OPEN HEAVENS

MATALA LE LAGI MO LE ASO SA 14 IUNI 2026

(tusia e Pastor EA Adeboye)

Manatu Autu: Mau’oa e lē tutusa ma le amio Atua (Prosperity is not equal to godliness)

Tauloto Tusi Paia: 1 Timoteo 6:17 “Ia e matuā fai atu i ē mau‘oa i lenei olaga, ‘aua ne‘i fa‘amaualuluga i latou, ‘aua fo‘i le fa‘amoemoe i le ‘oloa e fa‘alētumau, a o le Atua soifua, o lo‘o foa‘i tele mai ‘iā te i tatou mea uma lava e fa‘afiafia ai.”

Faitauga - Tusi Paia: Luka 12:16-21

I le tele o tausaga talu ai, o se uso kerisiano ua fai mai e fia sui lana lotu i seisi lotu aua ua ia maitauina o tagata o leisi lotu, o le toatele ia o le au mauoa. Na vave ona ou faamalamalamaina o le mauoa e lē maua ona o le lotu, ma e lē o se fua lea o le amio atua. Fai mai le Kenese 4:16-17, na fausia e Kaino se taulaga tele ina ua ia alu ese mai le mamalu o le Alii. O le fausia o se aai tele o se tulaga maoa’e, peitai, e lei toe mafuta Kaino i le Atua ao ia fausia lea aai. Aua nei pelogia oe i le manatu o soo se lala e ola, lanulauava ma tuputupu o loo pipii i le a’a, aua foi o nisi lala e lanulauava pea ma foliga o loo ola lava, mo sina taimi, e ui ua tipi ese mai le laau. E i’u ane lava ua samasama ma ua pala. 

E moni e faamanuia e le Atua lana fanau ma foai atu iai latou le malosi e maua ai le oa (Teuteronome8:18), peitai, e le mafai ona avea le mauoa o se fua o le amio atua. E fuaina e le Atua lo tatou amio atua i fua vaaia i o tatou olaga ( Mataio 7:16). A fua mai fua lelei i le fanau a le Atua, e na te faamanuia iai latou, ma o se tasi o faailoga o ana faamanuiaga o le mauoa, e pei ona tatou vaai iai ia Aperaamo, o lē sa mauoa i lafumanu, ario ma le auro (Kenese 13:2). O Isaako foi sa amio atua ma mauoa. Fai mai le tusi Paia i le Kenese (26:12-14) ua faatupuina lona mauoa ma ua avea ma se tagata matua ola, mauoa ma tauoloa.

E finagalo le Atua e te mauoa aua e fiafia e faamanuia i lana fanau i meaalofa lelei (Mataio 7:11). Peitai e lē finagalo e fuaina lou olaga i le tele poo le laitiiti o le oa o loo ia te oe (Luka 12:15). O le tupe o se auupega, ma a faatuatuaina oe e le Atua i le tupe, e fingalo, ia e faamaoni i lona faaaogaina. E finagalo ia e mauoa ia te ia ma ia faaaogaina le oa ua ia foai atu ia te oe, e viia ai pea lona suafa. I le faitauga mai le Tusi Paia o le asō, e lei malamalama le mauoa valea sa tatau ona ia pulea lelei le oa ua ia maua. Na faapuupuu lona ola aua e lei mauoa o ia i le Atua ma e na te lei faailoa o le Atua o le faapogai o lona tamaoaiga, ma ua ia filifili e faaputu le oa mo ia lava. 

Le au pele e, e sili atu ma faataua e le Atua lau mafutaga ma ia ma le tulaga o lou loto (1 Peteru 3:4) i lo le manuia o le oa o loo ia te oe ma le tele o tupe i faletupe. Ave lau faamuamua i le totōina o le manuia moni, o le mauoa  ma le manuia o lou agaga (3 Ioane 2), ae lē o le manuia i le oa. O le manuia i le oa, e lē o se fua lea o le amio atua, i le suafa o Iesu, Amene. 

OPEN HEAVENS

MATALA LE LAGI MO LE ASO TO’ONAI 13 IUNI 2026

(tusia e Pastor EA Adeboye)

Manatu Autu: Mativa e lē tutusa ma le amio Atua (Poverty is not equal to godliness)

Tauloto Tusi Paia: 3 Ioane 2 “Le pele e, ‘ia e manuia i mea uma, ma ‘ia e mālōlō, fa‘apei ‘ona manuia o lou agaga.”

