoy ti karuotan a pangalaanda ti taraon ket awanto dagita iti malasatanda. Saannan nga intuloy ti nangitugot. Inkeddengna nga ibaelandanto nga is-isuda ti agguyod kadagiti kasapulanda. Nangisagana iti lima a babassit a pasagad tapno mabingay-bingay ti pannakaiwaras ti dagsen ti awitenda a probisyonda. Dua ti mangguyod iti umuna, saggaysanto dagiti dadduma. Binaliwanna ti disenyo daydi kadawyan a pasagad ti Noruego. Inaramidna daytoy iti nalag-an a tarikayo sa nangibaud iti naingpis a paslep wenno landok kadagiti sagat a pagpauyasna. Nagusar daytoy iti lalat a pinanggalutna a namagsilpo kadagidi kayo a saan ketdi a lansa ken ipit nga isu idi ti kadawyan nga usaren dagiti Noruego.

Kasakbayan daydi naikeddeng a panagluas ti grupo, kinasapulan a simmango ni Nansen iti grupo dagiti akademiko idiay unibersidad tapno depensaanna daydi tesis nga insumitena. Kadawyan a proseso iti panang-gun-od iti titulo a kina-Doktor ti Pilosopiya ti panangdepensa iti tesis. Daydi tesis ket report maipapan iti proyekto wenno, iti kaso ni Nansen, maipanggep daytoy iti baro a duktalna iti siyensa. Iti kasta, daydi a panangdepensana iti tesisna ket naaramid iti sangoanan dagiti akademiko a nangusisa iti nanguneg daydi naisumite a tesis Impagarup dagidi nangamiris kenkuana nga akademiko a bakbakkugenna ti kinapudno tapno maiyannatup daytoy iti teyoridad ti kapanunotanna.

PLEASE LISTEN TO PODCAST FOR THE FULL AND COMPLETE EPISODE.