Þann 12. mars fyrir 30 árum og tveimur dögum kom út platan Out of Time með hljómsveitinni R.E.M.- hún á semsagt afmæli og við ætlum að halda upp á það í Rokklandi í dag. Við heyrum nýlegt viðtal við bassaleikarann Mike Mills þar sem hann rifjar upp þann tíma þegar þeir félagar voru að gera plötuna og heyrum líka Unplugged upptökur með R.E.M. frá ríkisútvarpinu í Hamborg í þýskalandi, NDR, frá 5. Mars 1991, en R.E.M. fór í kynningartúr um Evrópu og víðar til að kynna plötuna á sínum tíma og spilaði órafmagnað hér og þar. Svo heyrum við nokkur lög af nýju Mogwai plötunni sem fór beina leið í toppsæti breska vinsældalistans fyrir hálfum mánuði þegar hún kom út, öllum að óvörum, og ekki síst hljómsveitinni sjálfri. Nýja platan; As the love continues, er tíunda plata skosku sveitarinnar Mogwai og engin hinna hefur náð toppnum í Bretlandi. Abba kemur líka aðeins við sögu.