'oQSon

DotlhwIj vIrIch neH.

lItlhejjaj Surma''a'

DotlhwIj vIrIch neH.

tagha' SIqa'ghoDaq taDbe' bIQ! DaHjaj wa'vatlh chorghmaH chorgh gheH 'ej 'IH chal!

wa'leS muD Duj vItIj 'ej San valentIn jaj bangwI' vImer 'e' vIHech.

muSeyqu'moHbe'bej ghojmeH mIwwIj chu'....'ej qatlh reH lupwI' mIr jen mangghaDaq jIqon jay'?

jaj wa' pov yotlhDaq jIyIttaH. loQ SIS 'a jIyIQqu'choHbe'. pay' chomer, Sor mach. tawHom retlhDaq bIQamtaH. loQ vIH bartIqlIj SuSHommo'. bIrun. lang Qechjem'a'lIj. tlhoS qatu'be', bImachqu'mo'; San'emDer'a' Darur. bImach 'a bIngo'qu'law'. ben 'ar Dapochlu'pu'? jISovbe'. bISubHa'mo' jIyIt 'e' vImev 'ej qaqelchoH. SoHvaD jIjatlh « naDev jIba' 'e' Dachaw''a'? » loQ vIHqa' bartIqlIj. « HIja' » 'oS SawlayHeylIj 'e' vI'Ir vaj SoH retlhDaq jIba'choH. DorDI' pov SoH retlhDaq jIba'taH. nItebHa' tlhom chum wIbej majatlhbe'taHvIS. HurghDI' chal qavan 'ej juHwIj vIchegh.

jaj veb qaSuchqa'be' 'a qaqawtaH, Sor mach. qaqIHmo' tagha' ghanHa'law' qo'. tam rewve'. waSHa' Hoch. poymar Da'oSlaw'mo' chovuQtaH. Dubopbogh De' vIqelchoH. nuq 'oH munglIj'e'? latlh SorDaq bIHop. chay' DaqlIjDaq pum raS'ISlIj? jISIv. puv'a'? chagh'a' lengbogh bo'Degh? bIyItlaH'a'? chaq tawHom retlhDaq raS'IS mol yotlh vu'wI' 'ej bIwochchoH SoH neH. yotlhvetlh DaDab 'e' DatIv'a'? jISovbe'. latlh De' vISov vIneH pay' 'e' vItlhoj: nuq 'oH ponglIj'e'?

povjaj ram 'uQ vIvut HaSta jIH vIbejtaHvIS. Daj 'a lut mIr vIbejbogh vIbuSlaHchu'be'. pay' jIbaw'Ha'choH. jIQubchoH: bIyItlaHchugh, bIDach'a' yotlh vIcheghDI'? mu'IQmoH buSHachvetlh 'ej QIt vIHchoH ngawDeq luraQtaHbogh ghopDu'wIj. qatlh bIpotlhqu'? qatlh yabwIj DacharghtaH? rInDI' vutmeH mIw, no'laS pa'wIj HurghDaq quSlabwIjDaq jIba'. mumobmoH Daqvam. qa'wIj chImmoH. baghneQwIj vIwoH 'ej jISopchoH. po veb yaHwIj vIchegh.

loghjaj tagha' yaH vImejmeH 'eb vIjon qaStaHvIS megh lenwIj. yotlh vIghoS, meghwIj ngaSbogh buq vI'uchtaHvIS. yotlhlIj vIpawDI' SIbI' tawHomvetlh rapDaq qaghoS. qatu'DI' jImonqu'. bISaHtaH. jIbaw'Ha'meH pagh meq vIghaj DaH 'e' vIyajchu'. SoH tlhopDaq jIpawDI' qaghel « choqaw'a'? loSHu' nItebHa' tlhom chum wIbej. naDev jIba'qa' 'e' Dachaw''a'? DaHjaj Soj vIqem. qaStaH megh lenwIj. qubbID ngaj jIratlhlaHba' 'ach bInaHHa'qu', maqIHchuqDI' vaj jIchegh vIneHqu'. qay'be', bImob DaneHchugh. » pe'vIlHa' bIvIHqa'. choghovlaw'. qamuv 'e' Dachaw'law'. buqwIjvo' HIlel, tlhagh patat 'oQqar ngop je, 'epIl naH je vIteq. tlhoS HIlel vIchopDI', jIyev. qabuSchoH. jIjatlh « jIQoS. bISopbe' 'e' vIlIj. bISopchugh, vay' vIqem 'a...toH, jIQoS. qatuHmoH vIneHbe'. » qabaw'Ha'moHpu' 'e' vIHarchoHmo', jIbaw'Ha'choH je jIH. lup puS qubbID tlhIjchu'meH Ho'DoS mIt vInej, jItamtaHvIS. ghIq qech vIghaj. « toH! chaq SoHvaD vay' vIbonlaH! » buqwIj vIwoHqa' 'ej SIbI' 'oHvo' bIQ ngaSbogh mep bal vIlel.

