#508 Gervigreind á fjármálamarkaði

Gervigreindin vanmetur verðmæti Alphabet. Það er álit Arnbjarnar Ingimundarsonar, framkvæmdastjóra Gnitaness fjárfestinga, sem ákvað að prófa sig áfram með að láta Gemini og Grok framkvæma verðmat á bandaríska tæknifyrirtækinu fyrir sig.

Niðurstaðan var að bæði mállíkönin álitu rétt verð hlutabréf fyrirtækisins vera nokkuð langt fyrir neðan núverandi verð (sem hefur reyndar hækkað um rúm 65% á árinu). Tilgangur Arnbjarnar var að fá annað sjónarhorn á það hvort Gnitaness ætti að selja bréf og innleysa hagnað af fjárfestingu sinni í Alphabet eða ekki. Hann telur að gervigreindin vanmeti líklega mögulegar framtíðartekjur fyrirtækisins en það sé hins vegar, líkt og önnur fyrirtæki í S&P500 vísitölunni, orðið ansi hátt verðlagt.

Arnbjörn birti helstu niðurstöður verðmats gervigreindarinnar á Linkedin síðu sinni og við fengum hann í Ræðum það… til að ræða aðeins um áhrif gervigreindar á fjármálamarkaði við Iðunni Hafsteinsdóttur sérfræðing hjá Stefni og Alexander Hjálmarsson hjá Akk greiningu.

Rætt var um hvernig gervigreindin nýtist í störfum á fjármálamarkaði og Iðunn minnti á að fyrstu viðbrögð stærstu banka heims við því þegar gervigreindarlíkönin komu fram árið 2023 var að banna notkun þeirra í rekstrinum (m.a. af ótta við leka á upplýsingum). Enginn í viðmælendahópnum taldi hægt að treysta gervigreindinni fyrir fjárfestingarákvörðunum en að hægt sé að spara sér mikla handavinnu, ekki síst við að sía út fjárfestingarkosti. Arnbjörn sagðist ekki vinna minna vegna gervigreindarinnar heldur frekar meira því hann sé svo spenntur yfir öllum möguleikunum sem hún opni. Sérstaklega sé Gemini 3 líkanið frá Google gott tól að hans mati. Þá er Open AI afar óþjált nafn að mati Arnbjarnar sem telur að samkeppnisaðilar fyrirtækisins muni njóta þess að geta nýtt aðrar lausnir til að ná fólki í að nota þeirra gervigreind. Nokkuð sem Open AI hafi ekki þó að fyrirtækið sé stærsta brandið á meðal almennings sem stendur.

Rætt var í þættinum um líklega kólnun á fasteignamarkaði og hvort heimilin yrðu fyrir skakkaföllum eða eingöngu verktakar og fjármögnunaraðilar. Alexander taldi að vaxtalækkun kæmi þar á móti ef svo færi að staðan yrði mjög svört.

Fjallað var um mögulegar skráningar í Kauphöll á næstunni og efnahagsútlitið almennt. Arnbjörn hefur áhyggjur af fjölgun neikvæðra frétta af efnahagslífinu og aukningu atvinnuleysis.

Rætt var um andbyr gegn sjálfbærum fjárfestingum og ólíka nálgun evrópskra og bandarískra stofnanafjárfesta í þeim málum. Iðunn sagði frá því að næststærsti lífeyrissjóðurinn í Hollandi hafi verið að fara úr stýringu hjá Blackrock eftir áratuga samstarf á dögunum og þá vegna stefnubreytingar sjóðastýringarfyrirtækisins í sjálfbærnimálum.

Þá var rætt um fjárfestingar Íslendinga í landeldi og hvort þær væru mögulega offjárfesting, líkt og talað er um að eigi sér stað í gervigreindarfyrirtækjum. Alexander taldi svo ekki vera. Ljóst væri að auðvelt yrði að selja afurðir landeldisins en óvissan lægi í uppbyggingunni sjálfri og hvernig ræktunin muni ganga.

Tenglar á nokkra hluti sem minnst var á í þættinum

Viðtal CNBC við Marc Rowan, forstjóra Apollo um minni þörf á því að fyrirtæki séu skráð á markað: https://www.cnbc.com/video/2025/09/02/inside-alts-apollo-ceo-marc-rowan.html

Frétt um mögulega skráningu Space X á næsta ári: https://www.bloomberg.com/news/articles/2025-12-13/spacex-sets-insider-share-deal-at-about-800-billion-valuation?srnd=homepage-europe

Viðtal Alexanders við Heiðar Guðjónsson: https://open.spotify.com/episode/3TSRJxgmmb3aDniFEIMDDf?si=64b468b6ae21464d

————

Við erum líka á https://raedumthad.substack.com

Ræðum það… er spjallþáttur þar sem rætt er um efnahagsmál, viðskipti, stjórnun og samskipti.