Faitauga - Tusi Paia: 2 Tupu 4:1-7

I le fitusefulu, ina ua fa’aolaina lo’u olaga, sa talitonu le toatele o kerisiano o le mativa o se tasi lea ta’iala mo le avea o se atalii poo le afafine moni o le Atua. Sa malosi tele lenei talitonuga ma ina ua fai meaalofa mai se tasi ia te a’u i se Mercedes-Benz, sa ou teuina i totonu o lo’u fale taavale e lē fa’aaogaina mo ni masina seia o’o ina fetalai le Alii ia te a’u, o lo o o’u taofiofia faamanuiaga a le tagata na foaiina le taavale mo a’u I lo’u lē fa’aaogaina o le foa’i. Sa ou fefe nei faapea tagata ua toe fo’i i tua lo’u olaga pe afai e vaai mai ia te a’u i lenei taavale taugata. Ona o le fetalaiga a le Alii ia te a’u, na o’u filifili ai ou te tietie ma fa’aaogā le taavale, tau lava o le faa tasi, ma ou te manatua sa matua’i lagona lo’u mā i lea aso. Ina ua uma lea aso, sa ou faapea atu i le Alii, “Le Alii e, ua o’u tietie i le taavale, e mafai ona o’u faatauina ese loa?” Na finagalo i ai le Alii ma sa ou faatauina ese loa. E le’i umi ae aumai e se isi se taavale limousine ono faitotoa mo a’u. Ina ua o’u vaai atu i le taavale sa ou faapea, “Le Alii e, e te silafia e tusa pe latou te tuuina lo’u tino maliu i totonu o lenei taavale e toe oso mai lava I fafo.” O le tele lea o lo matou manatu o le mativa e tutusa lelei ma le amioatua I na aso, ma ona o lea na faasesēina ai I matou e le tiapolo. Na siitia e le tiapolo tagata e pulea kamupani ma fale gaosimea seia o’o ina alofaina kerisiano e tagata amio leaga o loo faagaioia tamāoaiga eseese i le lalolagi. 

E leai se mea amioatua faatatau i le mativa, ua i’u ai le toatele o tagata i Seoli, faapei lava ona faia e le mauoa. O le mativa ua mafua ai ona filifili le toatele o tupulaga talavou e lē mulimuli i ala o latou matua kerisiano ona o aafiaga leaga a’o tutupu a’e. Ua mafua ai ona ula tagata o le lalolagi i le Atua mata’utia auā ua o latou manatu ua valea kerisiano ona o lo latou naunau i lenei Atua. I le faitauga mai le Tusi Paia o le asō, o se tasi o le ‘auso’o o Elisaia, na oti i le mativa ae tu’u se tofi o aitalafu mo lona aiga. A na lē sulu lana avā iā Elisaia ma maua ai le upu a le Alii na liliuina lo latou mativa i le tamāoaiga, sēmanū e ola a’e ona atalii e toalua i se olaga pologa ma inoino i le Atua e ui o lo la tamā o se tagata sa amioatua. E lē mativa le Atua (Hakai 2:8), o lona uiga o le mativa e lē mai le Atua. E avatu e le Atua i lana fanau le malosi e maua ai le tamāoaiga (Teuterenome 8:18;) ma o lona finagalo ia manuia i latou faapei ona manuia o latou agaga (3 Ioane 1:2). Le au pele e, tete’e le mativa! e lē o le finagalo lenā o le Atua mo lou olaga. E leai se amioatua i le mativa, i le suafa o Iesu, Amene.

OPEN HEAVENS

MATALA LE LAGI MO LE ASO FARAILE 12 ME 2026

(tusia e Pastor EA Adeboye)

Manatu Autu: Tatalo mo tupulaga talavou (Prayers for youths)

Tauloto Tusi Paia: Faataoto 1:8-9 “Lo‘u atali‘i e, fa‘alogo mai ia i le a‘oa‘o atu a lou tamā; ‘aua fo‘i ‘e te tu‘ulafoa‘iina le ‘upu a lou tinā; auā e fai ia mea ma pale matagofie i lou ulu, ma mea e asoa i lou ua.”

