「山教我的事」讀冊會

這學期讀冊會欲讀的冊，有一本叫做「山教我的事」。我有印象敢若幾年前佇公司的讀冊會，捌讀過這本冊。因為牽仔足敖清物件，我毋知影這本冊有予清掉無？就line 問伊，咱兜敢有這本冊？伊隨翕相予我看，猶閣有佇咧厝裡的冊櫃內底，按呢就免閣開錢買冊矣。牽仔講這本冊誠好看，伊哪有可能共清掉。選冊的時陣，我已經袂記持這本冊是咧寫啥？閣共掀一遍來看，就有淡薄仔記持矣，因為冊裡有講到原住民，幾年前佇公司讀這本冊的時陣，有一個原住民的同事就順續教阮幾句泰雅族的族語。

因為讀冊會的同學捌參加過冊內底講到的「鳥教官」，有長期佇桃園大湳森林公園，舉辦𤆬人看鳥仔的活動。伊拍算欲揣鳥教官吳豫州老師，親身來𤆬阮讀這本冊。想袂到跟作者沈恩民（小民）是好朋友的吳教官，直接就共作者ui台北內湖，招來桃園高中，跟阮做伙讀冊。這就敢若咱去看一齣電影，結果主角紲對螢幕內底走出來跟咱開講握手仝款，因為作者小民攜足濟本伊畫過的畫本，內底就有印佇「山教我的事」這本冊內底的幾偌張圖，上原本的手稿。

吳教官會跟小民熟識的緣分，跟咱台灣的山有關係。吳教官ui伊自國校仔四年，去予美麗的山色迷去了，就開始愛爬山。到伊後來佇教育部服務，開始用爬山這款無圍牆的學校，來𤆬彼些誤入歧途行著歹路的囡仔，看會使慢慢陪伴怹，𤆬怹行轉來對的路無？到伊退休了，猶閣繼續咧𤆬這款囡仔爬山。

作者小民是因為工作上碰到壁，自細漢就愛繪圖，讀冊跟畢業食頭路嘛攏跟設計有關係，結果伊紲對伊繪出來的圖失去信心，是按怎伊攏綴袂著世界出名的遐些設計師繪出來的圖？伊畫的圖到底有啥物價值？伊的選擇是毋是一開始就毋對？畫圖設計這條路敢閣行會落去？為著欲走揣認同家己畫圖的價值，伊開始參加爬山的活動，而且是用伊的畫筆，來記錄伊所看到的風景、山色、人物，跟沿路所聽到的代誌。

有一遍，小民聽到吳教官閣欲𤆬囡仔去爬山，伊就共報名，看會使綴去做怹的記錄員無？頭先吳教官隨共拒絕，因為小民並無跟這款特殊的囡仔做伙生活的經驗，吳教官驚會出代誌。後來吳教官看到小民是用畫圖做記錄的時陣，伊就答應矣。因為以早的記錄員攏是用翕相的，這些囡仔猶未二十歲，所以有出現面容的相片，毋是去予人馬賽克，就是兩蕊目睭予人貼烏條，有夠䆀的，用畫的就無這個問題，嘛是對這些囡仔的一種尊重。

因為這個理由，小民開始綴吳教官怹𤆬囡仔去爬山，做一個佇邊仔恬恬觀察畫圖的記錄員；嘛是這個理由，予小民揣到伊畫的圖，有跟別人無仝款的價值，改變伊過去是用「比較」的目色來看代誌。看到別人的好，就隨用「咱那會遐爾䆀」的箭，射對咱家己彼粒脆弱的玻璃心；改換做用「分享」的角度來看，別人好咱嘛袂䆀，每一個人攏有伊無仝款的好，無仝款的價值，做伙鬥陣貢獻予咱的團體跟社會。所以小民講，伊嘛是予吳教官改變跟救倒轉來的，彼個揣無路，毋知欲行去佗位的一個囡仔。

來讀冊會上讚的代誌，除了會使聽到真濟朋友，用跟咱無仝款的人生體驗，來跟咱分享無仝款的觀點之外，有當時仔，閣會使看到台灣上媠的風景，就是社會上有遐濟無私布施的無名英雄。只要吳教官發願，無論是欲陪囡仔行路環島，騎鐵馬環島，抑是今馬愈做愈濟醫生加入的，全台灣第一間非營利的野生動物診所，消息一放出去，就會看到全台灣每一個所在的志工，善心人士，有錢出錢，有力出力，有陪伴的，有提供設備的，有攢食攢蹛的，做伙同齊來實現吳教官的心願。這款的景致，這款的力量，實在是予人足感動的。

吳教官因為「山教我的事」這本冊，跟阮讀冊會結緣了，伊嘛佇一禮拜後，直接𤆬阮去大湳森林公園行讀，拍開阮的五感，跟大自然接觸，教阮按怎認捌鳥仔，聽鳥仔聲，看鳥仔巢。聽伊咧講鳥仔，你就知影，是按怎人攏叫伊鳥教官矣。