Þátturinn er í boði Góðra samskipta* og hefur komið út reglulega frá árinu 2020. Stjórnandi er Andrés Jónsson

(*)Efnistök hlaðvarpsins eru óháð verkefnum Góðra samskipta á hverjum tíma. Við val á umræðuefnum og gestum þáttarins forðumst við alla hagsmunaárekstra.

Ekki ákjósanleg staða að sömu aðilar eigi alla íslensku einkabankanna

Í sjöunda þætti af fimmtu seríu Ræðum það… er rætt um eignarhald íslensku einkabankanna. Gylfi Magnússon, hagfræðingur og prófessor við viðskiptadeild HÍ, fer yfir þá staðreynd að þrír stærstu lífeyrissjóðirnir eigi alla einkabankanna þrjá, Arion banka, Íslandsbanka og Kviku banka. Það sé ekki ákjósanlegt þar sem það geti hamlað hvata þeirra til að keppa innbyrðis. 

Sama eignarmynstur er í flestum skráðra félaga á Íslandi en mörgum þeirra er samt í raun stýrt af hópi einkafjárfesta sem eiga á bilinu 10-20%. Rætt er um að það geti einnig verið jákvætt og geti vegið upp á móti áhrifum af sameiginlegu eignarhaldi stofnanafjárfestanna. 

Gylfi er ekki sannfærður um að samruni Kviku og Arion banka verði leyfður, líklegra sé að samruni SKAGA og einhvers banka, svo sem Íslandsbanka, fengi gott veður hjá Samkeppniseftirlitinu. Hann telur jafnframt ekki að ný ríkisstjórn sé líkleg til að gera neinar áherslurbreytingar á regluverki samkeppniseftirlits eða fjármálamarkaðarins heldur haldi samfellu frá síðustu ríkisstjórn.

Litlar líkur séu á að Landsbankinn verði seldur í tíð núverandi ríkisstjórnar en það geti orðið eftir einhverjar kosningar með ólíku ríkisstjórnarmynstri. Þá var því velt upp hvort Bjarni Ármannsson, fyrrverandi bankastjóri Íslandsbanka hyggist verða leiðandi hluthafi í bankanum eftir mögulega sameiningu Íslandsbanka og SKAGA.

Að lokum er rætt um óvænt og hörð viðbrögð Ríkisendurskoðanda við gagnrýni Endurskoðunarráðs á að starfsfólk embættisins sé að kvitta upp á reikninga ríkisfyrirtækja án löggildingar.

1) Grein um sameiginlegt eignarhald fyrirtækja í Kauphöll Íslands: https://opinvisindi.is/items/598a1221-c3e6-418c-9042-75ae2113077e

————

Ræðum það… er atvinnulífsspjallþáttur þar sem rætt er um efnahagsmál, viðskipti, stjórnun og samskipti frá ýmsum hliðum.

Þátturinn er í boði Góðra samskipta* og hefur komið út reglulega frá árinu 2020. Stjórnandi er Andrés Jónsson

(*)Efnistök hlaðvarpsins eru óháð verkefnum Góðra samskipta á hverjum tíma. Við val á umræðuefnum og gestum þáttarins forðumst við alla hagsmunaárekstra. Komi fyrir að um bein hagsmunatengsl sé að ræða við gesti þá er það ávallt upplýst í upphafi þáttar.

Sterkur en ekki harður, ríkur en vill ekki að lífið sé of létt

Reynir Grétarsson, stofnandi Creditinfo og höfundur sjálfsævisögunnar Fjórar árstíðir, er gestur sjötta þáttar í fimmtu seríu Ræðum það...

Rætt er um karlmennsku, syndir feðranna, viðhorf kynslóðanna, gildi peninga og hvaða áhrif það hafi að segja fólki hvernig manni raunverulega gengur, bæði á orðsporið, eigin líðan og mögulega líðan annarra sem tengja. Bókin rokselst um þessar mundir og margir sem senda Reyni skilaboð um að þau sjái sig sjálf í frásögn hans.

