Samoan Devotional

OPEN HEAVENS

MATALA LE LAGI MO LE ASO TOFI 5 NOVEMA 2026

(tusia e Pastor EA Adeboye)

Manatu Autu: Faamamā mo le ola galue e sili atu (Purified for higher service)

Tauloto Tusi Paia: Malaki 3:3 “E nofo o ia, o le tunu ma fa‘amamā i le ario; na te fa‘amamāina le fānauga a Levi, na te fa‘ate‘a ‘ese fo‘i le ‘ele‘ele ‘iā te i latou e pei o le auro ma le ario; latou te avatu ai i le ALI‘I le taulaga e fai i le amiotonu.”

Faitauga - Tusi Paia: 2 Timoteo 2:20-26

A valaau le Atua i tagata, e na te faamama iai latou ae lei auina atu i latou e faia le galuega e auauna ai ia te ia. E talia e le Atua tagata i lo latou tulaga o iai, peitai e na te lē tuua i latou e aunoa ma se suiga, e mafai ona alu atu se tagata i le Atua ma le tele o amioga agasala, peitai afai e fia faaaogaina o ia  mo le galuega a le Atua, e tatau ona latou lafoai muamua ia vaega faaletonu. 

Le au pele e, e alofa le Atua ia te oe i le tulaga o loo e iai, peitai e lē mafai ona ia faaaogaina oe i le tulaga lena pe afai o loo tumu lou olaga i le agasala. Afai e te naunau e faaaogaina oe i lana tovine, e tatau ona e faataga ia te ia e faamama ia te oe. Tusa pe ua faamamaina oe ma ua aoga i lana galuega, o loo valaau o ia mo leisi tulaga maualuga atu e faamamaina ai. Auā foi o le tele ona faamamaina o se tagata, o le tele foi lena o lona aoga mo lona matai. 

I le Isaia 6:1-8, na maua se faaaliga e Isaia na ia iloa atu le Alii. Ae lei oo i lea taimi, sa tele valoaga ma faaperofetaga na ia faia i Isaraelu. O ia o se ipu aoga i le aao o lona matai, peitai na finagalo le Atua e siitia o ia i se tulaga e maualuga atu. I lea faaaliga, na ia vaai atu i le Atua Matautia o afio i lona nofoalii mamalu, ona ia iloa lea o lona palapala. E ui na umi se taimi o auauna i le Atua ae lei maua le faaaliga lea, na ia iloa pea lona palapala. O se atalii/afafine o le Atua o loo galue pea ini ona vaivaiga, e mafai ona faaaoga e le Alii i se tulaga, peitai afai e faaaoga e le Alii lea tagata mo se faamoemoega e maualuga atu, e na te faaopoopo le faamamaina o ia. Ina ua vaai atu Isaia i le Alii, na ia alaga atu, “Auē a‘u nei! auā ai a‘u a fano; auā o a‘u o le tagata laugutu leaga”. Na ia iloa e lē agavaa mo le valaau a le Atua i le tulaga i luga atu pe afai e tumau pea i le tulaga o loo iai. Ou te tatalo ia asiasi atu le Alii ia te oe ma faamama ia te oe mo le valaauina i luga atu, i le suafa o Iesu. 

O le faitauga mai le Tusi Paia o le asō o loo taua ai ituaiga ipu eseese e tatou te maua i le fale o le Atua. E iai ipu auro ma siliva e faaaogaina mo tulaga maualuga aua ua maea ona ui i le faamamaina i le afi, e iai ma ipu e faia i le laupapa ma le palapala mo isi galuega e maualalo ane. E lē filifilia e le Atua le ituaiga ipu e te iai, e te filifilia lava e oe e fua i le mamao e te faatagaina ai le Alii e faamama ia te oe. Fai mai le 2 Timoteo 2:21, ‘ai se tasi e fa‘amamā ‘iā te ia a‘i nei mea, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma. Le au pele e, ua sauni le Atua e faaeaina oe i le tulaga e sili atu i lana galuega pe afai e lafoai lou ola ia faamamaina e Ia. E iai ea se mea e tatau ona faamamaina ai lou tagata e mafai ai ona faaaoga oe e lou matai i le tulaga e maualuga atu? I le suafa o Iesu, Amene. 

OPEN HEAVENS

MATALA LE LAGI MO LE ASO LULU 4 NOVEMA 2026

(tusia e Pastor EA Adeboye)

Manatu Autu: Faamamā lou tagata (Purify yourself)

Tauloto Tusi Paia: Iakopo 4:8 “Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi ma ‘ia ‘outou saga fa‘afetai.”

