薟妹仔跟阿弟仔是讀仝班的同學，彼年為著欲代表怹彼班去參加全學校班聯會主席的選舉，怹先予班上的同學投票初選，看誰會使代表怹彼班去參選。佇初選的過程中，阿弟仔一直叫薟妹仔愛約束伊佇網路頂遐的支持者，較君子些，莫閣胡亂共攻擊矣；薟妹仔嘛公開共回應講，遐嘛愛你先去說服別人，你是會予人信任的，因為欲做班聯會的主席，誠信是上基本的條件。

初選結束，薟妹仔選贏了，就隨叫阿弟仔來做伊的副手，做伙代表怹彼班去選全學校的班聯會主席，怹倆人佇班上初選彼時陣，吵吵鬧鬧罵來罵去的喙瀾，早就焦佇喙角，袂記持了了矣。莫怪有一齣足出名的表演藝術戲劇「那一夜，我們說相聲」內底的笑詼話是按呢講「誰記得誰痛苦」。

阿弟仔較早捌做過怹彼班一站仔的班長，彼當陣有發生一件卡國語小老師的事件。因為同學選出來的國語小老師，捌得罪過阿弟仔的換帖的，阿弟仔就叫學藝股長莫予上任，結果辭掉三個學藝股長了，閣換轉來第一個辭的彼咧學藝股長，才予國語小老師上任。後來有人問阿弟仔對這件代誌的感想是啥？阿弟仔嘛共規學期攏無國語小老師的過程袂記持了了，干焦會大聲共人講，恁逐家毋通袂記持，彼咧國語小老師是佇我做班長的時陣，予伊上任的喔！頂懸彼句笑詼話會使閣來共講一遍「誰記得誰痛苦」。

今年，換阿弟仔代表怹彼班去選全學校的班聯會主席，伊拄欲出門去揣這遍和伊做伙選的副手阿美仔的時陣，薟妹仔拄好駛車經過，就紲手載伊一逝。佇車內，阿弟仔共薟妹仔講：頂屆妳會選我來做妳的副手，眼光真正有夠好，這四年來我就是學到妳的好眼光，今年才會揣阿美仔來做我的副手。車駛到位，接到阿美仔了，薟妹仔就落車，共車交予阿弟仔跟阿美仔，祝福怹倆人佇班聯會主席的選舉會當順利成功。

中語有一句流行話按呢講：只要我不尷尬，尷尬的就是別人；台語嘛會使按呢綴咧講：咱若袂礙虐，會礙虐的就是別人：咱若袂齷齪，會齷齪的就是別人。咱若袂記持，會記持的就是別人，誰記得誰痛苦，會痛苦嘛是別人。

# https://bit.ly/3TJHNZW

#誰記得誰痛苦對我這忘性好的人真療癒