Atli Stefán Yngvason, markaðs- og framtíðarstjóri Mílu, er gestastjórnandi í þessum þætti af Ræðum það...

————

Ræðum það er í boði Góðra samskipta

Stjórnandi: Andrés Jónsson

Stef: Ræðum það - Dire & Nolem

Fundur, fiskeldi og fargufur

Gauti Geirsson, framkvæmdastjóri fiskeldisfyrirtækisins Háafells og Finnur Beck, framkvæmdastjóri Samorku, eru gestir fimmta þáttar fimmtu seríu af Ræðum það… spjallþáttar um atvinnulífið þar sem við fjöllum um efnahagsmál, viðskipti, stjórnun og samskipti frá ýmsum hliðum.

Farið er yfir væntanlega atvinnustefnu stjórnvalda sem kynnt var á fjölmennum fundi í morgun, orkuöflun, sjávarútveginn og fiskeldi ásamt því sem fargufur, ísfirsk lífsgæði, náttúra Hornstranda og norsk stjórnmál koma við sögu.

————

Ræðum það er í boði Góðra samskipta

Stjórnandi: Andrés Jónsson

Stef: Ræðum það - Dire & Nolem

Staðan í gervigreind

Stefán Baxter, stofnandi Snjallgagna, Gunnar Hólmsteinn, stofnandi Quest Portal og Berglind Einarsdóttir lögfræðingur og stofnandi Bentt gervigreindarráðgjafar eru gestir fjórða þáttar fimmtu seríu af Ræðum það… hlaðvarps um viðskipti, efnahagsmál, stjórnun og samskipti.

Farið er yfir víðan völl um stöðu gervigreindar, samfélagsleg áhrif hennar, áhrif á rekstur fyrirtækja og á daglegt líf okkar allra.

————

Ræðum það er í boði Góðra samskipta

Stjórnandi: Andrés Jónsson

Stef: Ræðum það - Dire & Nolem

Afhverju fara ekki fleiri íslensk fyrirtæki í útrás til Skandinavíu?

Andri Árnason, framkvæmdastjóri Takk og einn eigenda Tefélagsins og Einar Örn Einarsson, eigandi Zocalo og Wok to Walk og stjórnarmaður Haga, eru gestir þriðja þáttar fimmtu seríu af Ræðum það… hlaðvarps um viðskipti, efnahagsmál, stjórnun og samskipti.

Báðir gestirnir hafa fært út kvíarnar til hinna Norðurlandanna og velta því upp með okkur hvers vegna íslensk fyrirtæki eru óvön því að fara þessa leið.

————

Ræðum það er í boði Góðra samskipta

Stjórnandi: Andrés Jónsson

Stef: Ræðum það - Dire & Nolem

Viðskiptafréttir sumarsins

Þorsteinn Friðrik Halldórsson, viðskiptablaðamaður og ritstjóri Hluthafans, er gestur annars þáttar fimmtu seríu af Ræðum það… hlaðvarps um viðskipti, efnahagsmál, stjórnun og samskipti.

Rætt er um Aldin Dynamics, Quest Portal, Dranga, Skel, Sýn, Nova, Farice, gagnaverin, orkumál, Jökulsárlón ferðaþjónustufyrirtækið, Adalvo, Alvotech, Róbert Wessman og Björgólf Thor Björgólfsson.

————

Ræðum það er í boði Góðra samskipta

Stjórnandi: Andrés Jónsson

Stef: Ræðum það - Dire & Nolem

Í nýrri seríu af Ræðum það... fáum við fjölbreytta gesti úr atvinnulífinu.

Fyrstu gestirnir eru Steingrímur Birgisson, forstjóri Hölds sem rekur Bílaleigu Akureyrar/Europcar en sem á einnig hluti í ýmsum öðrum fyrirtækjum og Gylfi Ólafsson sem er að horfa til vaxtar í komu skemmtiferðaskipa til Vestfjarða, bæði sem pólitíkus en líka sem fyrirtækisstofnandi sem reynir nú í annað sinn að safna fé frá fjárfestum.

Rætt var um fjárfestingar bílaleiga sem er einn stærsti bransinn í ferðaþjónustugeiranum, skattlagningu og ívilnanir og áform stjórnvalda að hamla of miklum vexti greinarinnar. Einnig var rætt um sveiflur í greininni og hvort þær fæli fjárfesta mögulega frá henni.

Þáttastjórnandi er Andrés Jónsson.