Faitauga - Tusi Paia: Numera 8:5-11

I le tele o tausaga talu ai, sa ou auai i se fonotaga tele a le Ekalesia Penetekoso i Kenya, sa toatele faifeau faauuina ma tautaua i lea vaitau na auai atu iai. E ui e lei valaaulia au i lea fonotaga, na ou auai ai ona o lou fiaai mo le Atua. Ina ua lata ina maea le fonotaga, sa faia se faatalanoaga i le mataupu o le ‘manatunatu loloto (meditation)’. I le taimi o le mataupu lea, na ta e se tagata le kitara ma usuusu pese ao matou tatalo uma i le Agaga Paia. Na ou manatunatu loloto ae ua faateia au ina ua ave au i le lagi. 

O se faaaliga o loo ou iloa atu aua ou te lē o moe. Ua ave au i se potu telē lava e pei e lapotopoto lona taualuga. O loo iai seisi o loo nofo i se nofoalii e mamao lava ma au. O loo tutū agelu i itu e lua o le potu, e faitau miliona le itu taumatau ma le itu agavale. E matua lapopoa maualuga ma o latou foliga e faigata ona faamatalaina. E lē lanu paepae, e matuā leai a ni upu e faamatala ai. O le pito latalata ou te faamatalaina ai e pei o le vai i totonu o se ipu omea malamalama maoi, e leai seisi upu e faamatala ai lea ituaiga lanu. 

A ou liliu i le taumatau,o agelu i lou itu taumatau ua sosō i tua. A liliu i le agavale, ua soso foi i tua agelu. E leai ma seisi na faia mai se upu, peitai na tei a ua ou manatu, ia ou suesue ia te au lava. Ina ua ou faia,  ua ou iloa atu ua ou le lavalava ma ua ufitia uma e lapisi, e pei faatoa aumai a’u mai le nofoaga e lafoai ai suavai palapalā. Ina ua ou vaaia lea, ua ou malamalama i le mafuaaga na o ese ai agelu ma au, ona tei a lea ua mou atu lea faaaliga. Ina ua maea ona ou vaai i lea faaaliga, na ou fai i le Atua matautia, ‘a ou toe foi mai i le nofoaga o lou mamalu, ou te lē toe sau palapala’. O le mafuaga lea e faamuamua ai lava le ola faapaiaina ia te a’u. 

Le au pele e, a aunoa ma le faapaiaina, e leai se tagata e mafai ona vaai i le Atua ( Eperu 12:14). Afai o e ola pea i le agasala, e le mafai ona e iloa atu le Atua, o soo se tagata e le mafai ona vaai atu i le Atua, e lē mafai ona ia saofagā i meaalofa lelei e na o ia e maua ai ( Iakopo 1:17). Aua e te auauna i le Atua ma se loto le mamā. Ua oo i le taimi e te faalatalata ai ia te ia ma ole atu e faamama oe mai soo se mea e taofia oe mai i le iloa atili o ia. A e saili ia te ia ma lou loto atoa, e te maua o ia ( Ieremia 29:13) ona e maua lea o ana faamanuiaga i vaega uma o lou olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 3 NOVEMA 2026

(tusia e Pastor EA Adeboye)

Manatu Autu: O le loto faafetai e tatala ai mea faaopoopo (Gratitude unlocks more)

Tauloto Tusi Paia: Kolose 3:15 “Ia pule fo‘i le filemū mai ‘iā Keriso i o ‘outou loto, o le mea lea ‘ua vala‘auina ai ‘outou e fai ma tino e tasi ma ‘ia ‘outou saga fa‘afetai.”

Faitauga - Tusi Paia: Luka 17:12-19

E finagalo le Atua e faaali atu lo tatou loto faafetai ia te ia i taimi uma. O lea loto faafetai e mafai ona faaali atu e ala i tatalo, viiga ma tapuaiga. Fai mai le Salamo 100:4, Ia ‘outou ulu atu i ona faitoto‘a ma le vi‘iga, ma ona lotoā ma le pese. I le faitauga mai le Tusi Paia o le asō, na faamalolo e Iesu lepela e toa 10, ae na o le toatasi na toe foi e faafetai ia Iesu. Ona ia fesili atu lea ia te ia poo fea le isi toaiva. 

