Seks, seksualiteit en intimiteit is net so belangrik vir mense wat met kanker gediagnoseer is as vir diegene wat nie kanker het nie. Trouens, navorsing het bewys dat seks ’n groot rol kan speel om mense te help om hulle kankerdiagnose in die gesig te staar – intimiteit kan hulle ook help om te ontspan terwyl hulle kankerbehandeling ondergaan. Maar die realiteit is dat ’n persoon se seksorgane, seksuele drange, en liggaamsbeeld so beïnvloed kan word dat die lus vir bedplesiere net nie meer daar is nie. Ons bespreek vandag ’n baie sensitiewe onderwerp, waaroor mense nie graag wil praat nie. Maar dit is iets waaroor ons moet praat – hoe ‘n kankerdiagnose jou seksuele gesondheid beïnvloed het. By ons in die ateljee is Suzaan Lourens, ’n berader en seksuoloog en ook Centurion Hospcie se eie Philip Aucamp – hy is nie vandag hier as maatskaplike werker nie, maar as ’n man wat ‘n pad met kolonkanker geloop het, en hoe dit ook sy huwelik en seksuele drange beïnvloed het. Welkom julle en baie dankie dat julle bereid is om met ons te gesels.