透早起床，看到一个讀研究所的同窗，佇昨暗時九點偌寫line予我，這個時間我早就佇眠床頂唔唔睏，講欲佮我講幾句話，毋知是啥物代誌？三四點就起床的我，袂使隨共回line，無若手機仔囥眠床邊的人，可能會去予我吵到眠，只好聽候到七八點，人差不多攏起床，愛去上班矣，才來寫line予伊，問看是欲講幾句啥物話？

寫了無偌久，伊就用line敲過來。伊講伊有兩張舞台戲的票，本來是怹翁仔某欲做伙去看，但年底伊佇香港的工課較濟，干焦拜六禮拜才有閒通飛轉來，上班日就飛袂轉來台灣。這齣戲拄好佇拜四暗，票的座位袂䆀，一張嘛愛開兩千偌箍，無去看是有夠拍損矣！看我有閒通陪怹翁去看無？

雖然跟同窗算有熟，怹結婚我嘛有去，但就毋捌佇其他的時間，有機會跟怹翁熟識過，講過話，伊那會想對我遮來？我就笑笑共問，這是啥物因緣？伊共我講，這齣舞台戲是吳念真編寫的，演員佇戲中較濟攏講台語，伊感覺愛揣一個會曉聽嘛會曉講台語的人來看，較會接受。

我知影吳念真先生有編過幾偌齣叫做「人間條件」系列的舞台戲，聽講逐齣的票房攏賣了誠好，莫怪人講伊是全台灣傷勥講故事的歐吉桑，市面上嘛有出DVD咧賣。印象中我捌佇網路頂看過賣DVD的廣告，拄看到的時陣，足想欲共買落去，但因為個性無遐衝碰，若無隨買，過去就袂記持矣。我閣會記持佇疫情上嚴重的期間，足濟戲劇團體的舞台戲攏無法度演出。為著欲予關佇厝內底的台灣人，鬰悶的心情有所在通敨，綠光劇團就佇網路頂，佇限制的時間內底，共「人間條件」系列的戲，放予人看免錢的，我就有趁彼時陣看過幾偌齣。

因為我捌佇研究所同窗的群組內底，共我家己錄的「台文用喙讀」podcast貼予同學聽。揣我去看舞台戲的這個同窗，怹先生拄好佇李江卻台語文教基金會做董事，這個基金會就是專門推捒台語文化、台語課程、台語節目的團體。伊講伊有共我的podcast連結，貼去予怹先生聽，所以算是有先介紹我跟怹先生熟識過矣。原來是因為我共母語抾轉來講，開始學寫漢字台文的因緣，才有這遍予人請我去看戲的機會。

ui「人間條件3」開始，吳念真攏會用一條歌名做這齣戲的標題，譬如講「人間條件3」就是用一條台語老歌「台北上午零時」做標題。佇2021年疫情期間首演的「人間條件7」是用一條中語老歌「我是一片雲」做標題。綠光劇團怹共這系列的戲劇號做國民戲劇，劇情攏是描寫小人物佇台灣這塊土地，認真過生活的故事。這遍「人間條件8」是用李宗盛的「凡人歌」來做標題。這條歌我真熟，戲看了嘛愛來共唱一遍才會過癮。

# https://youtu.be/QjeTdidr6Rw

#看人間條件8不用帶衛生紙人場