O le mafuaaga e toatele ai tagata latou te le maua le tele o vavega mai le Atua ona latou te leiloa faafetai mo mea ua maea ona ia faia mo i latou. Ina ua matou faatuina le lala muamua o le Ekalesia i se tasi o nuu e taua o Abuja, e tolu aso o faia matou sauniga. Ae lei amata le sauniga muamua, sa ou tatalo i totonu o se faletalimalo ia afio mai le Atua e faia vavega ma ia liliga mai lona mamalu ma le faauuga i a matou sauniga. Na faafuasei ona faapea mai le Atua, ‘tapuni’. Sa ou fiafia aua e ui o se upu tetee mai, ae o loo ou mautinoa o loo ia faafofoga mai. Ona ia faapea mai lea, ‘ua tele au faatonuga i mea ou te faia mo oe. O a’u o sau auauna? Ua e faafetai mai ea i mea e tele ua ou faia mo oe i le tuanai? Na ou faatoese vave ma faapea atu, ‘Le Alii e, ou te faafetai atu i mea ua e faia i le tuanai, peitai faamolemole ia faaopoopo mea e te faia’. Na toe fai mai ia te au e taofi. Ona ia fai mai lea ‘mo aso e tolu o le a sosoo nei, ou te lē fia faalogo i seisi lava mea mai ia te oe, tau lava o le faafetai’. O se luitau tele mo au ae na ou usitai. Ina ua maea aso ia e tolu, na fai mai le Alii e faapea, ‘atalii, alu i le fale, faauu toeaina,ona o lea o latou e aoao tagata i aoaoga a le lotu ina ia malosi lona faavae, aua o le tulaga ua e vaai iai, o le faaopoopo. O le tulaga o le a e sauni e vaai iai o le faateleina’. I le viiga o le Atua, o le Ekalesia RCCG ua matua faateleina i Abuja ma faapena foi i le lalolagi atoa. 

Le au pele e, afai e te loto faafetai i le Atua, o mea uma ua ia faia, e faaopoopo mea e na te faia e pei ona ia faia i le tamaloa lea na toe foi e faafetai ia Iesu, i le faitauga mai le Tusi Paia o le asō. Faamolemole, aua nei faitauina oe i tagata lē loto faafetai i aso mulimuli (2 Timoteo 3:1-2). A e mafaufau loloto, tusa poo le a le tulaga o loo e iai,  e te maua lava vaega uma e te faafetai ai i le Atua. Aua e te faatali seia aveesea ma oe avanoa matagofie o loo e aeae ai i le taimi nei ona e faatoa faafetai lea i le Atua. E finagalo e te sau i ona luma ma le loto faafetai i taimi uma. Faaavanoa lou taimi e te faafetai ai i le Atua mo mea ua ia faia mo oe i aso uma, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 2 NOVEMA 2026

(tusia e Pastor EA Adeboye)

Manatu Autu: Viia le Alii (Praise the Lord)

Tauloto Tusi Paia: Salamo 98:4 “Ia ‘alalaga i le ALI‘I le lalolagi uma; ‘ia leo tele lava ma ‘ia ‘alalaga fiafia ma ‘ia fai pesega.”

Faitauga - Tusi Paia: Salamo 67:5-7

E olioli le Alii i viiga a ona tagata. O le mea moni, e matua fiafia i viiga e tietie i viiga a lana fanau (Salamo 22:3). I le Salamo 50:23, na ia fetalai “O lē faia le vi‘iga ma taulaga, o le āva lea ‘iā te a‘u; ma lē ‘ua mafaufau i lona ala, ‘ou te fa‘ailoa atu ‘iā te ia le fa‘aolataga mai le Atua.” O loo faaalia ai le naunau o le Atua i lana fanau e vivii ia te ia. 

A osi atu le viiga o le Atua e lana fanau, e na te tauina taua mo latou. O le tulaga lea na tupu i le 2 Nofoaiga Tupu 20:1-25, na o mai tupu e toatolu e faasagatau i le tupu o Iosefatu. Na vivii i le Atua tagata o Iuta, ona ia tau lea mo latou. Na faia e le Atua ma iu ina toe fetauai tupu nei e toatolu e aunoa ma le faaaogaina o se pelu e le fanau a Iuta. E le gata i lea, e tolu aso o aoina le oa mai latou fili e Iosefatu ma ona tagata i se taua latou te lei tauina. 

O seisi faataitaiga o le Atua o loo tau mo ona tagata o vivii ia te ia o loo faamauina i le Galuega 16:25-26  “O le tulua o po ma ao ‘ua tatalo ai ma pepese o Paulo ma Sila, i le Atua; ‘ua fa‘alogo fo‘i ‘iā te i lā‘ua e ‘ua noanoatia. ‘Ona fa‘afuase‘i mai lea o le mafui‘e tele, ‘ua lūlūina ai fa‘avae o le fale puipui; ‘ua matala mai ai uma faitoto‘a, ‘ua maunuunu ai fo‘i o latou noanoagauma lava.”

Ou te tatalo ia tau le Atua mo oe ao e vivii ia te ia i le asō, i le suafa o Iesu. 