Faitauga - Tusi Paia: 1 Peteru 5:5-9

Tatalo

1. Tamā, ou te faafetai ia te oe mo talavou uma i lo’u siomaga. Faafetai mo le faatupuina o lō latou malosi, manatunatuga i mea lelei ma metotia fou. Faafetai tele mo le faulai o lou alofa tunoa i o matou tupulaga talavou. 
2. Tamā, faamolemole tatala mata o le iloa ma le malamalama i o matou talavou. Ia latou iloa le faamoemoega o lo latou valaauina ma lou mana o loo galue i o latou olaga, i le suafa o Iesu. 
3. Le Alii e, faamolemole ia taofi talavou i le ala tonu. Taitai iai latou i ou fofoga ma taofi i latou mai le faia o mea sese ma faaiuga sesē, i le suafa o Iesu. 
4. Tamā, faamolemole a’oa’o i talavou ia faaeteete i o latou fofoga ma upu lafo, ma puipui i o latou loto. Ia aua lava nei o saisaitia i latou i mafaufauga o latou loto ma upu a latou gutu i soo se auala, i le suafa o Iesu. 
5. Tamā, faamolemole a’oa’o i talavou ia latou ava ia te oe, i o latou taimi, meaalofa ma tulaga. Fesoasoani ia latou iloa, o so’o se mea lelei ma meaalofa aoga o loo iai latou, e aumai uma ia te oe, i le suafa o Iesu. 
6. Le Alii e, faamolemole a’oa’o i talavou pe faapefea ona faatuatua atoatoa ia te oe. A’oa’o i latou ia aua lava nei faalagolago i lo latou iloa ae ia avatu pea ia te oe le viiga i o latou ala uma, i le suafa o Iesu. 
7. Tamā, faamolemole ia e faamanuia i talavou ia latou manuia i mea fai. Faalogo mai i lo latou tagi atu mo se fesoasoani ma ia e tali ma saunia mea uma latou te manaomia i le taimi e manaomia ai, i le suafa o Iesu. 
8. Tamā, faamolemole ia tatala faitotoa uma mo avanoa taua mo talavou, ma fesoasoani iai latou ia saunia lelei i latou mo avanoa e oo mai, i le suafa o Iesu. 
9. Tamā, faamolemole ia foai atu le mafaufau o Iesu Keriso i talavou uma ma ia faatumu o latou ala i lou malamalama, i le suafa o Iesu.
10. Le Alii e, faamolemole ia taitaiina soo se talavou kerisiano ua toe foi i tua, ia toe lagona le siufofoga o le Leoleo Mamoe lelei ma toe foi mai i le aiga o le Atua. Taitai mai i latou ia te oe i loa alofa, i lou agalelei ma lou alofa mutimutivale, i le suafa o Iesu. 
11. Tamā, faamolemole ia faamalosia talavou ina ia mafai ona latou manumalo i faaosoosoga a le tiapolo. Ia aua lava mei saisaitia i latou i mailei a le fili, o fualaau faasāina ma le tuinanau o le tino, i le suafa o Iesu. 
12. Tamā, ia e faamanuia i tupulaga talavou o lo’u aiga, lo’u nu’u ma le atunuu ina ia matatau ia te oe aua o le amataga lea o le poto, i le suafa o Iesu matou te tatalo atu ai, Amene. 

OPEN HEAVENS

MATALA LE LAGI MO LE ASO TOFI 11 IUNI 2026

(tusia e Pastor EA Adeboye)

Manatu Autu: E lē taofia le Atua e le alofa (Love should not hinder God)

Tauloto Tusi Paia: Mataio 16:23 “Ona fāliu atu lea o Iesu, ‘ua fa‘apea atu ‘iā Peteru, “Satani e, ‘inā alu ia oe i o‘u tua, ‘ua fai oe ma mea ‘ou te tausuai ai; auā e lē o mea a le Atua ‘e te loto i ai, a o mea a tagata.”

Faitauga - Tusi Paia: 1 Samuelu 17:26-31

Ia Tesema 2018, sa ou malaga atu e auai i se tasi o matou polokalame faa evagalia e masani ona ou auai ai. O le leaga ia o auala peitai ou te lei faatagaina e avea ma faalavelave ia te au aua ua ou masani i le leaga o auala. Peitai ua sili atu ona leaga auala i lea tausaga, ma e oo atu i le aso lona tolu o le polokalame, ua matua vaivai atoa lou tino, ma e oo atu i le kerisimasi, ua ou taoto. Ina ua oo i le taimi ou te toe foi ai i le Redemption city, sa matuā vaivai lou tino, ua lē mafai ona ou toe malaga i le auala. O lea na saunia se helikopa ou te malaga ai. Ina ua taunuu le helikopa, ua lolofi atu iai le motu o tagata, ma ua faigata ona ou alu atu iai. Na o atu le matou aufaigaluega ma avatu au i le helikopa, peitai ua faigata ona tuua le nofoaga, ona o loo pipii iai le toatele o tagata, ma iu ina ta’e le tiaoata o le vaalele. I le viiga o le Atua, na ou sao mai i lea tulaga ma taunuu ma le saogalemu i le fale. 

E iai taimi, o tagata e alolofa ia te oe, e manatu o loo latou faia ni mea mo lou lelei, peitai, e te tigaina ma leaga atu ai, i latou mea o loo faia, ae lē mo sou lelei. O tagata na lolofi atu i le helikopa e pei ona ou faamatalaina, e lei faapea na naunau ou te lavea ai. Na ō atu ona o le alolofa ia te a’u, ae latou te lei iloa o latou mea na faia semanu e ono aafia tele ai a’u. 

I le faitauga o le Tusi Paia o le asō, sa taumafai Eliapo e puipui ia Tavita aua o ia o le uso matua. E lei aoaoina Tavita o se fitafita ae o lea ua ia lui i le fitafita ua lava le tomai i taua. Ana o oe o Eliapo, e te ono faia mea uma e taofia ai Tavita mai le tau ma Koliata. Peitai e ui e lelei lona manatu, o ana gaoioiga semanu e taofia Tavita mai le faataunuuina o le faamoemoega o lona olaga.

