Kotar o 2001 bers o kraljo e Svedosko rodol love kotar o stato te avol maj but ando budjeti e kraljeske khereske, savo ane palune 10 bersh akija cifra barilji dji ke 26 miljionija krune. Numa ano sa jekh vreme o Carl XVI Gustaf njerisrad pe buchenca 134 miljionija krune. Hramol avdive e gazeta DN savi kerda jekh rodipe pe ljeski ekonomia. O Regeringo nominiringja pandž pilot komune baši strategia e romane inkludiriba odola si o Götöborg, Helsingborg, Linköping, Luleå thaj o Malmö. Ama na but roma džanena kaj lengere diza ulje pilot komune, thaj na djanen sar te ljen zutipe. Roma katar i Svedska, save but bersh palpalal alje kotar o Balkan, phenen so gindinen pe odova so mangen te den viza e themenge kotar o Balkan. Akava kurko ande but than ano Svedo e chavore si khere jekh drago kurko "höslov". Amen kamlam te djana so von keren kana si khere.