Ou te manatua le tala i se uso kerisiano na ia faasoa atu se mealilo i ana seleselega i tausaga uma. Fai mai lea uso, a maea ona totō, e savali solo i lana faatoaga ma usu pese ma viiga i le Atua. A oo i le taimi e  selesele fua o ana faatoaga, e faamanuia le Atua e sili atu i ona manatunatuga uma. Le au pele e, ou te fautuaina oe e te mulimuli i lea faataitaiga lelei. A e faatauina oloa e toe faatau atu, tuu ia oloa i ou luma ma amata ona e vivii i le Atua. Ia faia i lou ofisa, aemaise o lau kesi. Fai ma au masani le faaavanoa o se taimi e te vivii ai i le Atua. Faataitai iai ona e vaai lea i le Atua e na te faatupuina lau pisinisi po lau galuega ina ia e tofo i le faaeaina mai le Atua. 

Peitai, e lē fia faalogo le Atua i pese ma viiga a tagata agasala ( Ioane 9:31). E lē afaina poo le a le lelei o le pese ma le siva a lea tagata, o le viiga e talia e le Atua e tafe mai le loto ua faamamaina (Salamo 24:3-4). Afai e lei tuuina atu lou ola ia Iesu, faamolemole ia e faia loa, ona e malolo lelei ma le mautinoa, a e vivii ia te ia, e faamanuia le Atua ia te oe, ma ia tauina taua mo oe. Vivii mai le loto faamamaina e tosina mai ai faamanuiaga ma le puipuiga mai le Atua, i le suafa o Iesu, Amene. 

OPEN HEAVENS

MATALA LE LAGI MO LE ASO SA 1 NOVEMA 2026

(tusia e Pastor EA Adeboye)

Manatu Autu: E Pule O Ia 2 (He Is In Control 2)

Tauloto Tusi Paia: Salamo 78:45 “Na ia ‘a‘auina atu ‘iā te i latou o garova, na ‘aina ai i latou; o rane fo‘i na fa‘aumatia ai i latou.”

Faitauga - Tusi Paia: Faaaliga 12:1-17

O ananafi na ou faasoa atu e pule le Atua i le natura o mea ma mea uma i le lalolagi. A iai se tagata i le itu a le Atua, e galue le natura o mea e alofaina o ia. Peitai a tetee atu se tagata i le Atua, e galue tetee le natura o mea i lea tagata. Le au pele e, afaia e te lei tuuina atu lou ola ia Keriso, o loo e tetee i le Atua, o lona uiga o vaega uma o le natura o mea, e mafai ona filifili e galue e tetee ia te oe. E leai seisi taimi lelei i lo le asō e faia ai se suiga o lou olaga ma tuuina atu lou ola ia Iesu, o Lē pulea mea uma. 

O loo faamatala e le Ieremia 22:28-30 se tagata e igoa ia Konia. O ia o se tupu na ola tetee i le finagalo o le Atua (2 Tupu 24:8-9), ona faatonu lea e le Atua le laueleele, ia tusia e lē fanau. E leai ma se mea na ia faia e mafai ai ona uluola, aua foi ua faatonuina le laueleele mai Lē oi le lagi ia faamautinoa e leai se fanau. O leisi tagata na tetee iai le natura o mea o Sisera, e pei ona tusia i le Faamasino  5:20-21. Na faasaua lenei tagata i tagata o le Atua (Faamasino 4:1-3) ma ina finagalo le Atua e faamasino ia te ia, o fetu o le lagi ua tetee ia te ia e faapena foi le alia o Kisona. E faapena foi Farao, ina ua ia matua musu e tuu le fanauga a Isaraelu e ō, na faaaoga e le Atua vaega eseese o le natura o mea e tau atu ai ia te ia. Na faasagatau atu ni manu ia te ia ( Salamo 78:43-46), ua to mai uatoa e tetee ia te ia, e oo i le la na taofia le susulu mo aso e tolu ona o lona lē usitai ( Esoto 10:21-23. E sili atu le faatu o lou faleie ma Lē e pule o mea uma aua foi e usitai mea uma ia te ia, ma o mea uma e faataunuuina ai folafolaga. 

O le faitauga mai le Tusi Paia o le asō o loo faamatala ai se fafine ma le tarako. Ina ua foliga mai ua leai seisi faamoemoe, ma e fasiotia le fafine e le tarako, fai mai le Tusi Paia na oo mai le laueleele e fesoasoani ia te ia. Na tatala le gutu o le eleele ma folo uma mea uma mai le Karato. E fesoasoani foi le laueleele iai latou e mulimuli i le Alii ma faia lona finagalo, e alofaina i latou e alolofa i ala amiotonu o le Atua. Ina ua agasala Atamu, na fetuuina le laueeleele ona o ia (Kenese 3:17-19). Peitai o i latou uma ua ia Keriso, ua faasaoina i latou mai le fetuu ma le malaia o le tulafono ( Kalatia 3:13). 