Le au pele e, e tatau ona e faaeteete ia e iloa pe afai o loo gaioioi mai  lou aiga i se tulaga e taofia ai lou faataunuuina o le faamoemoega o lou olaga. I le Mataio 16:21-23, o Peteru lea faatoa maea folafola o Iesu o le alo o le Atua, ua ia amata ona tetee atu i lona matai ,i le taimi na amata talanoa ai i lona maliu. E mautinoa e alofa ia Iesu, peitai, toeitiiti lava avea o ia, ma maa faalavelave i le Alii i le ausia ai, o lona faamoemoega i le lalolagi. Ou te tatalo e fesoasoani atu le Atua e iloa poo gaoioiga a e pele ia te oe o loo taofia le finagalo o le Atua mo lou olaga. Tau ina ia foai atu le malosi ma le loto toa e te lē talia ai a latou upu ma taga e taofia oe mai le faia o lona finagalo, i le suafa o Iesu. 

Tatalo

Tamā, faamolemole fesoasoani mai ia te a’u ia ou iloa pe afai e lē manatu lo’u aiga i lou finagalo e tusa ma lo’u olaga, i le suafa o Iesu, Amene. 

OPEN HEAVENS

MATALA LE LAGI MO LE ASO LULU 10 IUNI 2026

(tusia e Pastor EA Adeboye)

Manatu Autu: Vaai au uo (Mind your friends)

Tauloto Tusi Paia: 1 Korinito 15:33 “Aua ne‘i fa‘asesēina ‘outou, “O lē feoa‘i ma ē amio leaga e leaga ai amio lelei.”

Faitauga - Tusi Paia: 2 Korinito 6:14-17

E toatele kerisiano e fai mai o i latou o fanau a le Atua, peitai o loo tumau ona uo vavalalata ma tagata lē faatuatua ma e matuā aafia leaga ai i latou i nei mafutaga. E masani i le ō i le lotu ae o loo iai a latou uō e matua lē fia auai i soo se mea e fesootai ma le Ekalesia. O kerisiano faapea, e ono masani ona faalogo i le Upu a le Atua ma auai i mea fai a le Ekalesia, peitai a faatasi ma uō, e lē taitai talanoa i mea tau le Atua. E oo lava ina avea a latou mafutaga ma ia uo e avea ma laau tuitui e luai mai ai i fafo le upu a le Atua mai o latou loto. 

O loo apoapoai mai iai tatou le faitauga mai le Tusi Paia o le asō, ia vavaeeseina i tatou mai le lalolagi aua e leai se fesootaiga a le malamalama ma le pogisa. Talitonu mai, e faigofie atu ona toso mai i lalo se tagata i lo le taumafai e toso atu i luga se tagata. O lona uiga e faigofie atu e uo lē faatuatua ona toso i lalo se kerisiano i lo le kerisiano e taumafai e toso i luga latou uo ia. O le mafuaaga lea na apoapoai mai ai Paulo i le au kerisiano, e aua nei amo faalegatasi ma le au lē faatuatua. 

Le au pele e, a iai ni au uo e faale lalolagi, e te ono fiafia foi la i mea o le lalolagi, ma e fai mai Iakopo 4:4 o le fefaauoa’i ma le lalolagi o le ita lea i le Atua, le Ekalesia ma tagata o le Atua ma e vave ae amata ona e faifai i mea o le Atua. I le 2 Timoteo 4:10, na faamatala e Paulo se talavou e igoa ia Tema sa malaga ma ia i ana talaiga peitai na iu ina ia tuua Paulo ona o le fiafia i le olaga o le lalolagi. A faataga ese tagata uo lē ola paia e avatu ni tamai alope e pei o amioga lē lelei, talanoaga amiolētonu ma amio agasala i lona olaga, e oo lava ina faaumatia ai o ia ( Pese a Solomona 2:15). 

O iai ni lagona poo ni naunautaiga e lē amio Atua o loo i lou olaga e mafai ona fesootai ma au mafutaga ma nisi o au uo? Tago e momotu ese na amio ma naunautaiga lē lelei ina ia aua nei e lulū i le vao tuitui ma e misia ai faamanuiaga a le Atua, pe tulei esea ai oe mai le faamoemoega o lou olaga e pei o Tema. E le gata i lea, aua e te toe mafuta ma au uo e lē ola paia ae amata ona e mafuta vavalalata ma le Atua faapea ma isi kerisiano e mafai ona fesoasoani ma faamalosi ia te oe, ina ia tupu lou faatuatua. Ou te tatalo ia taitaia oe e le Atua malosi e fausia ni mafutaga ma tagata o le Atua e fesoasoani ia te oe ina ia e gauai i le Atua ma faamalosi ia te oe e ausia faamoemoega a le Atua mo lou olaga, i le suafa o Iesu. 

