Historical account about a period of Japan called Sengoku Jidai narrated in the Ilocano language (Philippines). This is 3rd of 4 parts.

EXCERPT:

"...Kalpasan daydi a panagballigi ni Nobunaga a nangparmek ken Imagawa, nagnayon a timmibker ti turayna. Idi MIL SINGKO SIYENTOS INNEM A PULO KET MAYSA (1561), pimmusay daydi pangulo ti kaarruba a probinsiya ti pagturayan ni Nobunaga nga Owari. Managan daytoy a probinsiya ti Mino. Iti ipupusay daydi pangamaen ti Mino, simmublat a nangituray ti anakna a lalaki, ni Saito Tatsuoki. Gapuen to nakapsut ti panangituray ni Tatsuoki, nanggundaway ni Nobunaga ket kinumbinsena dagiti tattao ti Mino a kumadduada kenkuana. Kalpasanna, rinautna ti probinsiya a Mino ket napuwersa a nagtalaw ni Tatsuoki.

Iti tunggal ranget nga inggapuananna, daydi panagballigi ni Nobunaga ket gapuen ti sirib, pigsa ti nakem ken ingetna. Kasta met a nakalukat ti panunotna a mangsarabo kadagiti baro a pagaammo. Saan a nagkedked a nangawat kadagiti naisangsangayan ken naiduma nga armas a matakuatanna. Isu ti immuna a lider a hapon a nangipakat ti pannakausar iti paltuog. Naidanon ti paltuog a pakigubat iti Hapon gapu kadagiti agtagilako nga agdaldaliasat ti baybay a naggapu iti Portugal ken kadagiti sabali a lug-lugar iti Laud. Iti sabali a bangir, dagiti maingel ken natangig a samurai ket nakirangetda a nakasakay iti kabalyoda. Nagusarda iti espada ken pika iti pannakirangetda.

Ti panagbalin a nalaing ken nasiglat a samurai ket nabayag a sanayen, adalen ken gamden ti maysa a mannakigubat. Maigidiat daytoy iti panagaramat iti paltuog ta nabibiit daytoy nga adalen. Uray kadawyan a soldado ket mabaelanna a sanayen ti agpaltuog iti saan a nabayag unay. Iti kasta, sinanay ni Nobunaga dagiti pasurotna iti panagusar ti paltuog. Bayat ti panangrarautna kadagiti dadduma a matur-turayan tapno padakkelenna ti iturayanna, binaonna dagiti inhenyerona a nangbangon ti rangrangtay ken nangpalawa kadagiti kal-kalsada tapno nadaras ti panagdaliasat ti dakkelen a puwersana. Isut’ immuna a nangusar iti bapor a nasalakniban ti landok wenno asero ti bagina.

Nagsasaruno dagiti daimyo a naparmek ken napatulnog ni Nobunaga. Dimmak-dakkel ti iturayanna. Rinugyanna a pinasayaat ti ekonomiya babaen ti panaglilinnako ken panagtalon. Nangaramid pay daytoy iti sistema a panagbuis ket daytoy ti nangalaanna ti pinangsuportana kadagiti iturayanna.

Ngem nadangkok a kabusor ken nainget nga agturay ni Nobunaga. Nariknana a kadakkelan a mangatipa iti gandatna a mangagpakaykaysa kadagiti naruay nga agsisinnaranget a daimyo ket isu daydi institusyon dagiti Buddhist. Iti daydi a panawen, nabilegen ken napigsan ti impluensiya ti pammati a Buddhist iti Hapon. Nangmentenar dagiti templo iti ‘so-hei’ wenno monghe a soldado ken ‘monto’ wenno pasurot. Masansan a makibiang dagitoy kadagiti bambanang iti gimong ti ili ken makiragup kadagiti rinnanget nga agbanag. Nagwarasda iti entero a pagilian ket adu kadakuada ti addaan dadakkel a dagdaga ken adu a sansanikua.

Adu met kadakuada ti addaan kabukbukodan a kinawayawaya ken awan pannakibiangda kadagiti bambanag a maipapan iti pagilian. Ti kapigsaan idi kadakuada a lapped ti gandat ni Nobunaga ket daydi kangrunaan a templo a sanga ti Ishiyama Honganji. Isu daytoy daydi Jodo Shinshu a pammati ken maiyulog a ‘Pudno nga Awan mulitna a Daga.’ Daydi templo nga Ishiyama Honganji ket isut’ adda iti tapaw ti dakkel nga organisasyon a binukel dagiti monto. Isu met daytoy ti paggigimongan ti liga dagiti gimong ken daimyo a mangbusor ken ni Nobunaga. Nairaman ditoy idi ni Ashikaga Yoshiaki nga idi ket isut maika sangapulo ket lima a shogun ti Bakofu Ashikaga."

PLEASE LISTEN TO PODCAST FOR THE FULL EPISODE.