台語有人共蛇叫做溜，按呢我蛇年的四字聯來共寫做溜。隨想到的是「溜之大吉」，有溜嘛有吉，應該會使算作過年的好話。有人講人的天性是追求快樂跟逃避痛苦，拄到問題就想辦法解決，若是無辦法解決，按呢跤底抹油溜之大吉嘛是無辦法中的一種辦法。

溜溜大順是中語六六大順的倚音，讀作台語嘛誠順，因為溜了有順才會當逃過災厄。看到今馬美國加州有夠驚人的野火就知，若溜會赴是厝燒無去爾，溜未赴人就無命矣。

最近面冊頂有誠濟朋友咧食尾牙，除了食好料，上好就是會使閣抽到大獎。我知影抽籤抽獎的「抽」字是讀做thiu，但我會記持「抽鬮仔」的「抽」字，我攏讀做liu。無知是我記毋對亦是地方腔，抑才是無仝字。查線頂教育部的台語字典，就看到這兩種讀法攏有收入來。按呢抽鬮仔抽著好運，嘛會使用仝音的溜字來代寫做「溜著好運」的四字春聯矣。