« wejHu' SIS 'e' mev vaj ghaytan bI'oj 'e' vI'Ir! jIlugh'a'? » bIvIH. jImujbe'law'. « maj! vaj SoHvaD vInobqangbej! Hoch yItlhap! jIH'e', povam bIQ law' vItlhutlhpu'. bIQvam'e' vItlhutlh 'e' vIHechbe'chu'. » jIHu' 'ej qacholmeH 'uj puS vIlID. bal yuvtlhe' vIQeyHa'moH, ghIq SoHvaD vInob 'e' vInID. jImev. « va! ghopDu', nuj je Daghajbe'ba'! qoHna' vIDabej! 'oQqarlIjDaq vIlIch 'e' DamaS'a'? » bIvIH. 'oQqarlIjDaq bIQ'e' ngaSbogh vIlIch. jIqID 'e' vInID: « SoHDaq vIqang, qar'a'? » jIHagh. pe'vIl bartlIqlIj vIHmoH SuS. tIghla' DIrur! chImDI' bal, 'oHDaq yuvtlhe'Daj

vIlanqa' ghIq meghwIj vIchegh 'ej jIba'qa'. pe'vIl SojwIj vIyIv; quvyaH qab 'oHbej. pIj nIteb Hoch nay'meywIj vISop vaj jIchuSqu' jISoptaHvIS pIjHa' 'e' vItlhoj. qaSuj vIneHbe'mo' jIDochHa''eghmoH 'e' vInID.

'ach nom jISop 'ej jISoppu'DI' buqwIjDaq veQwIj, SojwIj chuv je vIlan 'ej nItebHa' muD pov wItIv. chalDaq wovtaH jul qu'. tuj jajvam pov 'a tlhoy tujbe'. rut qabmajDaq pep'en bIr DIjem 'ej vabDot rut jul tamghay tIH bot 'eng. 'ach DoqchoH DIrwIj 'e' vItlhojDI' jIjatlh « ghaytan DIr QanwI' taS vIqemnIS 'a DaHjaj qu' jul 'e' 'aqlu'pu'be'! Do'Ha'! 'ach qay'be'! DaH jImejnISqa'. yaHwIjDaq Qu' law' vIturnIStaH 'ej DaH jIcheghbe'chugh, jIpaSbe

jev. 'oqchu' bIQ Duj. Qom 'ej wanI' law' SIQ panloS 'a'ghen, jIv, jaq, 'ana'batIS tlhach pabwI', je.

 

 

 

 

       pujchoH 'ej HeghchoH raQpo' ghom bID jImqu'mo' Duj. Sot Hutvavchaj Hoch, porghchaj Hoch je lujaDlu'taHmo'. jach 'ej qoy'taH latlh bID. SolDeS luQIHlu' 'ej pIlghIm lughorlu' 'ej bIQ DujDaq chen Qargh tIn. vum vumlaHbogh nuvpu' 'ach yeq pagh 'ej ra' pagh. meHDaq loQ QaHlI' 'ana'batIS tlhach pabwI' qIpDI' DeghwI' QeH 'ej ravDaq pum 'ach qIpmo' DeghwI' pe'vIl tang 'ej bIQ Duj Dopvo' pum ghaH. bIQ Duj jeq pIlghIm 'ay' wItlhlu'pu'bogh 'ej 'uch 'ej 'oHDaq HuStaH. toDmeH qet jaq QaQ 'ej Salqa'meH QaH. QaHtaHvIS, DeghwI' tlhopDaq 'ej bIQ'a'Daq pum 'ach Hegh 'e' chaw' DeghwI' leghbe'chu'taHvIS.

