三、四個五十外偌歲的學生，想欲招一工去揣怹兩班已經七十歲的小學老師開講。本來是差不多逐年攏會去一遍，新冠流行的這兩三冬內，紲一遍攏毋捌去過。跟查埔老師講了是無問題，嘛約好時間矣，但較晚些時陣紲換查某老師敲line來講，這站仔伊的跤較不方便，有一跤的跤頭趺是第二改開刀，醫生講愛較細膩的，可能愛聽候到明年初，才來相揣會較好。

老師怹這家伙仔，猶閣感覺外口的新冠病毒誠厚，尤其是怹兩個查某囝，足煩惱老歲仔若予人穢到新冠病毒會足吃力矣，所以是共怹兩個老的顧牢牢。老師怹兜跟阮兜仝款，攏無去注新冠的預防射。對我來講，預防射是無效的，用咱家己的免疫系統來保護就有夠用矣，已經99%以上得過的人攏是輕症的病毒，是有啥物通好驚的？但老師怹除了感覺預防射對人體並無好處之外，嘛對家己的免疫系統無啥有信心。老師講怹兜到今馬，猶攏無欲去外口的餐廳共人鬥陣食飯。我知影佇疫情管制上嚴的時陣，怹兜遐兩個少年的，若有欲去外口去入，一定叫計程車專車接送；轉去到厝裡進前，嘛攏愛用酒精共全身軀噴到齊齊才會入去。

這款對看袂到的病毒，傷過頭驚惶的心理現象，跟信神拜拜的宗教仝款，咱袂使用咱家己的信仰，去講別人是毋對的。雖然我跟老師解釋過，看咱政府的統計資料就知，自以早到旦，佇台灣逐禮拜攏差不多有五六百的人，因為流感跟肺炎過身，其中五十歲以上跟五十歲以下的人數，差不多有十倍的差額，這跟今馬的新冠肺炎仝款，是按怎較早咱就袂煩惱，今馬就會？

跟序大人蹛做伙的囡仔大漢了，若做序大人的已經退休矣，換囡仔咧趁錢飼家的時陣，序大人愛有一個覺悟，有可能這個家負責發號施令的一家之長已經換人咧做矣，序大人毋通閣納權納牢牢，共囡仔怹當作猶細漢，無欲聽怹咧講啥，攏有家己的主張，按呢一定會拍歹關係。看阮大姨仔跟阮丈人丈姆規工咧答喙鼓就知。所以，我知影跟兩個查某囝蹛做伙是老師怹兩個老的，毋是阮遮的學生仔。若綴學生仔出來食一頓飯，會予老師怹佇怹兜歹過日，按呢怹甘願莫出門，怹知影查某囝按呢做是為怹好，怹愛聽少年人的話。這是老師怹欲維持有好的家庭氣氛所做的，對的決定，阮遮做學生仔的就無欲共勉強矣！

看老師怹兜序大人跟少年人會使遐爾仔互相體諒，互相牽成對方的愛，做學生的就來唱一條「牽成阮的愛」來祝福老師，跤頭趺緊好，阮遮的老學生才會使去揣怹兩個老的食飯開講！

# https://youtu.be/hyD8URcwuX0

=======================

牽成阮的愛

作詞：李坤城/王武雄

作曲：羅大佑

有時過路 有時做夢 予阮想半天

前世姻緣 夢中做伴 醒來無半項

啥物時陣 啥物心思 啥款的思戀

褪色的美夢 浮踮在腦海 總是彼個人

有時甜蜜 有時苦痛 人生一齣戲

台頂搬戲 台跤看戲 替換無了時

彼時快樂 今日悲傷 啥人會懷疑

過時的空虛 鬱卒的春天 猶原膏膏纏

茫茫渺渺 思思念念 夜夜地等待

到底有啥人 替阮來安排 牽成阮的愛

有人孤單 有人幸福 命運天注定

人生宛然 雲海煙霧 茫茫無路行

有緣做陣 無緣做堆 到底是按怎

攑頭向月娘 照著阮心聲 只有伊知影

茫茫渺渺 思思念念 夜夜地等待

到底有啥人 替阮來安排 牽成阮的愛

有人孤單 有人幸福 命運天注定

人生宛然 雲海煙霧 茫茫無路行

有緣做陣 無緣做堆 到底是按怎

攑頭向月娘 照著阮心聲 只有伊知影

攑頭向月娘 照著阮心聲 只有伊知影