Collab series "X" ရဲ့ track no. 2 ပါ။ ဆရာလှသန်းရဲ့ ရန်ကုန်မြို့နှင့် အနီးတစ်ဝိုက် ကဗျာဖြစ်ပြီး၊ ပါဝင်ရွတ်ဆိုပေးသူကတော့ Ayez Wayk ဖြစ်ပါတယ်။

တိုက်ဆိုင်စွာ ဒီနေ့ဟာ ဆရာလှသန်း ဆုံးတဲ့ ၁၀နှစ်မြောက်နေ့ဖြစ်ပါတယ်။ ဆရာ့အား ဒီကဗျာနဲ့ပဲ ဦးညွှတ်ပါတယ်။

Series X မှာ ပါဝင်ရွတ်ဆိုချင်တယ်ဆိုရင် Messenger chatbox ကနေသို့မဟုတ် [email protected] ကို အသံ sample file ပို့လို့ရပါတယ်။

-----

ရန်ကုန်မြို့နှင့် အနီးတစ်ဝိုက်

ခြေထောက်ကို ဖိနပ်ထဲထိုးထည့်

လမ်းလျှောက်ထွက်ခဲ့တယ်။

ဓါတ်ကြိုးတွေနဲ့ ချည်နှောင်ထားတဲ့ မြို့ကြီး

ဘဝကို မငြီးငွေ့သေးဘူးလား

မိသားစုတွေကို ထုပ်ပိုးထားတဲ့အိမ်တွေ

လုံခြုံမှုရှိပါစ။

မချိုမချဉ်မျက်နှာနဲ့လူက

“ကျွန်တော် အသံဝင်နေတာကြာပြီ …” တဲ့

နီးရာဆေးခန်း ပြကြည့်ပါ။

ဟိုမှာ

ဆန့်ငင်ဆန့်ငင်ဖြစ်နေတဲ့ သီချင်းတစ်ပုဒ်

ချာတိတ်တွေ နားခလုတ်တိုက်လိမ့်မယ်။

ဘီယာဆိုင်ထဲ ဝင်ထိုင်လိုက်တော့

ရောင်းအားမြှင့် မိန်းကလေးရဲ့ မျက်နှာ

ဘီယာငှဲ့သလို အမြှုပ်တွေ တစီစီထလို့။

နောက်ဖေးလမ်းကြားထဲကို ထွက်ပြေးသွားတဲ့

မြေကြွက်တစ်ကောင်ကို မြင်မှ

ကိုယ့်အမှောင်ထု ကိုယ်သတိရမိရဲ့။

အမြိုက်ရေကြည်တစ်ပေါက်နောက်ကိုလိုက်ရင်း

ချောက်ကမ်းပါးထိပ်ရောက်ခဲ့ပြီ

စိတ်ထဲမှာ

ပြေးလမ်းနဲ့ လေယဉ်ဘီးထိလိုက်သလို။ 

လှသန်း