第一擺幫丈人丈姆佮阮阿爸阿母申請桃園市的金婚紀念是佇民國107年，彼當陣阮已經佇桃園蹛十偌冬矣，第一擺知影桃園市有這款老人福利。毋知是毋是彼年的年底有里長選舉？有一工，跟里長誠麻吉的鄰長無先跟阮約，就臨時提報名單來揣阮，鄰長講：「較早這款的結婚紀念攏無咧分錢，今年開始有通領二千箍的禮券，看恁欲幫序大人申請無？」寫報名單就有錢通領，有這款的好空，咱是好市民，當然愛共用一下。

申請單寫了，愛閣附已經結婚五十冬以上的證明，鄰長講提大囝抑是大查某囝的身份證影本，只要是民國五十七年前出世的就會使。阮翁仔某攏是五十六年次的，閣攏排第三，所以直接用阮兩人的身份證就無問題。鄰長共資料送出去了，佇彼年的重陽節進前，里長就親身提兩份獎牌跟禮券來阮兜頒獎兼翕相，順紲為伊年底的連任搝票。看到獎牌的時陣，我共里長笑講：「年底你一定會閣當選，你看，你里民服務的效率真正有夠好的啦！獎牌頂懸印的日子猶未到咧，你就隨送來予阮，這毋若像今馬上流行的穿越劇仝款！」。果然彼年年底，里長嘛有順利當選連任。

候選人共政府的福利講予選民知，幫民眾申請，建立好感，為伊的選舉拍拼搝票，這是足自然的代誌，但嘛是因為我對政治人物有這款印象，紲無去想講，無定著無選舉的時陣，里長嘛攏會固定做遮的里民服務；區公所的公務人員，是毋是仝款固定會送這些老人資料予里長，消化老人福利的預算？無鄰長哪會有阮兜老歲仔的資料，提醒我會使幫序大人申請咧？

彼年共金牌跟禮券提去予兩爿的序大人，怹對這份意外的獎品攏感覺誠歡喜。丈人丈姆講怹是民國四十八年結婚的，按呢閣一年毋就有六十冬矣！但丈人是先結婚才去做兵，做三年兵轉來了才生阮大舅仔，用阮大舅仔的身份證無法度證明怹結婚六十冬。所以佇108年的年初，丈人轉去嘉義就特別走一逝區公所，去請古早的戶口謄本予我。頂一年才領過結婚五十冬的金牌，隔轉年就隨會使閣領六十冬的金牌，市長攏是阿燦，若毋知這過程的人，看這兩塊金牌愛差十年，會叫是阿燦的桃園市長做有夠久的。

丈人丈姆六十年鑽石婚紀念，我愛家己去區公所申請，因為頂一年附的證明，看袂出怹隨會使閣請六十年的。申請了本來叫是重陽節進前，里長就會共獎牌提來分，敲電話予里長，里長講無看到呢！聽候到重陽節過兩工了，里長才敲電話來講獎牌禮券落來矣，是里幹事共人囥到袂記持！彼時陣，我心內的OS是「選舉前選舉後差誠濟呢！」。 （ https://is.gd/oDkjHS ）

今年閣替阮阿爸阿母申請六十冬鑽石婚紀念才知，區公所是按怎記錄遮的結婚資料。怹是共第一擺申請金婚紀念附的證明，記做結婚五十冬的年度。我用阮翁仔某的身分證去申請，所以阮阿爸阿母跟丈人丈姆就予人記做民國106年結婚五十冬，116年的時陣，怹才會閣出現佇里長收到的鑽石婚紀念的名單內底。今年去提獎牌的時陣，里長姆仔才會直直共我問講：「恁毋是ui我遮去申請的，名單內底就無恁序大人，恁哪會通知影去申請咧？」。

今年無里長的選舉，獎牌嘛佇重陽節進前就提予民眾，按呢看起來應該是我對政治人物的偏見，才會佇彼時陣認為，里長佇選舉前選舉後的服務態度差真濟，伊講是里幹事共物件囥到袂記持應該是事實，毋是應付我的藉口才對。