Tatalo

Tamā, faamolemole taitai ia te a’u e faauō i tagata e lelei ma faamalosi i lo’u faatuatua ia te oe, i le suafa o Iesu, Amene

OPEN HEAVENS

MATALA LE LAGI MO LE ASO LUA 9 IUNI 2026

(tusia e Pastor EA Adeboye)

Manatu Autu: Amata mai Ierusalema (Start from Jerusalem)

Tauloto Tusi Paia: Galuega 1:8 “Ae peita‘i o le a maua e ‘outou le mana, pe ā afio ifo le Agaga Pa‘ia i luga ‘iā te ‘outou; e fai fo‘i ‘outou ma molimau ‘iā te a‘u i Ierusalema ma Iutaia uma lava, ma Samaria, e o‘o lava i le tulu‘iga o le lalolagi.”

Faitauga - Tusi Paia: Luka 16:10-11

E toatele kerisiano e fai mai o i latou o le malamalama o le lalolagi, e lelei tele aua o le poloaiga lenei a Iesu i tagata e mulimuli ia te ia i le Mataio 5:14. Peitai o le toatele o i latou ua lē faasusulu atu le malamalama o Keriso i o latou aiga, e latou te lei talai atu foi le talalelei o Keriso i tagata i lo latou siomaga. E te silafia ana faapea e taumafai kerisiano uma e manumaloina agaga o latou taulaga mo Keriso semanu faapenei ua faaolaina le lalolagi atoa?

Ina ua afio mai Iesu Keriso i lo’u olaga, e le gata na ia faaaogaina a’u e faasusulu atu ai lona malamalama i lo’u nuu, ae na ia faaaogaina foi a’u e faalauiloa atu ai le igoa o le matou nuu i le lalolagi. O aso nei, o tagata o lo’u nuu ua fiafia aua o loo latou aeae i faamanuiaga o le malamalama o Keriso. Talitonu mai, o le atinae o lou taulaga e faalagolago i ou tauau, oe le kerisiano aua a e faataga le malamalama o le Atua e susulu atu ai, e amata ona iloa e le lalolagi lea taulaga. E lē mafai e se tagata ona faatuatuanai i le malamalama. 

Ina ua tuuina atu e Iesu le poloaiga i ona so’o e ō atu e fai nuu uma ma so’o, na poloai iai latou e amata mai i Ierusalema, ona o atu lea i Iutaia ma faasolo atu i Samaria ona faatoa ō atu lea i tuluiga o le lalolagi (Galuega 1:8). O le fuafuaga a le Atua o lenei, e tatau ona tatou amata mai i lo tatou Ierusalema. Le au pele e, o lau Ierusalema o lou aiga ma lou nuu. Ta’u i lou aiga Iesu. Talai atu i ou tuaoi. Ia latou vaai atu i au galuega lelei ma viia ai lou Tamā i le lagi. E lē malosi lau molimau pe afai e te amata mai tuluiga o le lalolagi. O le mea moni, e lē tuuina atu e le Atua ia te oe le avanoa i tuluiga o le lalolagi seiloga ua e faamaonia o loo e faamaoni i lau Ierusalema. Na ia fetalai e na te tuuina atu mea e tele i lima o tagata e faamaoni i mea iti ( Luka 16:10). Afai e te inoino i lou tamai tulimanu, e le mafai ona tuuina atu e le Atua i ou lima nofoaga ma nuu tetele. 

Le au pele e, ole atu i le Alii pe faapefea ona e faamaoni i lou Ierusalema. Ole atu ia te ia e faaali atu ia te oe pe faapefea ona faasusulu atu lou malamalama i lou aiga. Faataga o ia e aoaoina oe pe faapefea ona e faasoa atu le alofa o Keriso i ou tuaoi ma tagata tou te faigaluega faatasi. Ia faasusulu atu e le Atua lona malamalama e ala atu ia te oe i lou aiga, tagata tou te mafuta faatasi, o tagata o lou nuu ma faapotopotoga o loo e auai ma le lalolagi atoa, i le suafa o Iesu, Amene. 

OPEN HEAVENS

MATALA LE LAGI MO LE ASO GAFUA 8 IUNI 2026

(tusia e Pastor EA Adeboye)

Manatu Autu: Aua le taofia le miti (Dont stop dreaming)

Tauloto Tusi Paia: Faataoto 18:16 “O le mea alofa a le tagata e fa‘alauteleina ai se ala mōna; e ta‘ita‘iina ai fo‘i o ia i luma o ali‘i.”

Faitauga - Tusi Paia: Salamo 105:17-21

E toatele tagata e tutupu ae o miti i mea tetele e latou te fia ausia. Peitai ao faasolo ina matutua, a vaavaai atu i le tulaga o latou olaga e lē o gatasi ma latou miti, e amata loa ona fatuatuanai i latou miti. A faamanatu atu iai e se tagata latou miti na iai muamua, e ono faapea mai nisi, ‘ua oo  mai le tulaga moni’. Atalii/ afafine o le Atua, e leai se tulaga moni e ese mai le tulaga ua e faatulagaina mo oe lava. Afai e tuua lou miti pea, pe galue agai i le ausia o au miti, e ono lē ausia lava. Peitai, tuufaatasi lou faatuatua i le Atua ma faaauau ona e miti pea, galue ia e ausia, ona e vaai lea ua taunuu. 