       chol jIv 'ej qaStaHvIS wa' lup narghqa' pInDaj 'e' legh ghIq lughupqa' rIntaH yu'egh. toDmeH bIQ'a'Daq Sup neH 'a bot qangtlhIntej, panloS. bIQ'a'Daq HeghmeH 'ana'batIS tlhach pabwI'vam lISbon Daqav chenmoHlu'pu' 'e' tob. wanI'vam tobtaHvIS bIQ Duj cha' 'ay' luchevlu' 'ej tlhoS Hegh Hoch. yIntaH wej nuvpu' neH. Heghbe' panloS, jIv je. Hegh 'ana'batIS tlhach pabwI' quv 'e' chaw'bej DeghwI' qej'e' 'ach yIntaH je ghaH.

       bIQ'a' HeH jaH quvHa'wI' QaltaHvIS 'ej QuchtaHvIS 'ej pa' jaH je panloS, jIv je 'aytaHvIS 'ej Sor Hap 'ay' tIq lu'uchtaHvIS.

       relbe'choHDI', lISbon lujaH yIttaHvIS. Huch puS lughajtaH. jevqu'mo' Heghbe' 'ej Hegh ghungmo' 'e' lujunmeH Huchvetlh lulo'laH 'e' lutul.

       veng lupawDI', pInchaj Hegh luqawtaHvIS, Qom. DaqavDaq jenchoH 'ej ngonchoH bIQ 'ej rIjbogh bIQ Duj ghor bIQ. taw, tlhop je So' qul tut, tlhIch je cheqtaHvIS. Dej juH qach 'ej yoychoH bebchaj, qappamchaj je 'ej ghomHa' qappamchaj. wejnetlh nganpu' tap DI. Qup 'ej qan. loD lutu'lu' 'ej be' lutu'lu'.

       'uq 'ej mu'qaD bach DeghwI' ghIq jatlh « naDev vay' QapluH.»

       « nuq 'oH wanI'vam meq pup'e'? » jatlh panloS.

 

       « qo' jaj Qav 'oH jajvam'e' » jatlh jIv jachtaHvIS.

       SeH'eghchoHlaHbe' DeghwI' 'ej DI botlh ghoS qettaHvIS. Huch SammeH Hegh qaD 'ej Sam. chechchoH 'ej 'uHHa'qa'DI' 'opuHwI' naHHa' Sam 'ej juH qach Qaw'lu'bogh pIghDaq nga'chuqmeH poH DIl. Dech HeghtaHwI', lom je. 'ach tlhayDaj luH panloS.

       jatlh « jupwI', batlhHa' bIvang. 'u' meq Dayajbe'law'mo' bIwogh 'ej poHlIj Dalo'Ha'. »

jang latlh. jatlh « Hu'tegh! DeghwI' jIH 'ej batavya'Daq jIboghpu'. loSlogh nIpon vIleng 'ej loSlogh QIStoS me'cheD vIgho'. 'u' meq vISaHbe' jIH! »

       jIv rIQmoH pumbogh baSHom jej 'ej tawDaq QottaH 'ej ghaHDaq 'oHtaH DI'e'. panloSvaD jatlh « toH! HIq, vIychorgh je yIqem. jIHeghtaH. »

       jang panloS. jatlh « bIQomDI' DamernISlu'be'. chu'be'. DIS vorgh 'amerI'qa'Daq, lImaDaq jel je puH. rap wanI', gher'ID je. lIma, lISbon je bIngDaq no'negh ngaSbogh Qargh'a' tu'lu'bej. »

 

       « DuHqu'bej » jatlh jIv. « 'ach vIychorgh, HIq je vIpoQ jay' » jatlh.

       « DuH neH 'e' DaHar'a'? » jatlh panloS. « ngoD 'oH 'e' vItob» jatlh. vulchoH jIv 'ej Daqrab Sumvo' bIQ puS qem panloS.

       jaj veb pIghDaq Soj puS luSam 'ej HoSqa'meH luSop. ghIq taHbogh ngan luSonmeH vum. chaHvaD 'uQ QaQqu' lunob rewbe' toDta'bogh. qaStaHvIS Qugh ghu', nay' nIv noblu'be' 'ach tlhorghqu'. SoptaHvIS 'IQ Hoch. t

panloS, ghob pIn'a'Daj Deq, ghom jIv.