Le au pele e, ou te tatalo, ao e vivii i le Atua ma faailoa o ia e pule i le lalolagi atoa, e tali mai ia te oe le laueleele ma faateleina mo oe ( Salamo 67:6), i le suafa o Iesu, Amene.

OPEN HEAVENS

MATALA LE LAGI MO LE ASO TOONAI 31 OKETOPA 2026

(tusia e Pastor EA Adeboye)

Manatu Autu: E Pule O Ia 1 (He Is In Control 1)

Tauloto Tusi Paia: Iopu 37:6 “Auā e fetalai ane o ia i le kiona, ‘‘Inā tō ia oe i le lau‘ele‘ele;’ ‘ua fa‘apea fo‘i i le timu ma ona timuga e matuā tetele.”

‭‭ ‬

Faitauga - Tusi Paia: Mareko 4:36-41

I ni tausaga ua mavae, sa valaaulia ai a’u i se fonotaga taua tele i Denver, Colorado i Amerika. O le fono sa fuafua e usuia ia Ianuari, ma o Denver lava ia e malulu tele i le masina muamua o le tausaga ona o lona tau mālūlū. A o o’u tatalo mo le fono, sa ou fesili i le Atua, “Tamā, e tatau ona ou alu?” Na tali mai, “Alu.” Ona ou fesili lea, “o le à la tatou faiga a fai i le tau mālūlū?” Na ia fetalai, “Aua e te popole i le mea lenā.” E tolu aso na ou nofo ai i Denver ma o le taimi lea, na oofu tagata i mitiafu auā na o’o faafuasei mai le tau mafanafana. Ina ua o’u tuua Denver i le itula e 5 i le afiafi i lo’u aso lona tolu, e ta ifo le 6 i le afiafi ua 12.5 cm le mafiafia o le kiona ua lilofia ai le taulaga. Na taofia e le Atua le tau malulu ae se’i faataunuu lana galuega, ma ina ua mae’a, na ia toe tuuina atu le kiona e fa’aauau lana galuega. 

O le Atua e pule i le foafoaga; E faatonu e ia le lalolagi ma mea uma o i ai. Fai mai le upu tauloto o le asō, e fetalai o ia i le kiona. E faatonu e ia le kiona ma le timuga i le taimi e to ai i le laueleele. O le pule a le Atua e to ai le timu po o le kiona i luga o le laueleele pe taofia fo’i. E mafaia e ia ona faamalolō tulafono o le natura  o mea, ina ia faataunuuina lona finagalo ma ana polokalame ma toe talaia i latou ina ua maea ana galuega. Fai mai Salamo 148:8; o le afi ma le uato’a, o le kiona ma le ausa e o’o fo’i i le matagi e afā ai o loo faia lana Afioga. E leai se matagi malosi mata’utia e lē mafaia e le Atua ona vavao. E leai se afi aasa musaesae na te lē mafaia ona tineia. 

I le faitauga mai le Tusi Paia o le asō, sa i ai Iesu faatasi ma ona soo i se vaa ina o agi se afa tele. O se matagi tele lava ma na iloa e le au faifaiva sa i le ausoo o Iesu e i’u ina fano i latou. Atonu sa o latou faia mea uma i lo latou poto faa tautai ae leai lava se suiga lelei. O le taumafaiga mulimuli na tamomo’e i latou ia Iesu. Ina ua o latou fafagu i le Fa’aola na ia fa’aali i ona so’o, e Pule aoao o ia e pei ona ia tula’i ma vavao le matagi.

 Le au pele e, aua ne’i e faapei o le ausoo o Iesu I le faitauga mai le Tusi Paia o le asō, aua ne’i faia le Atua ma au taumafaiga mulimuli pe a oo faafitauli i lou olaga a ia faamuamua o ia i taimi uma. A e avea le Atua ma pule aoao o lou olaga o le a ia faamautuina lana pule faitalia i soose matagi agi vale poo faafitauli e faalavelave ia te oe. Ou te folafola, soose matagi fa’asalāvei po o se faafitauli e fa’asagatau ia te oe, o le a faalologo ma usitai i le silisiliese o le Atua Mata’utia ma galue faatasi so’oso’o tauau ma oe i le suafa o Iesu. E faatonu e le Atua le natura o mea. O lana pule e fai toatasi aua e leai se tasi e tutusa ma Ia, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 30 OKETOPA 2026

(tusia e Pastor EA Adeboye)

Manatu Autu:Faatuatua pei se tamaitiiti (Child-like faith)

Tauloto Tusi Paia: Kenese 15:6 “Ua fa‘atuatua fo‘i o ia i le ALI‘I, ‘ona ia ta‘uamiotonuina mai ai lea ‘iā te ia.”

