الخُطب ماعدتش نافعة

الكلام سيف اللي مش قادر يهاجم

كل حرف فـ حضنه شايل ألف أفعى

كل أفعى فـ بطنها عضم وجماجم

الأفاعي اجمعوها

فـ اللهيب ياللا احدفوها

ناركو اوعوا تزعَّلوها

لو تجوع ادوها دفعة

زغَّطوها نعنشوها

فرفشوها بأيّ أفعى

بس تبقى الأفعى نيَّة

نيَّة طازة لسَّه حيَّة

حيَّة صابحة دوغري جايَّة

جايَّة مِن وكر الحناجر

جايَّة مِن وكر الحناجر

اللي طافحة بكدب فاجر

كدب متغذِّي بألمنا

باعنا وبأوجاعنا تاجر

وانتصر لمَّا انهزمنا

جينا نصرخ قام مهاجر

هوب عشِّش فـ الكلام

لجل يصبح مادة خام

للبيانات الخسيسة

للهتافات البئيسة

للخُطب وسط الزحام

المُلخص: أفعى جنب الأفعى ماشية

والزحام عمَّال يصقَّف فوق دماغنا

الزحام قرَّر يكون للكدب حاشية

يعني لازم نبتسملُه لو لدغنا

يعني تلخيص الحكاية

إنكم راسمين قدركم

إنكم عايشين ضحايا

يا أساتذة باختياركم

كل كلمة بتقولوها

فيها أفعى هـ تلاقوها

غارزة نابها جوَّه روحكم

ريقها بيسمِّم جروحكم

بس خايفين تحرقوها

تحت كل كلمة نايمة

ع الورق قدام عينيكم

فيه أفاعي سارحة هايمة

قايمة بتدوَّر عليكم

حتَّى جوَّه الغنوة ديَّا

فيه أفاعي متداريَّة

اوعوا اوعوا تسمعوها

الفحيح دا مش بتاعي

ياللا حالًا سكِّتوها

فـ اللهيب ويَّا الأفاعي

غنوتي ياللا احدفوها

دي الأفاعي فـ كل ساحة

قاعدة تتلوى ببجاحة

دي الأفاعي فـ كل شاشة

قاعدة تتلوى ببشاشة

أقوى من كل المصايد

فـ الدراما فـ الجرايد

أقوى من كل المصايد

فـ الأغاني فـ القصايد

فـ الدعاية فـ المراية

جوَّه صوتكم انتي وانتا

الأفاعي فـ كل حتَّة

حتَّى فـ بطون المعاجم

........................

كلمات وألحان: أنطونيوس نبيل

توزيع: محمد يسري

إيقاع: أحمد بدير

كولا: عبد الله حلمي

قانون: عمرو الصواف

أكورديون: وائل النجار

جيتار: أحمد حسين

كورال:

خالد عبد الغفار

أحمد عبد السلام

مصطفى النجدي

مي حسن

هندسة صوت وماستر:

ميشيل عبد الملك

رؤية فنية: أنطونيوس نبيل

تصوير: محمود عفيفي

موديل: نيفين عبد الحميد

تصميم أزياء: مريم مسعد

ميكاب أرتيست: ميران وجدي

تصميم لوجو: أحمد أبو الحسن

مونتاج: هيثم عزت