 

 

         loD vupmo' tIwqu' jIv. ghIjmo' loD tIw. vaj mIpHa'chu'wI'vamvaD cha' DeQ'e' nobpu'bogh jaq yuDHa', 'ana'batIS tlhach pabwI', nob. leghqu' mIpHa'chu'wI' 'ej SaQ. ghIq jIvDaq jop'egh 'ej 'uch 'e' nID. DoH jIv ghIjmo'. latlh mIpHa'chu'wI'vaD « toH! » jatlh mIpHa'chu'wI'. « panloSlI' DaQejbogh Daghovbe''a'? » jatlh.

jatlh jIv « nuqjatlh? pIn'a'wI' SoH'a'? DaQIHlu'law'pu'! qaSpu' nuq? qatlh jem'IH 'IHqu' DaDabbe'taH? pIv'a' qu'neyghon joH? pup ghaH; naghboch rur. »

jatlh panloS « jIHeghtaH! » mu'vetlh jatlhDI' panloS, 'ana'batIS tlhach pabwI' Sargh HuDyarDaq Dev jIv. pa' ghaHvaD tIr ngoghHom nob 'ej HoSqa'DI' panloS jatlh jIv : « vaj nuqDaq ghaHtaH qu'neyghon'e'? »

       jang panloS. « Hegh » jatlh.

mu'vammo' vulchoH jIv. Sargh HuDyarDaq wIbbogh vIychorgh non tu'lu' 'ej vulHa'qa'moHmeH lo' jupDaj. mInyoDDaj poSqa'moH.

« Hegh qu'neyghon! nIv'a' qo'vam? HeghmoHbogh rop yIngu'! jem'IH 'IHvo' mughImmo' mupupqu'taHvIS vavDaj, joH, Hegh'a'? » jatlh.

« ghobe' » jatlh panloS. « chorDaj pe' balgharya' negh wemchu'ta'DI'. Hub neHmo' joH, nachDaj lughor. be'nalDaj lulagh. jaSHa' ghojwI'wI' Do'Ha' QIH. jem'IH'e', ratlh pIgh neH. ratlh pagh tIr polmeH qach, pagh DI'raq, pagh Da'vI', pagh Sor je. 'ach bortaS chavlu'ta'. yoS SumDaq balgharya' joH jem'IH luQaw'ta' 'abarnganpu' » jatlh.

       mu'vetlh jatlhDI' vulqa' jIv. vulHa'qa'DI' 'ej De' ja'nISbogh ja'DI' ghaH, wanI'mey, gher'IDmeyDaj je qelchoH. nuq 'oH Hoch weSmeH panloS meq pup'e'?

« toH! » jatlh latlh. « muSHa'ghach 'oH: Humanpu' rachwI' 'oH muSHa'ghach'e'. 'u' choqtaH. Hoch jembogh yoq qa' 'oH muSHa'ghach'e'.

« toH » jatlh jIv. « jImuSHa'pu' jIH. tIq voDleH 'oH 'ej qa'maj qa' 'oH. 'ej jImuSHa'pu'mo' wa'logh neH vIchoplu' 'ej cha'maHlogh Sa'HutwIj pupqu'lu'. chay' qabchu'bogh gher'ID chenmoH wanI'vetlh 'IHqu'? »

jang panloS meqtaHvIS. jatlh « 'o jIv, wIj jup, paq'et Daqawbej. joHma' be'nal quv toy'. mu'uchtaHvIS QI'tu' vISuchlaw' 'ej wanI'vetlhmo' 'oy'qu'taHbogh ropvam vISIQ. ghaH ngej je ropvam 'ej ghaytan 'oHmo' Heghpu'. paq'etvaD ropvam nob bulvar valqu'. latlh nuvvo' Hev ghaH. ghaHvaD ropvam nob joH qan 'ej joH qanvaD nob Sargh lIghwI' wey ra'wI' 'ej ghaHvaD nob toy'wI' Qup 'ej toy'wI' QupvaD nob jeSu'It tlhach pabwI'. Dujmey law' chIjpu'be' 'ach QIStov qolombuS tlhejwI'vo' Hev ghaH. jIH'e', paghvaD vInob jIHeghtaHmo'. »

« 'o panloS! » jatlh jIv, jachtaHvIS. « taQbej ngejchoHghach mIrvetlh! mung 'oH'a' mIghchu'wI''e'? » jatlh.