Faitauga - Tusi Paia: Mataio 18:2-5, Luka 17:5-6

Ina ua maea ona tuuina atu lo’u ola ia Keriso, sa iai lou faiaoga aso Sa na faaaoga e le Atua e aoaoina au i le faatuatua. Na ia fai mai a tu se tamaitiiti i se fale i lona fogafale i luga ae o loo tu lona tama i le fogafale i lalo ma faatonu e puna atu ia te ia, e puna le tamaitiiti. Aua foi e matua faatuatuaina e le tamaitiiti lona tama e na te sapoina o ia pe a puna atu i lalo. O lea ata e faamatala atili ai le tatou faitauga mai le Tusi Paia o le asō i le avea lea o i tatou faapei o tamaiti laiti. Afai e faatuatua tele faapea se tamaitiiti i seisi tagata soifua, e le sili atu ea le faatuatua i le Atua? Na amata mai i lea aso, ona ou puna pe osooso, ma e lei faatagaina lava au e lou tamā i le lagi ou te paū i lalo. 

Ou te manatua se taimi ao ou galue o se faiaoga i se aoga i se nuu i tua i lo matou atunuu. Na ave e le aoga lea nisi o tamaiti aoga e asiasi ma faamatamata i nisi o nofoaga. O se tasi o nofoaga na asiasi iai o le Iunivesite. Na matou taunuu atu i se aso Sa ma fetaui lelei ma le taimi o le meaai o le aoauli. Na faataga ona matou matamata i le faleai e ui matou te lei aai ai. Na ou vaai atu i meaai a tamaiti o loo ai, o le ipu araisa ma le afa moa. Ua ou ofo, o le moa atoa ae ua vaelua, na tofu le tamaitiiti aoga ma le afa moa. I le taimi lea, faatoa lua tausaga talu ona faatuina le Iunivesite ma o loo iila, matagofie ma fou uma faleaoga. Na ou sau i fafo ma le faleai, punou i lalo ma tago i se tamai maa. Ona ou faapea lea, ‘o le tausaga fou, o le a ou toe sau e toe aumai le tamai maa lenei, ae ua ou aoga iinei’. Ua na ose gaoioiga na ou faia i le faatuatua o se talavou. I le tausaga na sosoo ai, na avea ai au ma tamaitiiti aoga i le Iunivesite lea. Na silasila mai le Atua i le faatuatua o se tamaitiiti na tago i se tamai maa ma le faatuatua, ona ia tali mai lea i le faatuatua. 

O lo’u tamā faaleagaga foi, na ia aoaoina matou ina ia matou faatuatua, ona galue lea ma faatino i le faatuatua. E pei a ona ou tago i le tamai maa, ou te manao ia e faia se gaaoioiga i le asō, pe faia se folafolaga e faaalia ai, e te faatuatua e foai atu e le Atua ia te oe le vavega o loo e ole atu ai ia te ia. Afai o le mea o loo e ole atu ai e ō gatasi ma le finagalo o le Atua, tau a ina ia e puna pe osooso, ae faatuatua i le Atua e na te opogi ia te oe. I le suafa o Iesu, Amene. 

OPEN HEAVENS

MATALA LE LAGI MO LE ASO TOFI 29 OKETOPA 2026

(tusia e Pastor EA Adeboye)

Manatu Autu:Faatuatua i le Atua (Have faith in God)

Tauloto Tusi Paia: Eperu 10:38 “Ae ola lē amiotonu i le fa‘atuatua; i le ma lea, a tu‘umuli, e lē fiafia lava lo‘u loto ‘iā te ia.”

Faitauga - Tusi Paia: Mareko 11:20-24

O le faatuatua i le Atua o lona uiga e te faatuatuaina o ia, e oo i vaega e peiseai ua leai se faamoemoe. A  talitonu moni tagata faatuatua i le Atua, e latou te matua saili ia te ia. O le taui, e lē tuulafoaina i latou e le Atua. Fai mai le Eperu 11:6 “A leai fo‘i se fa‘atuatua e lē mafai ‘ona fiafia mai o ia; auā e tatau i lē alu atu i le Atua ‘ona talitonu o lo‘o soifua o ia, o ia fo‘i na te tauia mai o ē matuā sā‘ili ‘iā te ia.”

E oo mai le faatuatua i le Atua i le iloa moni o ia. Fai mai le Tanielu 11:32 o i latou e iloa le Atua e malolosi ma ausia galuega tetele. Le au pele e, o le a le loloto o lou iloa o le Atua? E te faatuatua moni ia te ia e te faia ai soo se mea e fai atu ai ia te oe e te faia? I le 1Tupu 18:21, na fai Elia i tagata, ‘Afai o le Alii lou Atua, auauna ia te ia. Afai o Paala lou Atua, auauna ia te ia’. Afai o e faamoemoe ma faatuatua i le Atua mo se vavega, o lona uiga e tatau ona e talitonu o ia o le Atua Matautia, e mafai ona ia faia e sili atu i mea o loo e ole atu ai (Efeso 3:20). 