I le Kenese 41:41-44, na oo mai le avanoa ia Iosefa e pule ai, e pei ona ia vaaia i lana miti. E ui na taumafai ona uso e faaumatia lana miti ( Kenese 37:18-20), na taumafai foi le toalua o Potifara e faaumatia ia te ia ( Kenese 39:1-20), ae sa ia te ia le Atua ma ua manumalo o ia. Ao iai i le falepuipui, e ono ia faapea, ‘ua oo  mai le tulaga moni’ ma faatuatuanai i ana miti. Peitai, na faaauau pea ona saunia lona tagata i le siitia o ona agavaa i mataupu tau pulega ma le meaalofa o le faamatalaina o miti. Mai le talaaga o Iosefa, e tatou te iloa ai o le sausauniga e taua tele i le faatulagaina o oe e ausia au miti. Ana faapea na musua Iosefa e saunia lona tagata ma galue ia maua tomai ma agavaa, semanu na te misia le avanoa tele e ausia lana miti ina ua tulai i luma o Farao. Ana faapea na ia faamatala ia Farao na o lana miti e aunoa ma le tuuina atu o se fautuaga lelei i le pulea lelei o le oa ma le tamaoaiga o Aikupito, semanu e leiloa pe i’u ane ua toe faafoi i le falepuipui e siitia ai lona tulaga iina. 

Le au pele e, aua le na o le miti, saunia pea lou tomai ma agavaa e manaomia e ausia ai au miti ma faamaai i le manaomia pe a oo ina taunuu au miti. E tatau foi ona faaaoga au meaalofa mai le Atua i soo se avanoa e te maua. Fai mai le Faataoto 18:16 “O le mea alofa a le tagata e fa‘alauteleina ai se ala mōna; e ta‘ita‘iina ai fo‘i o ia i luma o ali‘i.” O au mea alofa e avatu ai le avanoa e ausia ai au miti ma o ou agavaa ma tomai e faaaupegaina ai oe e faataunuuina ma ola ai i au miti. A fetaui le avanoa ma le sauniuniga, e taunuu faamoemoega faataatitia. 

Le au pele e, aua e te inoino i aso e sauniunia ai lou tagata auā foi e faaleleia ai lau amio ma mafai ai ona e ausia au miti ma tumau ai mo se taimi umi. Ou te tatalo a oo mai le avanoa tele o loo e naunau iai, ua maea saunia lou tagata i le suafa o Iesu. E taunuu au miti pe afai e tuu lou faatuatua i le Atua ma galue pea ia taunuu, i le suafa o Iesu, Amene. 

OPEN HEAVENS

MATALA LE LAGI MO LE ASO SA 7 IUNI 2026

(tusia e Pastor EA Adeboye)

Manatu Autu: Tatalo I Taimi Uma (Pray always)

Tauloto Tusi Paia: Roma 12:12 “Ia ‘oli‘oli i le fa‘amoemoe ‘ia ‘onosa‘i i le puapuagā, ‘ia finafinau i le tatalo.”

Faitauga - Tusi Paia: Luka 18:1-8

I le Mataio 21:13, na fetalai Iesu o lona fale, o le fale tatalo ae lē o le ana o ē faomea. E ui o loo talanoa i le malumalu i Ierusalema i lea fuaitau, ia e maitau mai, o loo faatatau foi ia te oe aua o oe o le malumalu o le Atua (1 Korinito 6:19). O lona uiga o le finagalo o le Atua ia e tatalo i taimi uma. O kerisiano e lē tatalo, pe tatalo foi na o nisi o taimi e latou te tuu avanoa i le tiapolo e osofaia ma faaleaga iai latou. 

O se kerisiano, e finagalo le Atua ia te oe ia avea ma fale tatalo, e finagalo e te tatalo e lē aunoa (1 Tesalonia 5:17). Fai mai le Iakopo 5:17-18 na matuā tatalo ma le finafinau Elia ia aua nei toe paū se timu i Isaraelu, ona tali mai lea o le Atua i lana tatalo. Ina ua maea le 42 masina o le leai o se timu ma le oge, na toe matuā tatalo ma le finafinau ina ia paū le timu ona mamafa ai lea o timuga (1 Tupu 18:42-45). I le taimi o le oge ma le leai o se timu, na tatalo Elia mo le atalii o le fafine ua oti lana tane ia toe ola mai, na faafofoga iai le Atua (1 Tupu 17:22). O ia o se tagata tatalo i taimi uma, ma e na te maua lava tali o tatalo. O i latou e faamuamua le tatalo e latou te fiafia lava i le maua o tali o tatalo. 

