近來想欲寫蛇年春聯，但攏想無步，無靈感。今年是輪到欲合查某囝的名，我就問查某囝「蛇」妳會想到啥？伊講「煎藥仔」。雖然煎跟蛇的台語聽起來是有倚到音，但毋知欲接啥？揣網路頂的俗語，嘛誠少講到蛇的好話，甚至民間有人會忌剋講到蛇，攏共蛇叫做溜。

有一遍轉去丈人彼，隔壁厝邊K先生拄好來厝裡坐。佇開講的過程中，丈人講伊下晡時較毋敢泡茶，驚暗時厚尿。K先生嘛綴咧講，查晡人食到咱這個年歲，就是有這種問題，伊嘛是。我知影K先生怹後生跟阮查某囝年歲差不多，應該跟我仝緣的，毋是阮丈人彼輩。我就問伊「咱差無幾歲吧」「我溜」伊隨共應，「阿毋才大我兩歲爾，我羊仔」。旦佇網路頂揣到這款講法爾，想袂到佇生活中就隨拄到。

用溜來想嘛猶無靈感，只好繼續揣，有揣到誠濟中語音的諧音，譬如講「蛇麼都好」「蛇我其誰」。看了，敢若有淡薄仔感覺矣。其實，若是用蛇的文讀音，頂懸兩句，唸做台語嘛是有倚音的「蛇物攏好」「蛇我其誰」。按呢，頂聯來共寫做

「心頭在蛇攏毋驚」，就敢若俗語所講的「樹頭徛予在，毋驚樹尾做風颱」的意思仝款。

下聯愛用「云」做起頭，我會記持查某囝捌佇農禪寺刻佇壁頂的金剛經翕到伊的名。因為有一句經文的尾字是心，下句的頭字是云，經文無標點符號，兩句接做伙，就拄好出現伊的名，按呢下聯會使對佛經來揣靈感。金剛經講一切有為法攏是夢幻泡影，按呢咱人欲如何來安住咱的心，予咱袂起煩惱咧？慈悲喜捨是佛教講的四無量心，是眾聖者菩薩所修的自利利他的法門，咱若佇生活中會使無時無刻實踐四無量心，咱就袂受到金剛經所講的夢幻泡影的影響，共咱的心安住佇無所掛礙的所在。按呢，下聯就共寫做「云何住慈悲喜蛇」。

蛇年的春聯鬥好了。

「心頭在蛇攏毋驚」

「云何住慈悲喜蛇」