Fai mai le Tusi Paia, o ē amiotonu e ola i le faatuatua (Sapakuka 2:4, Roma 1:17). Fai mai foi le Iakopo 1:6-7, e lē tatau ona e manatu e te maua se mea mai le Atua pe afai e te alu atu ia te ia ma le masalosalo. Ina ua tofia au ma taitai aoao o le Ekalesia, na tupu pea le lotu seia oo i le tulaga ua laitiiti tele la matou ofisa. Ona ou faamaoopo mai lea o sui o le Ekalesia e tatalo ma anapogi mo ni nai aso ma ina ua maea tatalo, na fetalai mai le Atua, ‘ona ua e ole mai ia te au mo se nofoaga e togalauapi ai, o le a ou faaali atu ia te oe’. Ona ia faaali mai lea o se vaomatua o se nofoaga e nonofo ai le au faomea ma manufeai. Ua ou manatu ifo ia te au, ‘aisea ua filifili ai e le Atua lenei nofoaga mai le tele o nofoaga? Peitai na ou usitai i le mea na fai mai ai ona ou te faatuatua ia te ia. O le asō, o lea vaomatua ua avea nei ma taulaga. 

 A fetalai le Alii o loo lelei mea uma, ia e talitonu ma mautinoa e lelei mea uma. I le Mataio 9:27-30, na fesili atu Iesu i tauaso e toalua o loo vaavaai atu ia te ia mo se vavega, pe talitonu e mafai ona ia faamalolo ia tei laua ma o le la tali o le ‘Ioe’. Na tali Iesu ‘Ia faia e tusa ma lo oulua faatuatua’, ona faamaloloina lea o i laua. Le au pele e, tuu lou faatuatua i le Atua, ona ia foai atu lea o vavega e sili atu i ou manatunatuga, i le suafa o Iesu, Amene. 

OPEN HEAVENS

MATALA LE LAGI MO LE LULU 28 OKETOPA 2026

(tusia e Pastor EA Adeboye)

Manatu Autu: Fesoasoani mai le lagi 2 (Help from heaven 2)

Tauloto Tusi Paia: Eperu 1:14 “E lē o agaga e ‘au‘auna ‘ea i latou uma, ‘ua ‘a‘auina e ‘au‘auna ‘ona o i latou o ē a maua le ola?”

Faitauga - Tusi Paia: Galuega 8:26-40

Na ou taua ananafi o se tasi o auala e auina mai ai e le Atua le fesoasoani i lana fanau mai le lagi, e tauala i agelu. Ou te manatua na ou vaai iai pe a ma le 6 poo le 7 o ou tausaga. E iai si ou tuafafine matua ua faaipoipo ma ua nofo i le faatoaga o lona toalua e fai sina mamao mai lo matou fale. E iai le aso na ou fesili ai i lou tuafafine poo fea le faatoaga a lona toalua ona ia faasino mai lea, a ou oo atu i lea vaega, liliu i le taumatau, oo atu i leisi vaega, liliu le agavale ma faasolo ai lava faapena. E lei leva se taimi, ae ou manatu o le a ou alu e asiasi i lou tuafafine i le la faatoaga. Ona o au o se tamaitiiti, ou te leiloa poo le a le mamao, ae ua ou sauni ou te alu, ua ou taumafai e mulimuli e tusa ma le auala na faamatala mai ai e lou tuafafine, peitai na iu ina ou leiloa. Ua ou leiloa pe faapefea ona ou toe alu i le fale, leiloa foi le auala i le faatoaga. 

Na ou tilotilo i le lagi i lou agaga o se tamaitiiti ma faapea atu, ‘Le Atua, faamolemole fesoasoani mai ia te a’u’. Ou te tilotilo mai lalo, ua ou vaai atu i se tamai maile paepae o tata mai le siusiu ma tilotilo mai pei ma te masani. Ona ou te leiloa poo fea le mea o ou iai, na ou mulimuli ai loa i le tamai maile, ma le manatu o loo alu i le nofoaga e iai ni tagata e ono fesoasoani mai ia te au. Na faateia au ina ua taitai sao lava au e le maile i le faatoaga a lou tuafafine. Na tei lou tuafafine ina ua vaai mai ia te au ma ua fesili mai, ‘na faapefea ona e sau? O ai na lua o mai? Na ou tali atu, ‘o le tamai maile paepae’. Na fiu e sue le maile. Ou te talitonu na auina mai e le Atua se agelu e fesoasoani ia te au ina ia mafai ona ou talai le talalelei i le lalolagi atoa. 