I le faitauga mai le Tusi Paia o le asō, na faamatala e Iesu le faataoto o le fafine ua oti lana tane, na faalavelave faifai pea i se faamasino e amiolētonu seia oo ina tali ia te ia. O le mafuaaga na faamatala ai e Iesu lenei faataoto,  ina ia tatalo pea tagata e aunoa ma le faavaivai ( Luka 18:1). E tau mai ai iai tatou, afai e le tatalo se tagata, ua faavaivai. O le filigā pea o le fafine ua oti lana tane na maua ai le taui, aua na tali ia te ia le faamasino ma tulai e taui ma sui i lē sa faasagatau ia te ia. A e filiga i le tatalo, e mautinoa e te maua tali o au tatalo. 

A tatalo e lē aunoa se tagata, e le gata e na te maua tali o ana tatalo, ae o lea tagata e tuuina iai e le Atua avanoa e iloa ai mea lilo a le Atua. Fai mai le Salamo 25:14 “O lo‘o fa‘aali e le ALI‘I lona finagalo i ē matata‘u ‘iā te ia; na te fa‘ailoa atu fo‘i lana feagaiga ‘iā te i latou.” E leai ma se tagata e na te faaalia atu i se tagata asiasi mai i lona fale le ki i se potu lilo, ua nā o uo mamae e na te faaalia iai. 

O soo se kerisiano e tatau ona iloa o le latalata i le Atua e fausia i nofoaga o tatalo, ma e tatau ona naunau ma finafinau ia faalatalata atu i lo latou Tamā oi le lagi. Auā foi o le tele ona e tatalo, o le tele foi lea ona e iloa faaaliga i le finagalo o le Atua ma ana mea lilo. Le au pele e, o oe ea o se uo vavalalata a le Atua? O oe o le malumalu a le Atua ma e tatau ona e tatalo e lē aunoa, i le suafa o Iesu, Amene. 

OPEN HEAVENS

MATALA LE LAGI MO LE ASO TO’ONAI 6 IUNI 2026

(tusia e Pastor EA Adeboye)

Manatu Autu: Olioli I Taimi Uma (Rejoice always)

Tauloto Tusi Paia: Salamo 70:4 “Ia ‘oli‘oli ma fiafia ‘iā te oe i latou uma o ē sā‘ili‘ili ‘iā te oe; ‘ia fai ane pea i latou o ē fiafia i lau fa‘aolataga, “‘Ia vi‘ia le Atua.”

Faitauga - Tusi Paia: Salamo 68:3-5

Le au pele e, o le olioli o le Alii o lou malosi lea (Neemia 8:10), ma o le tasi lea o mafuaaga autu e tatau ai ona e olioli ia te Ia i taimi uma (Filipi 4:4). Tusa po o le a le tulaga o e i ai, afai e te mafaufau loloto i mea uma ua faia e le Atua mo oe, o le a e iloa ai ua lava ma totoe mafuaaga e te olioli ai. Fa’ata’ita’iga afai o e feagai i le taimi nei ma ni faafitauli tau tupe peita’i e te silafia o lo’o e ola fiafia i le soifua maloloina mai le Atua, e leai ni puipuiga fa’afoma’i mo oe i meataumafa e faataga ma fa’asā. I le tele o tausaga ua mavae sa i ai sa’u uo sa na o le susu e mafai ona tausami ai ona o le tulaga i lona soifua maloloina. Peita’i a o le’i maliu, e faitau miliona ana tupe i teugatupe i faletupe. 

Faapei o kerisiano, ua ia i tatou le tele o faamanuiaga e olioli ai; peita’i ua tatou masani i le manatu māmā i ai, i o tatou manuia. Atonu e te lē o maitauina le tāua o le mānava ola vagana ua e vaai i se tasi o faigata ona mānava. Faapena fo’i, atonu e te lē o silasila i le moe ma le ala a’e o se faamanuiaga, vagana ua e faalogo i tala o tagata na momoe a ma maliliu atu ai e le’i toe feala. Atonu o e feagai ma le tele o faafitauli ma faigata, peita’i o loo i ai pea e lē aunoa se faapogai o le olioli.

Ua faamalosi mai le tusi o Isaia 54:1; ia i latou e le’i maua se fanau ia olioli ai, auā o le olioli e mafai ai e se uso ona utu vai i vaipuna o le faaolataga (Isaia 12:3). Ina ua finagalo le Atua e tali le tatalo a Hana, na ia mua’i fa’amautinoa ua lē toe faanoanoa foliga o Hana (1 Samuelu 1:10). O le faamoemoe o Satani o le taofiofi o le au kerisiano i le faavauvau e lē aunoa, peita’i a filifili le au uso e olioli i le Alii i taimi uma, ua o latou tapunia le faitoto’a i foliga o le fili.

