Historical narrative about Japan’s Imjin War and Sengoku Jidai period. It’s a story of courage, honor, respect, loyalty and bravery read in Ilocano. This is 2nd of 4 parts.

EXCERPT:

Idi MIL KUWATRO SIYENTOS WALOPULO KET DUA (1482), nupay kinuna ni Yoshimasa nga ipa-imanan ti rebbengenna a kas shogun kenni Yoshihisa, nagtalinaed a nakibi-biang daytoy iti bakofu aglalo iti akem a diplomasiya ken pannaki-innuman kadagiti dadduma nga agtuturay. Kasta pay met kadagiti desisyon maipapan kadagiti templo a Buddhist. Daydi pasaray a pannakibibiyang ken ni Yoshihisa ti agpada nga ama ken inana ket nakasikoran unay daytoy. Idi MIL KUWATRO SIYENTOS WALOPULO KET PITO (1487), agtawen idin ti DUAPULO KET DUA (22) ni Yoshihisa ket agak-akemen a maika-SIYAM ( 9) a shogun ti Bakofu Ashikaga. Iti daytoy a tawen nangidaulo iti militar a nagdagup iti DUAPULO A RIBU (20,000) a soldado a napan nangpasardeng iti panagalsa ni Rokakku Takayori a daulo ti probinsiya nga Omi. Idi MIL KUWATRO SIYENTOS WALOPULO KET WALO (1488), sinukatan ni Yoshihisa ti naganna iti Yoshihiro. Nagin-inut daytoy a nagessem a nagin-inum iti arak. Imbaw-ingna ti interesna manipud turay ken militar ket impanna ti adu nga orasna iti artes ken letras. Indutokna dagiti akemna kadagiti asideg kenkuana a tattaona. Idi MIL KUWATRO SIYENTOS WALOPULO KET SIYAM (1489) natay ni Shogun Yoshihisa iti tawenna a DUAPULO KET UPPAT (24) iti ekspedisionna idiay Omi. Nasuspetsa a daydi impatayna ket atake ti puso gapu iti napan-panuynoyan a panaglablabesna iti arak ken bisyo. It kasta naipa-ima manen ti turay iti amana a ni Yoshimasa.

Kas kadkadawyan iti tradisyon ti kaputotanda, innala ni Yoshimasa a taraknenna ti anak ni Yoshimi a ni Yoshiki (Yoshitane) a nayanak idi MIL KUWATRO SIYENTOS INNEM A PULO KET INNEM (1466). Sa nangala ti maikadua a tinarakenna nga anak ti maysa a kabsatna iti ama a ni Ashikaga Masatomo. Kabsat da Yoshimasa ken Yoshimi ni Masatomo iti ama. Daydi anak ni Masatomo nga innala a tinaraken ni Yoshimasa ket isu daytoy ni Yoshizumi a naiyanak idi Enero ti MIL KUWATRO SIYENTOS WALOPULO KET MAYSA (1481). Dagitoy a kaadda ti taraken ti shogun a kakaanakanna ket pangpatibker iti linya ti pannakaipatawid ti shogun iti kaputotanda. Daytoy ket agsipud ta no mapukaw ti nakatugaw a shogun, dagitoyto kameng ti pamilyana a tinaraken ken pinadakkel ti shogun ti paggapuan ti sumublat iti turay.

Iti daydi a tawen a pannakatay ni Yoshihisa, kinaddua ni Yoshimi ti anakna a ni Yoshiki idiay Kyoto. Kalpasanna simrek ni Yoshimi a monghe idiay templo ti Tsugen iti distrito ti Sanjo a pagnaedan ti anakna a babai. Innalana ti nagan a Dozon iti daydi iseserrekna manen a monghe. Natay ni Yoshimasa iti sakit idi MIL KUWATRO SIYENTOS SIYAM A PULO (1490) ket idiay bagungonna, nagsarita ni Yoshimi. Kinunana a nasayaat unay idi ti panaglangenda nga agkabsat idi un-una bayat ti kinaubbingda. Ket linadingitna daydi napasamak a pannakadadael ti panagtunos ken panaglangenda gapu kadagiti dakes nga aramid ken madi a bal-balikas ti tattao. Iti daydi a tawen, MIL KUWATRO SIYENTOS SIYAM A PULO (1490), naipatawid ti kina-shogun kenni Yoshiki (pasaray pay idi a managanan ti Yoshitada wenno Yoshitane) nga anak ni Yoshimi. Nagbalin ni Yoshiki a maikasangapulo a shogun ti kaputotan nga Ashikaga. Ngem narabsut daydi akemna idi MIL KUWATRO SIYENTOS SIYAM A PULO KET TALLO (1493) ket naikkat daytoy a shogun. Naisubli man met laengen daytoy a shogun babaen ti tulong ni daimyo Ouchi Yoshioki idi MIL SINGKO SIYENTOS WALO (1508) ket nagturay daytoy agingga iti MIL SINGKO SIYENTOS DUAPULO KET MAYSA (1521).

PLEASE LISTEN TO THE PODCAST FOR THE FULL EPISODE.