怹阿母見講就是講過去，伊按怎去予人虐待、誤解、冤枉，彼攏已經是過去幾偌十冬前的代誌矣。跟伊蹛鬥陣的大查某囝，無嫁娶嘛退休矣，不想欲聽這若錄音機咧放一千O一擺的錄音帶仝款，就會用無啥好的口氣，想欲阻擋怹母仔繼續講落去。

怹母仔就會感慨講怹大查某囝「妳干焦攏會為別人咧講我無好啦！無睬我佇厝內煮予妳食，自細漢煮到你退休！」

「我退休了毋是仝款佇厝內煮予恁兩個食！」大查某囝隨共應轉去。怹母仔嘛無想欲諍輸人「阿無妳才煮幾年爾！敢會比之！」

大女兒愈聽愈氣，決定欲放絕招「妳退休了敢有煮過一頓予阿公食？無嘛！妳閣敢講我！我到今馬閣有煮予恁食咧！」

三不五時會轉去厝內坐的細漢查某囝，不想欲逐改轉來就聽怹咧冤家，就應怹姐仔的喙講「妳按呢講無公平喔！媽仔是予阿公阿嬸苦毒，才會自少年就綴爸仔離開下港起來北部，毋是伊無欲煮予阿公食！」

「我就是刁工欲塞媽仔的喙！家己做袂到閣敢講別人！是按怎我就愛予媽仔情緒勒索！」大查某囝感覺家己真有道理。

「恁若蹛鬥陣定定會冤家，無妳就搬出去蹛，莫規工綁作伙！」細漢查某囝感覺人佮人之間，會使閬淡薄仔縫，日子會較好過。

「按呢誰欲煮予怹兩個食？無恁轉來顧怹兩個，逐家輪流顧，恁就知影媽仔有偌煩！爸仔講話有夠大聲，雷又多，動不動就會踩到！無佇厝內顧怹兩個的人，莫磕袂著就講顧的人做了無好啦！無恁轉來顧啦！」大查某囝主張佇邊仔無咧照顧的人應該尊重照顧的人。

怹爸坐佇邊仔聽了感覺足無辜矣，莫名奇妙去予銃子拍到，嘛用伊的旺聲丹田參戰「我是有啥物雷？妳才試看覓啦，人攏會老，等妳食到阮這款歲數妳就知！」「恁媽仔就臭耳聾閣兼青盲牛毋捌字，妳管待伊去講啥！我攏共當做痟的！」怹爸仔聽了真煩，無想欲為佗一爿，兩爿攏拍五十大板。

唉！明明是最親的人，就算講無動跤動手，語言暴力對心的傷害，無定著比出手相拍閣較大啊！