إنتاج المحتوى - القيمة

الملخص. عطيني شي قيمته عالية رح خبر كل أصدقائي عنو. و عنك. و عنِك. و عنكن.

قبيلة. كيف الحال.

بتعرف لما تلاقي شي كتييييييير ممتاز بأي جانب من جوانب الحياة بيصير بدك كل الي بتحبهم يجربوه.

غنية صاروخ. مقطع بيخليك تضحك من الدان للدان. طريقة تصليح غطا الفرن بثلاث خطوات. كيف تكسب فلوس من أغراض البيت القديمة. محل بيبيع كنافة طيبة. شو ما كان. إذا الموضوع كان جدًا واو. و خلاك تحس انك شخص أفضل بعد ما "إكتشفته" فسبعتلاف بالمية التصرف الطيبي انك تخبر أحبابك أو الأشخاص الي بحياتك بيعزو عليك و بإعتقادك انهم عم بيواجهوا مشكله و الحل لقيته في هذا المقطع فبيصير انو بدك تساعد و تنشر من غير ماحدا يقلك.

اهااااا. هلا صار دورك كمنتج محتوى تحل المشاكل الحياتية بإضافة قيمة. ما تخلي ولا فيديو يطلع من عندك إلا و الناس مستفادة.

مش عم احكي بس فايدة يعني دكتوراه و علاج السرطان. لا. النكتة الحلوة مفيدة للمنكد. الاغنية مفيدة للي عبالهم يرقصوا و يغيروا جو. طريقة حساب الميزانية الشهرية مفيدة للي فايت بالحيط من ورا ايدو المبخوشة/ المخرومة و المصروف من غير رقيب. هههه هاي أنا.

و تذكر الفيديو الي ما بيعجبك بيكون مش الك كمشاهد. و انت كمنتج او صانع محتوى مش المفروض تحكي لغة الكل. لن تستطيعش أبدًا حقًا. لازم تحدد مين مشاهدك و تنتج محتوى اله. بتتذكروا حكينا عن الموضوع. بس التذكير كويس… المفروض.

و بعمرك ما تضحك على الناس. او تستغبيها. أو تستصغرها. ثمبنيل (صورة غلاف) صاروخية بعنوان بعالج الفالج و بس يفوت لعندك المشاهد يلاقيك عم تسلق بطاطا و ما كنت صادق معه و كذبت عشان بس يتفضل عالمحل فانا كذاب و محتواك كذاب و المصداقية صارت صفر مكعب و شو رأيك انت الكذاب وين بروح؟ ايه ايه على المول.

المهم. كون صادق. عطيني قيمة و ما تزودها أطلع مطبوخ من الفيديو. شغلة شغلتين بكل فيديو بيكون كتير منيح بشكل عام. و أكيد بتفرق على حسب نوع المحتوى.

تمام؟

و لليوم سلام.