ရန်ကုန်မှာရေးတဲ့ကဗျာ

_______________________________ မောင်သင်းခိုင်

(၁)

စပိန်ပြည်ရဲ့

ဖက်ဆစ်အာဏာရှင်ကြီး

"ဖရန်ကို"ကွယ်လွန်သွားပြီဆိုတဲ့သတင်း

တနိုင်ငံလုံးက ပြည်သူတွေကြားလိုက်ရတော့......

သမရိုးကျမြန်မာစကားနဲ့ပြောရရင်

လှည်းနေ၊လှေအောင်း၊မြင်းဇောင်းမကျန်

အနှစ်နှစ်အလလက စစ်သံခွါအောက်မှာ

ပြားပြားဝပ်ခဲ့ရတဲ့ ဦးခေါင်းတွေ

ထူမတ်လာကြပြီး လမ်းမတွေပေါ်ထွက်လာခဲ့ကြ

လွတ်ပြီဟေ့ ကျွတ်ပြီဟေ့ မင်းဆိုးမင်းညစ်

ဖက်ဆစ်လက်က လွတ်ပြီ ကျွတ်ပြီဟေ့ လွတ်ပြီ

အိမ်ရှင်မ မိန်းမသားထုကြီးကလည်း ဟော့သလို မေတ္တာပို့ကြလေရဲ့

ဟဲ့....သေနာကောင်၊သေချင်းဆိုး"ဖရန်ကို"နင့်အလှည့်ရောက်ပြီလေ

ဟဲ့..... .....အုတ်ကြားမြက်ပေါက်ကောင်ရဲ့ သွားတော့ ၊သွားတော့

ငရဲမင်းကြီးရဲ့ သံသရာဝဲဂယက်မှာ နင်လည်စင်းခံပေရော့

ဟဲ့....."ဖရန်ကို"အလှည့်ကျရင် မနွဲ့ရဘူးဆိုတာ မှတ်ထား။. ။

(၂)

အဲဒီညက

"ဖရန်ကို".........ကို ကောင်းချီးပေးတဲ့အနေနဲ့

တပြည်လုံး ပျော်ရွှင်မှုအထိမ်းအမှတ်အဖြစ်

သောက်လိုက်ကြတဲ့ အရက်တွေ စပိန်တစ်ပြည်လုံး

ရှန်ပိန်တွေပြတ်သွားကြသတဲ့

အဲဒီအကြောင်းကို သတင်းစာတွေကရေးသားခဲ့ကြတယ်။ ။

(၃)

ကဲ...... နေထက်နိုင်ရေ့..........တို့လဲ

လိုရမယ်ရပေါ့ကွာ

ဘယ်လို အရက်မျိုးပဲဖြစ်ဖြစ်ပေ့ါလေ

မင်းတို့ငါတို့ ခုကတည်းက

ကြိုတင်ပြီးစုဆောင်းထားကြရင်

မကောင်းဘူးလားဟေ့။ ။

မောင်သင်းခိုင်