ღია პოდკასტის მე-7 ეპიზოდში, მადონა ხარებავა და თომა კაკაბაძე განიხილავენ შეზღუდული შესაძლებლობის მქონე დევნილ პირთა უფლებრივ და სოციალურ-ეკონომიკურ მდგომარეობას ზუგდიდის მუნიციპალიტეტში. შეგახსენებთ, რომ აფხაზეთის ომის შემდგომ, ზუგდიდში, იძულებით გადაადგილებულთა შორის, იყვნენ შშმ პირებიც. მთელი ამ პერიოდის განმავლობაში, სახელმწიფოსთან ერთად, მათი მხარდაჭერისა და განვითარებისთვის, რამდენიმე ადგილობრივი არასამთავრობო ორგანიზაცია, დასავლური ფონდების ფინანსური დახმარებით უამრავ პროექტს ახორციელებდა. აღნიშნულ პროექტებზე დაყრდნობით, დაიხვეწა ჯანდაცვის სერვისები, დაინერგა ინკლუზიური სწავლების საწყისი მოდელები, ამოქმედდა მუნიციპალური საბჭოები და სხვა... მადონა ხარებავას განცხადებით, ყველა ეს მიღწეული შედეგი ახლა ე.წ "რუსული კანონის" გამო საფრთხეშია და თუ ამ კუთხით არაფერი შეიცვალა, შშმ პირები ისევ მარტო დარჩებიან ყოველდღიური გამოწვევების წინაშე.