بعد ما انتهت مرحلةِ الثانويّة على خير، وخُتِمت رحلة 12 السّنة وكُلِّلَت بالنّجاح بتوفيق من اللّه وفضله، وبعد ما فرّحت عيلتك، وعبِّيت الحوش بالتّبريكات والزغاريد والهدايا.. فضِت الزّحمة، وانتهت البُهجة، وقعدت برُوحك! وجتّ لحظة الإدراك بأنّك وصلت لمُفترق طرق حقيقي، وإنّك تُقابل معركة «اختيار التخصّص» وجهًا لوجه!

شن حـ ندير؟ وشن بنخُش؟ وكيف نعرف إنّ هذا التّخصص مُناسب ليّا أو لا؟ نسمع فيهُم يقولوا أتبع شغفك، باه كيف نعرف شغفي! وشن هوّ الشّغف أصلًا؟ نخش طب؟ ولّا هندسة؟ ولا قانون؟

هذا كلّه وأكثر من الأسئلة إلي حـ ادُّور في بالك، حـ يجاوبنا عليها اليُوم «الأستاذ أشرف الوداوي» إلّي يوصف نفسه بإنّه مهتم بمساعدة الناس عامة و الشباب خاصة لتحديد مسارهم ولاكتشاف ذواتهم ورقة وقلم، ونفس عميق، وفنجان قهوة، واسمع حِسّ الجامعة… 🎙️🎧