У чэрвеньскай перадачы адзначым наступныя тэмы: кніга пра народныя спевы беларускіх старавераў, традыцыйнае майскае свята ў Рэзэкне, чэрвеньскія фестывалі ў Польшчы, Дні беларускай культуры ў Даўгаўпілсе і новая ініцыятыва ў беларускай дыяспары – Узнагарода года “Ліхтары”.

 

Кніга спеваў беларускіх старавераў

Напрыканцы мая ў Даўгаўпілсе і Рызе адбылася прэзентацыя кнігі Вольгі Барышнікавай пад назвай “І даўней так пелі. Музычны фальклор старавераў паўночна-заходняй Беларусі”. Даследчыца збірала песні ў экспедыцыях па прымяжовых вёсках Віцебшчыны. Кніга выдадзена ў Лондане.

{module widgetid="4" id="media" action="galleryitem" galleryid="1500" layoutid="49" layout="singlegallery" static=""}

Пра работу і планы размаўляем з Вольгай Барышнікавай, беларускім этнамузыколагам, выкладчыцай традыцыйнага спеву, музыкай, лаўрэатам міжнародных конкурсаў, якая зараз жыве ў Польшчы.

 

Канцэрт “Сузор’е” збірае сяброў”

Традыцыйна напрыканцы мая Рэзэкненскае беларускае таварыства “Сузор’е”  ладзіць канцэрт, на які запрашае сяброў. Падрабязнасці – у заснавальніцы традыцыі Людмілы Стэц.

{module widgetid="50" id="media" action="singlepic" imgid="413262" layoutid="0" layout="" static=""}

    

Чэрвеньскія беларускія фестывалі ў Польшчы

Напачатку чэрвеня два творчых калектывы Цэнтра беларускай культуры Дома адзінства з Даўгаўпілса выступілі на беларускіх фестывалях у Польшчы.

{module widgetid="50" id="media" action="singlepic" imgid="413263" layoutid="0" layout="" static=""}

Першы канцэрт адбыўся на Падляшчы, у маляўнічай вёсцы Мацьковічы. Другі - на юбілейным, 40-ым, Свяце беларускай культуры ў Беластоку. Упершыню перад польскімі гледачамі выступалі вакальны ансамбль “Пралескі” і тэатральная студыя “Паўлінка”. Уражаннямі дзеліцца Анастасія Лукашэнак, кіраўніца “Пралесак”.

 

Узнагарода года “Ліхтары” - 2024           

Традыцыйна ў канцы мая – пачатку чэрвеня ў Даўгаўпілсе адбываюцца Дні беларускай культуры, прымеркаваныя да дня памяці Прападобнай Еўфрасінні Полацкай. Падзей было шмат і разнастайных: набажэнства, выставы, імпрэзы, творчыя вечарыны. Адметнай асаблівасцю стала “Узнагарода года “Ліхтары””. З такой ініцыятывай выступіла Даўгаўпілскае беларускае таварыства “Альтанка”. Галоўная ідэя: культура – гэта святло, якое мы нясём адзін аднаму, таму падзякуем у беларускай дыяспары Латвіі тым, хто ў 2024 годзе свяціў ярчэй. На ўрачыстасці былі ўручаны прызы-статуэткі ліхтаршчыка ў пяці намінацыях: Творчасць, Адкрыццё, Ідэнтычнасць, Праект і Персона.

У намінацыі “Творчасць” узнагароджаны паэт Станіслаў Валодзька – за плённы ўклад у развіццё беларускай літаратуры. На свяце Станіслаў Віктаравіч прачытаў свой новы верш - “Ліхтаршчык”. 

У намінацыі “Адкрыццё” адзначана Дагдская дзіцячая студыя “Аколіца”. Інэса Плесня і Карына Бэйкулэ ў 2024 годзе стварылі гэты творчы калектыў школьнікаў. Адзнака – за захаванне і папулярызацыю беларускай песні.

{module widgetid="50" id="media" action="singlepic" imgid="413264" layoutid="0" layout="" static=""}

У намінацыі “Ідэнтычнасць” узнагароджана Тэатральная студыя “Паўлінка” Цэнтра беларускай культуры Дома адзінства пад кіраўніцтвам Інэсы Казлоўскай – за адраджэнне і папулярызацыю аўтэнтычных беларускіх традыцый. Значнае дасягненне 2024 года – паспяховы агляд “Паўлінкі” на Міжнародны фальклорны фестываль “Балтыка”.

У намінацыі “Праект” адзначана таварыства “Альтанка” – за факсімільнае выданне гістарычных кніг Вольгі і Сяргея Сахаравых.

У намінацыі “Персона” узнагароджана настаўніца Ганна Іванэ – за самаадданую асветніцкую дзейнасць у Рыжскай беларускай асноўнай школе імя Янкі Купалы. У мінулым годзе навучальная установа была зачынена, але захаваліся беларуская мова і літаратура як факультатывы і існуе школьны музей імя Янкі Купалы. Спадарыня Ганна Уладзіславаўна не змагла прыехаць на ўрачыстасць і даслала свой відэазварот.

Арганізатары плануюць зрабіць Узнагароду года “Ліхтары” штогадовай і ўручаць на традыцыйным майскім свяце Дзён беларускай культуры ў Даўгаўпілсе.