O loo faamatala e le taulotu mai le Tusi Paia o le aso, o agelu o ni agaga e auauna ua auina atu e auauna ma aoao i latou e maua le faaolataga. I le faitauga mai le Tusi Paia o le asō, na auina mai e le Atua se agelu e tuuina atu ia Filipo faatonuga maoti o leisi laasaga fou o lana galuega talai. Ina ua maea ona manumaloina le taulaga o Samaria mo Keriso, ua oo i le taimi e laa atu ai i leisi laasaga o le galuega, ma na faailoa atu iai e le agelu le mea e tatau ona faia. 

Le au pele e, o loo auina mai pea e le Atua ana agelu e taitai i ona tagata. Ou te tatalo ia aua nei e misia asiasiga a agelu i le suafa o Iesu. O galuega a agelu o se tasi o vaega o faamanuiaga a le Atua mo lana fanau paia, i le suafa o Iesu, Amene. 

OPEN HEAVENS

MATALA LE LAGI MO LE ASO LUA 27 OKETOPA 2026

(tusia e Pastor EA Adeboye)

Manatu Autu: Fesoasoani mai le lagi 1 (Help from heaven 1)

Tauloto Tusi Paia: Salamo 34:7“E tolauapi le agelu a le ALI‘I, e si‘osi‘omia ai ē o matata‘u ‘iā te ia, e lavea‘i fo‘i o ia ‘iā te i latou.”

Faitauga - Tusi Paia: Salamo 112:1-10

O le tagata e matau i le Atua e fiafia pea o ia i le fesoasoani mai le lagi. A ou talanoa atu i le fiafia i le fesoasoani mai le lagi, e aofia ai le maua o le fesoasoani mai ē e nonofo i le lagi, aemaise agelu. 

O le tauloto mai le Tusi Paia o le asō e tau mai ai iai tatou e tolauapi agelu a le Alii ma siomia i latou  o ē matatau ia te ia ma laveai iai latou. E mautinoa e tolauapi, siomia ma laveai oe e agelu pe a e matau i le Alii. Fai mai le faitauga mai le Tusi Paia o le asō, o soo se tagata e matau i le Alii, o se tagata manuia. A e matau i le Alii ma fiafia i ana poloaiga, e te manuia ma e mautinoa e fesoasoani mai agelu i lou olaga. 

I le 1 Tupu 19:4-8, ina ua matua faavaivai Elia ua manatu o le a oti, na auina faalua mai e le Atua se agelu ia te ia e aumai meaai, e faatupu ai lona malosi. Ae lei oo i le vaega lea, sa feagai Elia ma perofeta a Paala, susunu nofoaga e osi ai taulaga ma fasioti iai latou. Na ia faamamaina le laueleele ifo i tupua aua na ia matau i le Alii (1 Tupu 18:1-40). I le Tanielu 6:19-22, na oo mai le agelu ma tapunia gutu o leona, ua le mafai ai ona osofaia Tanielu aua na filifili Tanielu e matau i poloaiga a le Atua (Tanielu 6:4-10). I le 2 Tupu 19:32-37, e toatasi le agelu mai le Alii na tau ma Sanerivi ma fasiotia ai le 185,000 o fitafita a Suria i le po e tasi. Aua foi o le tupu o Esekia o se tagata faamanuiaina e matau i le Alii (2 Tupu 19:14-19). I le Mataio 2:13-15, na lapatai e le agelu ia Iosefa i se miti o loo saili Herota e fasioti ia Iesu. I le Galuega 12:5-11, na sau se agelu ma faasaoloto ia Peteru mai le falepuipui i le po e sosoo ma le aso na fuafuaina e fasiotia ai o ia. O i latou uma o nei tagata na asia e agelu aua na latou matatau i le Atua. 

E iai se tamaitai na faasoa mai i sana tautinoga ao malaga i le vaalele, na luluina le vaalele ma ua foliga mai o le a paū. Na ia alaga atu i le Atua mo se fesoasoani, na tilotilo atu i fafo o le faamalama ma ia iloa atu se agelu o ataata mai ia te ia ao ia tauave le vaalelei i lona alofi lima. Na vave ona mou atu lona popole ma aveesea lona fememeai. Ou te folafola atu ia te oe, e auina atu e le Alii lana agelu e laveai ia te oe i taimi o luluina ai oe, i le suafa o Iesu. 

Le au pele e, a e matau i le Alii ma usitai i ana poloaiga i taimi uma, e te malolo ma le mautinoa o ‘au agelu o le lagi, e auina mai le fesoasoani ia te oe i taimi e te manaomia ai. O i latou e matatau i le Alii ma fiafia i ana poloaiga, e latou te maua lava fesoasoani mai le lagi, i le suafa o Iesu, Amene.