jang pIn'a' « ghobe' » jatlh. « qo' nIvDaq 'ut wanI'vam. 'utbej. qo' but nab'a' qaD ropvam 'ach 'amerI'qa'Daq, wa' 'ambayDaq Hoch puq poHvam bechmoHbogh ropvam'e' Suqbe'chugh qolombuS vaj yuch, rItlh chu' je DIghajbe'. yuweyvamDaq neH qangtlhIn yol lutu'lu'. jaSHa' yuweyvamDaq neH ropvam tu'lu' 'e' yIqaw je. wej turIqya'Daq, baratDaq, 'Ir'anDaq, jungwoqDaq, taylanDaq je tu'lu'. 'ach meq pupmo' vatlh puS nem SepvetlhDaq tu'lu' je. yuweyvamDaq Ser vItlh chenmoH. mangghomDaq potlhqu'. wo' SanvaD Suv negh. yuDHa' 'ej nenmoHlu'chu'. wejnetlh negh ghajbogh mangghom'e' qaDDI' latlh wejnetlh negh ghajbogh mangghom'e' ghaytan cha' mangghomvetlhDaq cha'netlh QaS ngejlu'pu'. »

« Dojbej » jatlh jIv. « 'ach qavornIS » jatlh.

« 'ach jIpIvqa'laH'a'? » tlhob panloS. « vabDot wa' DeQ vIghajbe', jupwI', 'ej qo'vam HochDaq reghmoHlu'be' qoj Say''eghmoHlu'be' DIllube'chugh pagh DIlq

balgharya'nganvo' Haw' jIv.

 

 

         cha' mangghom 'IH law' Hoch 'IH puS. cha' mangghom mor law' Hoch mor puS. cha' mangghom val law' Hoch val puS. cha' mangghom Qur nIv law' Hoch nIv puS. 'eychu' gheb, Dov'agh, chuS'ugh, 'In, tal je. not ghe'torDaq muchvam'e' rurbogh vay' muchlu'. qaSDI' may' cha' DopDaq javSaD loDpu' pummoH talmey. ghIq qo' nIv ghor ngejbogh HutSaD quvHa'wI''e', wa'netlh quvHa'wI''e' ghap QIH beH bachwI'. Hegh 'opSaD loD, beH yanmo'.

       ghaytan Heghpu' wejnetlh QaS. qaStaHvIS tayHa'bogh HoH'a' jaq, So''eghchu' jIv; qangtlhIntej rur.

       tagha' Qun tlho'meH bomchoH cha' mangghom 'ej wanI'mey, gher'IDchaj je HaDmeH 'eb jon jIv. HeghwI', HeghtaHwI' je Dojmey juS 'ej vengHom Sum paw. meQlu'pu'. 'abar vengHom 'oH 'ej chutqoq taymo' lumeQpu' balgharya'ngan. naDev HeghtaH be' Hughchaj luSIjlu'pu'mo' 'e' lubej loD lurIghmoHlu'pu'bogh. 'ej reghbogh noqchajDaq puqchaj 'uchtaH. be' Qup wempu' 'ej chorDu'chaj pe'pu' Sub puS. QIt rech HeghtaHvIS. jach latlhpu'. chaH HoH vay' 'e' lupoQ. yavDaq 'uS, DeS je lupe'lu'bogh retlhDaq bIHtaH QoghIjDu''e'.

       nom latlh vengHom jaH jIv qetqu'taHvIS. balgharya' vengHom 'oH 'ej jaSHa' luQaw'ta' 'abar Subpu'. vIHtaHbogh ghIv gho'taHvIS 'ej pIgh juStaHvIS yIt jIv 'ej tagha' may' mIch mej. lo' law' buqDajDaq Soj qengtaH 'ej qu'neyghon joH qawtaH yIttaHvIS. ne'Derlan pawDI' Soj ghajbe'choH 'ach pa' mIp Hoch 'ej QIStoS lalDan pabwI' chaH Hoch ne'Derlanganpu''e' ja' Hoch. vaj pa' Qorghlu' 'e' Honbe'. joH lururlaw' ne'Derlanganpu', jIv ghImbe'pu'chugh joH pupqu'taHvIS SaHmo' qu'neyghon 'IH.

