【詩名】：思慕的味

【作者】：劉惠蓉

【詩文】：

虱目魚干那會遮爾芳

熟似的芳味引阮

想去向時仔的過去

較早常在入喙的滋味

啊～就是這个味

頭殼內是思慕

閣有滿腹的懷念

遮爾濟年來

不管時佇身軀邊踅

踅來轉去的味

曝焦的虱目仔魚

有咱放袂落的記持

思慕的滋味

懷念的氣味

予阮綴你走揣思念的伊

芳閣媠的記持

永遠綴佇咱身軀邊

千萬毋通予這个味

漸漸消失去

漸漸消失走無去

註：台語文用字尊重作者原創，不做更動，如有疑問請查詢教育部《臺灣閩南語常用詞辭典》網站。