الملخص. شو رأيك بقناة سياسة بتعمل مراجعة لاخر الاغاني و الفيديو كليب. أو تروح على قناة تحليل كرة قدم و تلاقي كيف تطبخ المسخن الفلسطيني على الاصول!!! و رونالدو يا حج. شو خص المسخن بباريس سان جرمان؟

قبيلة. كيف الحال؟

حسان أنا بحب كتير شغلات بالحياة و عبالي أحكي عنهم كلهم.

سوسن. بعرف إنك أشطر وحدة بالعالم بستين شغلك بس عالقناة اهتمي بشغلك. مافيكي تروحي عصيدلية تشتري ربطة خبز أو مشروبات غازية. لا يجوز.

هلا بيجوز صاحب الصيدلية يفتح جنب صيدليته سوبرماركت و يبيع مشروبات غازية. السكر عاليمين و علاجه عاليسار. بس التنين بمكان واحد خبصة شوي.

و أشهر مثال في هذا المجال هو المغنين و المطربين و الفنانين. بتغني تش تيكي تم تم و جمهورها تش تيكي تم تم و بس يصير قضية سياسة بتبلش تحلل سياسة. و الرد رقم واحد من الكوكب دائمًا بيكون خليكي بالتش تيكي تم تم. و هديك الي بتغني بس أغاني وطنية و ثورة و حرية بتنسى الباسوورد تبع كل منصاتها لما يجد الجد و جمهورها الي تعود على هيك محتوى ناطر تعليق. بس لانو الجماعة المتخانقين ضد جماعتها و الربحانين ما بتحبهم و يلاااااا.

المهم. نركز على المحتوى في بداية قناتنا و مثلًا إذا اردنا التفرع يكون تفرعات تتناسب مع الموضوع الرئيسي. مثال

فندق خمس نجوم بده يبدأ في انتاج المحتوى. التركيز الرئيسي لازم يكون على "الفندق" و من خلاله أو للوصول إليه فينا نعمل تفرع مطاعم و طبخ فندقي مع حلويات فينا نعمل سبا ومساج و تعليم المشاهد فنون الاسترخاء. فينا نعمل تفرع اله علاقة بترتيب الغرف بالطريقة الفندقية مناشف شراشف خزائن.

بدك تروح بمجال مختلف تحت نفس المظلة. روح بودكاست ڤودكاست فنون الادارة الفندقية. أو قصص غريبة من نزلاء أغرب. جرائم فندقية. أسرار الحجوزات. علم الناس كيف يفتحو فندق. ايه ايه جد.

هون الناس بيصير عندها اهتمام و فضول و حب لزيارة هذا القسم الي حكيتو عنو. بيصير عند المتابع قوة المعرفة عن كيفية الامور بتمشي و بيجي لعندك على وجه الخصوص بشخصية أقوى. لأنو…. صاحب المحل. المحل محلنا.

في قناة على تيك توك لشاب و أبوه عندهم خلطة شطة حارة. عاملين قناة عم يعلمو الناس كيف بتنعمل. و كيف بتنطبخ. و كيف بتنصب بالقناني. و بتتغلف و بتنشحن. ولك حتى ممكن الناس يكتب كومنت/تعليق يقول فيها اشحنلي علبتين شطة و فرجيني. و بيصور فيديو و هو عم يعبيلو العلبتين و يحطها بصندوق الشحن. ملايييييييين. لازم نخرج من الصندوق. و نحكي لغة اليوم. جماعة أسرار المهنة. نعيمًا. صدقني من الملايين تنين رح يغلبو حالهم و يطبخو الشطة بالبيت. و خلي المنافس يسرق. ما انا صار عندي براند. و الناس جاي عشان التجربة أكثر من الشطة يا سبايسي انت.

أبو شطة ممكن يكون من اهتماماته الجيمينچ. بس الها قناة تانية. مارح يخلص بوب جي بالفلفل ايه.

و هون لازم نطرح نقطة مهمة و الي هي المعرفة. قناة متل پيديا لرنا فرحات تتحدث عن ‏تدريب الأهل بتربية الاطفال و كل ما يتعلق بالموضوع. انا كمتابع للقناة بتوقع من رنا تعرف كل ما يجب معرفته عن الموضوع أو …. ركز بهاي النقطة كتير منيح…. معرفة المصادر الموثوقة للحصول على معلومات أكثر عن سؤال جديد في نفس الموضوع. أكيد ماحد في الكون بيعرف كل شي بكل الأوقات. و الرجوع الى المصادر و الكتب شيء ممتاز.

رنا بتحكي عن الافلام. و تأثيرها على التربية.

رنا بتحكي عن الطبخ. و تأثيره على التربية و العلاقات الاسرية.

رنا بتحكي عن ألعاب الفيديو. و تأثيرهم على عقل الطفل و علاقة الطفل مع الاهل. و هكذا.

شايفين عدة مواضيع تصب في إطار واحد.

ما رح تفتح قناة رنا و تشوف تحليلها لكولكشن المكياج الجديدة لخريف و شتاء الربيع الصيفي.

تمام؟ و لليوم سلام.