       Huch puS SuqmeH Saghqu'bogh ghot qoy'. jang ghaH. jatlh « bIqoy'taHchugh bIghHa'Daq Daweghlu'bej » 'ej ghaHvaD yInmeH mIw QIjlu'.

       ghIq loD tu'lu'. qaStaHvIS wa' rep ghom'a'vaD varHa'taHghach rIchtaH. ghoS jIv 'ej ghaHvaD jatlhchoH. leghqu' jatlhwI''a', muSlaw'taHvIS 'ej jatlh « qatlh naDev SoHtaH? qen wanI' potlh DaqIm'a'? »

jang jIv. « gher'ID tu'lu'be', wanI' tu'lu'be'chugh » jatlh nguqHa'taHvIS. « rarchuq Hoch net Sov vaj chen'eghmoHchu' Hoch 'ej nIv Hoch. qu'neyghon joH juH qachvo' vIghImnISlu' 'ej beH yanHom lo'meH mIw vIghojnIS 'ej tIr ngogh vISuqmeH jIqoy'nIS. vISuqDI' jIqoy'be'choH. qaSnIS Hoch wanI'vam! » jatlh. jatlh jatlhwI''a' « jupwI', mIghchu'wI''a'na' ghaH qato'lIyq tlhach'a' DevwI''a''e' 'e' DaHar'a'? »

« wej 'e' vIghoj » jatlh jIv. « 'ach teHchugh pagh teHbe'chugh tIr ngogh vIHutlhtaH » jatlh.

« tIr ngogh DaSop 'e' Daqotlhbe'» jatlh jatlhwI''a'. «naDevvo' yIghoS, Qovpatlh. naDevvo' yIghoS, mIpHa'chu'wI'. bIyIntaHvIS qaleghqa' vIneHbe' » jatlh.

Qorwagh vegh jatlhwI''a' be'nal nach 'ej mIghchu' qato'lIy tlhach'a' DevwI''a' 'e' Harbe'bogh nuv'e' leghDI' nachDajDaq turmIq qang. Hu'tegh! tlhoy be'pu' nongmoH lalDan!

       vInDa'Daj, bo Hutlhbogh 'ej qa' ghajbogh yoq, QIH jatlhwI''a' quv, be'nalDaj je 'e' legh loD. not bIQ tay SIQ loDvetlh, 'ana'batIS tlhach pabwI' ghaHmo'. juHDajDaq jIv qem 'ej Say'moH 'ej ghaHvaD tIr ngogh, HIq je, cha' DeQ je nob 'ej vabDot ne'Derlan tlhIm laSvarghDajDaq ghaHvaD 'Ir'an tlhIm mutlhmeH mIw QIj. tlho' jIv 'ej jach. jatlh « vIt panloS jatlhDI' ! jIQuchqa'! SoH varHa' law' wep qIj tuQbogh loDvetlh'e', be'nalDaj je puS.»

       jaj veb yIttaHvIS mIpHa'wI' ghom. ghIchDajDaq Dat ghul lutu'lu' 'ej Doy'qu'law' mInDu'Daj 'ej raghtaH ghIchDaj. job nujDaj 'ej qIj Ho'Du'Daj 'ej jatlh Hugh neH lo'taHvIS. tuSqu'mo' bechtaH 'ej jatlh 'e' nIDDI' wa' Ho' tlhIS.

balgharya'ngan Such jIv.

 

 

         QI'tu'vo' jIv ghImlu'mo' qaStaHvIS poH nI' ve'Ha' 'ej ghochDaj Sovbe'taHvIS 'ej SaQtaHvIS leng. chal leghmeH nachDaj vIHmoH ghIq joH 'IHqu' ngaSbogh jem'IH 'IHqu''e' lurgh leghmeH tlhe'. 'uQ Sopbe' 'ach yotlh botlhDaq, cha' taSmanHom jojDaq QongchoH. peDqu'. jaj veb vengHom veb leng jemHa'chu'taHvIS. valDe'bergh'ovtIrar'IbDIqDor'Iv 'oH vengHom pong'e'. Huch ghajbe' vaj HeghtaH ghungchu'mo' 'ej Doy'chu'mo'. tach lojmIt tlhopDaq yIt 'e' mev 'IQtaHvIS. lutu' Sut SuD tuQtaHbogh cha' loD'e'.

« vInDa' » jatlh wa'. « pa' loDHom HoSqu' tu'lu'. 'ej 'uj yap 'abbej» jatlh. jIv lughoS 'ej ghaHvaD megh lunobqang ja' DochHa'qu'taHvIS.

« joHwI', » jatlh jIv tlho' 'aghtaHvIS. « tuquvmoH 'ach ghogh'otwIj vIDIlmeH Huch vIHutlh » jatlh.

       ghaHvaD jatlh wa' « toH ! jupwI' ! tu'qomlIjmo' pagh DaDIlnIS ! loS 'uj Da'ab qar'a' ? » jatlh.