I le Sapakuka 3:18 na fetalai le perofeta e olioli ia i le Alii ma fiafia i le Atua o lona faaolataga. O le Atua mata’utia o le Atua o lou faaolataga, o lona uiga e mautinoa lana faaolataga mo oe tusa po’o a faigata e te lua feagai. O le isi lea mafuaaga mo oe e te olioli ai i le Alii i taimi uma. A e alu sa’o e te matamata i le faaiuga o se ata tifaga ma e vaai o loo ola pea le tagata autu o le ata, e te lē toe popole pe a e toe fo’i e matamata se vaega o le ata o tau oti ai le tama autu. E leai sou popole na o lou matamata fiafia auā ua uma ona e iloa le iuga o le ata.

Atalii /afafine o le Atua ua fa’amautinoa mai e le Atua ia te oe i lana upu o lou taunuuga o le filemu (Salamo 37:37). Aua ne’i e tu’u avanoa i le fefe po’o le atuatuvale a ia olioli i le Alii i taimi uma auā o le i ai o Keriso ia te oe, o se taunuuga mamalu ma matagofie o lo’o faatali mai mo oe (Kolose 1:27). Ia fai sau faaiuga e te olioli ma fiafia i le Alii i taimi uma, I le suafa o Iesu, Amene.

OPEN HEAVENS

MATALA LE LAGI MO LE ASO FARAILE 5 IUNI 2026

(tusia e Pastor EA Adeboye)

Manatu Autu: O se loto fou 5 (A brand new heart 5)

Tauloto Tusi Paia: 2 Timoteo 2:21 “O lenei, ‘ai se tasi e fa‘amamā ‘iā te ia a‘i nei mea, ‘ua ta‘uleagaina, e fai o ia ma ipu e ta‘uleleia, e fa‘asāina, e aogā fo‘i mo le ali‘i, ‘ua saunia mo galuega lelei uma.”

Faitauga - Tusi Paia: Mataio 13:8-9, 23

O le ituaiga eleele mulimuli na faamatala e Iesu i le faataoto o le tagata lūlū saito, na ia faaigoaina o le ‘eleele lelei’. O tagata o latou loto e faatusa i le eleele lelei o i latou e faalogo i le Upu a le Atua, talia ma faia. O le vaega lea o tagata faatuatua e fua mai ni fua, ae eseese foi tulaga. 

I le faitauga mai le Tusi Paia o le asō, e tatou te iloa ai, e lē faapea e tutusa uma seleselega. O nisi e selesele fua e ta’i tolusefulu, o isi e ta’i 60 ao isi e ta’i 100. Ou te talitonu o le fua e alu ese ai le tagata mai soo se mea e ono taofia le Upu mai le tupu i totonu ia te ia, o le fua foi lea e iai le tupu o le Upu ma fua mai ni fua i lona olaga. 

O le tauloto mai le Tusi Paia o le asō o loo faailoa mai ai iai tatou a faamama e le tagata o ia mai le agasala, e avea o ia ma ipu e ta‘uleleia, e fa‘asāina, e aogā fo‘i mo le ali‘i. O lea tagata e avea ma eleele ua faamamaina, e selesele mai ai ni fua e tele. Le au pele e, o oe o se eleele ua famamaina? Ua vavaeseina lou tagata mai le agasala, ma tuinanau e ma’a’a ai le eleele ma lē mafai ai ona maua ni fua? O loo faamalosi mai le 2 Timoteo 2:22 ia e sola ese mai tuinanau o tama aua foi o soo se ituaiga tuinanau e taofia le fua tele mai. 

 A iai le tagata ia Keriso, e tatau ona ia fua tele mai. Na fetalai Iesu i le Ioane 15:1-5 ma aumai ai se ata pe faapefea ona galue se kerisiano ia maua fua e ta’i 30, ona sii lea i le ta’i 60 seia oo atu i le fua e ta’i 100. Afai o oe o se lala i le tovine a le Atua, e te maua fua e ta’i 30. Ae a siitia laasaga ma faataga le Atua e faamama ma teuteu ia te oe, e siitia fua e te maua, o le seleselega e tai 60. Ae a e faia leisi laasaga e sosoo ai, tumau i le Atua ma faataga lana Upu e tumau i totonu ia te oe, e sili atu fua e te maua, o fua e tai 100. O le siitia o lou vavalalata ma Iesu, o le siitia foi na o fua e maua mai ia te oe, ma maualuga ai le viiga o le Atua pe a fua mai ni fua ia te oe (Ioane 15:8). 

Le au pele e, e lē mafai ona e latalata ia Iesu pe afai e te faataga pea le agasala i lou olaga. Afai o loo e ola pea i le agasala, salamo i le aso nei ma ole atu ia te ia mo se loto fou. Fai sau faaiuga ia lafoai atoatoa lou ola ia Iesu, aua foi na o i latou e faataga le Atua e pulea o latou loto e mafai ona fua mai e tai 100. Ia avea lou loto ma eleele lelei mo le Upu a le Atua e maua mai ai seleselega o fua e tai100 i lou olaga, i le suafa o Iesu. Ole atu i le Atua ia foai atu ia te oe se loto e uluola, e fua mai ai pea ni fua e faulai, i le suafa oa Iesu, Amene.