你宜家出咗嚟 喺士丹利街
背向陆羽茶室 前边係正邦大厦
我哋转左 上山
个男仔行我右边 同我一齐行
我闻到一阵好特别嘅麝香味同埋芒果香味
係佢嘅香水 我永远都唔会忘记
眼前所见嘅街道 最旧嘅唔超过一百六十年
佢话我知 佢阿爷以前係卖鸦片嘅
士丹利街大部分嘅 都係鸦片批发商
佢哋间铺头 一楼係办公室 商人都住喺二楼
香港嘅经济神话 就喺鸦片嘅浓烟中展开
其实 香港本来就係指芳香嘅港口
宜家停一停
我哋嚟到砵甸乍街
佢喺香港係最古老嘅街道
见唔见到嗰个车紧衫嘅男人
佢係我朋友周先生
周先生係1947年嚟到香港嘅难民
佢喺砵典乍街 做裁缝已经50年喇
嗰部衣车都陪咗佢35年
依家转左 沿住砵甸乍街
向上行 小心楼梯
啲鹅蛋石好跣 慢慢行
裁缝同卖假发嘅小贩嚟到呢度之前
呢度经常会有脚链嘅声音
当时要起砵典乍街 係为咗连接警局同埋前面嘅监狱
睇下 就喺嗰边
呢啲建筑物依家已经荒废咗
政府想拆嗮佢哋
但係就惹嚟极大嘅反对声音
我哋嚟到街口
眼前係威灵顿街
等阵 睇下右边
呢度曾经係红灯区 夜之女混集之地
当时香港有好多水手 商人同埋探险家
宜家转右 行入威灵顿街
嗰个男仔话俾我听 佢阿爷嘅拍档係美国人
爱上咗一个同佢身份唔配嘅21岁妓女
间妓院搦嗮佢啲钱作为惩罚
佢嘅爱另佢踏上破产之路
最后 佢就喺嗰个妓女张床度自杀死咗
我冇出声
我唔钟意悲惨嘅古仔
个女仔后嚟点样 根本冇人关心佢嘅命运
我哋沿住威灵顿街落山
留心睇下 揾下门牌71-73号
抬头望 有一个雕花嘅红木牌 揾到未？
入边有一排铁邮箱
揾唔揾到71-73号啊？
入咗去没？上楼梯啊
嗰个男仔行先 我跟住佢
佢好静 我净係听到我嘅脚步声
突然之间 我感觉到佢嘅体温
令到我觉得好紧张
继续上楼梯
依家面前有道橙色同黑色嘅门
行入去啊 欢迎
依家我哋入咗去
转左 穿过木拱门
入去一间铺咗白色瓷砖嘅大房
停一停先 睇下前边 天花挂住把旧式嘅电风扇 喺度慢慢咁转
睇下前边 副墙分成左中右三个部分
睇下右边嗰个部分 见唔见到啲数字 揾第八行
就由底数上第八层
1 2 3 4 5 6 7 8
见到佢没啊？好多年前嗰个男仔俾我睇过呢张相 呢张八寸乘八寸嘅相
嗰个男仔话：我哋好似样 係唔係？
我答： 係啊 你哋好似样啊
个男仔又话：我望住幅相 就觉得同佢好亲近 我觉得佢好渴望被爱
我问佢 点解？佢话：你仔细咁睇下佢对眼
我觉得有一股莫名其妙嘅哀伤
既然爱会无声无息咁逝去 点解仲要被爱
墙上 每幅相背后都有一个逝去嘅爱情古仔 我同个男仔讲
佢问我：唔通你唔需要被爱咩？
我哋都经历过 但係对爱嘅渴望一直都冇变
你身边有好多过嚟参拜同埋参与宗教仪式嘅人
佢哋向已故嘅亲人奉上水果同埋饭餸
希望啲亡魂能够安息
我哋中国人係好重视祖先嘅
依家转身 穿过大厅
向前行 行上嗰条金龙下边嘅四级楼梯
右边係道教八大仙之一吕洞宾嘅祭坛
停喺呢度 想象去上香 祈求吕洞宾保佑
抬头睇下个天花 好 行喇
继续穿过呢间道观
右边有另外一道印住阴阳图案嘅玻璃门
拉开门 我哋行落楼
继续行落去

小心撞头

依家我哋返番去威灵顿街
转右 沿住威灵顿街落去
右边係香港最出名嘅食店之一 喺77号 麦奀嘅云吞面世家
由窗口望入去 会见到前边嘅箩度全部都係煮滚咗嘅面
要令到啲面软硬适中 都要有相当嘅技巧
继续行落山

依家你喺阁麟街同埋威灵顿街嘅交界
转右 我哋沿住阁麟街落山
抬头望向左边 你会见到一个扶手电梯 佢係全世界最长嘅扶手电梯
由码头一直去到半山
未到街口 你会见到一间古老嘅中药铺喺右边
阁麟街8号 叫春回堂药行

行入铺头