« HIja', joHwI'. qar. » jatlh.

« vaj yIba' ! SoHvaD Soj wIpeSbe' neH 'ach Huch DaHutlh not 'e' wIcherghqang je. boQchuqmeH loD luchenmoHlu' » jatlh.

« Sulugh » jatlh jIv. « panloS paQDI'norgh rur qangtlhInraj 'ej nIv Hoch 'e' vItu'» jatlh.

DarSeq puS lajmeH jIv 'e' qap loDpu' 'ej tlhap 'ej ghogh'otDaj DIl 'e' nID 'ach 'e' luchaw'be' loDpu'. ba'choH Hoch.

« vay' DaSaHqu''a' ? » tlhob wa'.

jang jIv. « HISlaH ! qu'neyghon joH vISaHqu' ! » jatlh.

« bIyajHa' » jatlh wa' loD. « latlh vay' DaSaH'a' ? balgharya' voDleH DaSaH'a' ? maSIv » jatlh.

« not vIleghmo' vISaHbe'chu' » jatlh jIv.

« nuqjatlh ? voDleH Dunqu' ghaH 'ej wInaDmeH matlhutlhnIS » jatlh wa' loD.

« luq, jItlhutlhqangchu' ! » jatlh jIv 'ej tlhutlh.

ghaHvaD « yapbej » jatlh cha' loD. « balgharya'ngan QutlhwI', HubwI', Sub je SoH. SanlIj wIvlu'pu' ; ngaQ lojmIt. ngay' Dachavbej » jatlh.

       SIbI' qamDu'DajDaq DaSpu' lan loDpu' 'ej wey'a'DajDaq luDev. poSDaq tlhe'moHlu' 'ej nIHDaq tlhe'moHlu'. nIch vevmeH naQ pep 'ej nIch vevmeH naQ lelHa' 'ej puS 'ej nom yItchoH 'ej wejmaH wejlogh moq vay' naQ lo'taHvIS. jaj veb qeqchoHchu' 'ej cha'maHlogh neH moqlu'. jaj veb wa'maHlogh neH moqlu' 'ej mang pup ghaH 'e' Har latlh negh.

       yay' jIv. chay' Sub mojpu'? wa' jaj qaStaHvIS qImroq yIQ yIt 'e' wuq. He wanDaq ghoStaH. bel'eghmoHmeH 'uSchaj lo'laHmo' Do'qu' Humanpu', Ha'DIbaH je 'e' Har. vagh qelI'qam neH lIDta' lujonDI' vagh 'uj 'abbogh loS latlh Sub'e'. ghopDaj bagh 'ej wutlh pa'Daq luqem. Saghqu'taHvIS ghellu'. jatlhlu': « wejmaH javlogh nImoq Hoch wey'a' mongpu' DaneH'a' pagh wa'maH cha'logh QoghIjlIjDaq mabach DaneH'a' ? »

       jangDI', tlhab Hoch wIvwI' 'ej cha' wIvvetlh neHbe' ja' neH 'a wIvnIS. vaj nob'e' nobbogh Qun 'oHmo' tlhab'e' wejmaH javlogh moqlu' naQ lo'lu'taHvIS 'e' maS 'e' wuq. wey'a' toy' cha'SaD loD vaj loSSaDlogh moqnISlu' naQ lo'lu'taHvIS 'e' SIQnIS. DubDajDaq Dat SomrawDaj Hutvavchaj je So'Ha' wanI'vam. moqmeH mIw wejDIch ta'ruplu'taHvIS jegh jIv 'ej pung poQ. qabDajDaq bachlu' 'e' poQ. HeQ negh 'ej mInDaj luvellu' 'ej lutormoH. ngugh paw balgharya' voDleH 'ej HeSwI' HeS bopbogh De' ghoj neH. qangtlhIntej Qup ghaH 'e' yaj, wIgh ghaHmo' voDleH 'ej jIv bopbogh De' ghojmo'. qo'vam SubDaq jIvqu'bej, DI'ruj tej ghaHmo' vaj ghaHvaD pung nob 'e' wuq 'ej reH Hoch De' chu' ghItlhDaq pungvam naDlu'taH.

       DorDI' wej Hogh jIv vorta' HaqwI' yoH. vormeH SonmoHbogh ngIS'e' lo