إنتاج المحتوى - الأفكار

الملخص. كل ما حبيت الشغلة أكتر كل ما لقيت عدد لا متناهي من الافكار للحديث عنها.

قبيلة. كيف الحال؟

نحن هون لانتاج أو صناعة المحتوى الي بيمثلك و مش عم تعمل الشغلة عشان الشهره إلي إتفقنا إنو رح تاخد شوية وقت لتيجي و مانها الهدف الأساسي… الشهرة تابع… المهم إذا أنت عم تعمل الشغلة… شغلة إنتاج المحتوى عن حب فصدقاً كل شيء في هذا الكوكب رح يحكي لغة المحتوى تبعك….

بتحب كرة القدم… حبة العلكة ممكن تعمل مباراة… بتحب تربية الأطفال… المشوار بالمول ممكن يشغل في عقلك عشرات الأفكار الرائعة لمواضيع ممكن نطرحها. التواجد على السوشيال ميديا و استهلاك المحتوى الي بيناسب اهتماماتي رح يعطيني افكار لا نهائية… القصة كلها انك اول ما تيجيك فكرة الموضوع اكتب اكتب اكتب…. جماعة خلص بتذكر بعدين بس اوصل بس قوم بس فيق بس خلص بس تبس عدوك الأول إن شاء الله… و الي هو الذاكرة…. ذاكرة الإنسان من أفضل الشغلات التي لا يعتمد عليها…. فاكتب…

مش ضروري تكتب الموضوع كله في التو و اللحظة … إلا إذا زارتك إلهام… ولكن العنوان… بعض النقاط الرئيسية أو شو بدك توصل…. و بعدين استرسل…

مش ضروري الموضوع يكون الموضوع الذهبي الي من خلاله رح تجيب مليار مشاهدة و تشد فيه كوكب الارض… لا… فيه الموضوع يكون جداً متخصص و هيك مواضيع بتشد الناس المتخصصة فقط…. و حلاوة هدول الناس انهم مخلصين للموضوع و متابعين بشغف اكثر من الناس الي عشوائياً عم بتدور على محتوى حتى ولو كان مفيد.

مش ضروري يكون الموضوع الكل عم يحكوا عنه عشان نلحق و نركب الموجة و لو انو مش غلط ابدا… أصدقائي في شركات السوشيال ميديا بيخبروني أسبوعيا بالتريتندات (المواضيع) الي رح تنجم و يفتحوا عليها حنفية المشاهدات الاسبوع الجاي… عشان انا كصانع محتوى حاول انتج شيء يتناسب مع ما يريدون التركيز عليه في الفترة القادمة كمنصة.

شوبك متفاجئ… اه فكرت انه الموضوع هيك لله في لله … و يا سبحان الله كيف ضرب الفيديو الفلاني او الشخص الفلاني ..؟ اه ايه… ان شاء الله…

بس تَتُوصَل لهناك في مليون طريق لتعرف شو الي بيهم الناس حالياً في المجال الي انت بتحبه… ولو قلت لي ما بعرف او قلت لي ان الكل بده بس فيديوهات الترقص... بحب قلك انك ما بتحب المجال الي انت فيه اصلاً… مش ضروري ملايين المشاهدات و الكل مش جمهوري… كابيش؟

عند متابعة مستجدات التكنولوجيا مثلاً بعرف ان حالياً الناس الي في المجال او الي بتحب المجال والي حتى لو ماكانو كتار….. مهتمين بشو رح ابل تنزل بال wwdc و وان بلاس عم يقوى اكثر في الاعلام … و الميافيرس … ايثيريوم لل٥٠٠٠ و الاتحاد الاوروبي ناوي يخنق كل شركات التكنولوجيا الامريكية… ايلون ماسك… تسلا … تويتر… ايلون ماسك و تويتر… هدول هيك بسم الله… بعرف انك ممكن كتير ما تكون مهتم بالي حكيته هلا لانك داخل على فيديو من سلسلة كيف تبدإ رحلة إنتاج المحتوى… أو متل ما بيحب السوق يسميها صناعة المحتوى… ولكن المثال كان لانو في اخبار و مواضيع تحكي فيها رأيك عن كل شي… في دائماً مواضيع ممكن تضيف إلها … إذا مهتم طبعاً…..

بدي ياك تتذكر شغلة مهمة جداً أنو إذا كان محتواك لا يخضع لعامل الزمن… يعني صالح لكل زمان و مكان فأنت عم تلعب لعبة الاستمرارية … لان اذا قرأت كتاب عن فوائد الماي كتب من ٤٠٠ سنة قديش برأيك بيكونوا المعلومات اختلفوا…. إذا قناتي كانت في حب اللغة العربية… هل برأيك إعراب الخبر رح يجيه تعديل بعد سنة ولا عشرة؟

اما محتوى عن شي دارج هلا… فممكن كمان شوي يا يصير درس تاريخ … او ينساه التاريخ… مستجدات التكنولوجيا اليوم ما الها ستين لازمة كمان اسبوع… محتوى عن الفنانين … عن حالة الطقس… عمرك شفت حالة الطقس الاسبوع الماضي؟ أو شو لبست فلانه من شهر؟ تربية الاطفال و التعامل مع المراهقين اليوم قد تختلف كمان سنة او عشرة بس بيضل القواعد واحدة لغاية ما يفرجها ربنا و هيك.

حدد محتواك… حدد مشاهدك… حدد النقاط الي بدك توصلها و ما تتوقف عن الانتاج… الاستمرارية اهم من شو عم تقدك لغاية اليوم… الذكاء الاصطناعي بيشوفك كشخص ملتزم بيحبك فبيبعتلك مشاهدين و دورك تخليهم يضلوا يحضروا… الذكاء الاصطناعي بيشوفك شخص مزاجي يوم بينزل محتوى و عشرا لأ بيقلك خلي ولي … هاد مو تبع شغل..

تمام؟

و لليوم سلام.