आयुष्यात अकस्मात आलेल्या संकटांच्या मालिकांतून धैर्यानं पुढे जाण्याची जिद्द काही जणींमध्ये असते. पोटात जीव घेऊन घराबाहेर पडावं लागलेल्या शैलाच्या आयुष्यात अशाच संकटांची मालिका आली. पण तिनं माघार घेतली नाही. पती नाही, घरदार नाही, पैसा नाही अशा बिकट अवस्थेत असतानाच तिला सिव्हिल हॉस्पिटलचा आधार मिळाला आणि तेथील आशाताईचा भक्कम आधार मिळाला. मुलीचा जन्म झाला. मुलीला तिनं उत्तम शिकवलं आणि ती मोठी होऊन तिचा विवाहही झाला...ती आई झाली. कन्यारत्न पदरात पडले अन् एक भयानक संकट ओढवले...नियतीच्या या निष्ठूर खेळातून बाहेर कसं पडायचं याची चिंता असतानाच एक लेक लाडकी योजनेचा फार मोठा आधार लाभला अन् तिनंही धीरानं परिस्थिती बदलून टाकली. समाजात असा संघर्ष करणाऱ्या असंख्य जणींना अडचणीवर मात करण्यासाठी अशा योजना केवळ मदत करीत नाहीत, तर त्यांना जगण्याची नवी उमेद देतात.