ဘယ်တော့မှ ထပ်မရေးချင်တော့တဲ့ ကဗျာတစ်ပုဒ်။

-

ကာလာစုံခွင့် မတတ်နိုင်ရှာတဲ့ အဖြူအမဲရုပ်ရှင်၊

နောက်ခံတေးဂီတ၊ Frequency အပြည့်မကြားရ၊

ချိုတကူးလေး ဆင်းရဲရမယ့် ဇာတ်ညွန်းနဲ့အတူ၊

ရေပေါ်မှာရေးလိုက်တဲ့ အရုပ်တွေ

အသက်ငင်‌နေတဲ့ သူရဲကောင်းတွေနဲ့

ပြည်တွင်းစစ်ကို သက်တမ်းတိုးလိုက်ပါတယ်။

ကံကိုမယုံနဲ့။

ကိုယ့်ကိုယ်ကို မယုံနဲ့။

ကံကိုပြုနေတဲ့ လူတွေကိုမယုံနဲ့။

ကိုယ့်ကိုယ်ကို ယုံနေတဲ့ လူတွေကို ပိုမယုံနဲ့။

တစ်ယောက်ဂုတ်သွေးတစ်ယောက်စုပ်လိုက်၊

လက်ပြန်ကြိုးတွေတုတ်လိုက်၊

သစ်ပင်တွေအကုန်ခုတ်လိုက်၊

အချစ်တွေကိုနုတ်လိုက်၊

ပြီးတော့

တို့အလံကို ရုတ်လိုက်..။

ကဲ

ဘာကျန်မလဲ။

သတင်းကောင်းမရှိတော့တဲ့ ဒီကမ္ဘာမှာ

ဘာကြံစရာများ ကျန်သေးလို့လဲ။

ဒီနေ့မနက်

တာဝန်လစ်ဟင်းမှု အနည်းငယ်အတွက်

ထမင်းမဝတော့တဲ့ အိမ်မက်တွေအတွက်

ဧည့်သည်မလာတော့မယ့် ဧည့်ခန်းတွေအတွက်

ကိုယ့်ကိုယ်ကို ခွင့်လွှတ်ထားပါတယ်။

ကျွန်တော်တို့တွေ

ဘယ်လောက်ကြာကြာတွေ့ရမယ်

ဘယ်လောက်ကြာကြာမေ့ရမယ် ဆိုတာ

မသေချာတော့ဘူး။

ပေးစရာရှိတာတွေပေးပြီး

ရစရာရှိတာတွေပါ ပေးလိုက်ချင်တယ်။

ခင်ဗျားလိုတာ ကျွန်တော်ဆီမှာ ရှိရင်ယူပါ။

ကျွန်တော်လိုတာ ခင်ဗျားဆီမှာ ရှိရင်လည်း ယူပါ။

သတင်းကောင်းမရှိတော့တဲ့

ကမ္ဘာကြီးမှာတော့

ကျွန်တော် အသက်မရှည်ချင်ပါ။

ကျွန်တော် အသက်မရှည်ချင်တော့ပါ။

ကျွန်တော် အသက်မရှည်ချင်တော့ပါ။

(Music)

ငါ့သတ္တိ၊ ငါ့စွမ်းရည်၊ ငါ့ကြမ္မာ ချိနဲ့ခဲ့လို့

မလုံနိုင်ရှာတော့တဲ့ ငါ့လိပ်ပြာလေးရေ။

သင်လိုရာသွားဖို့ ငါခွင့်ပြုချင်နေခဲ့တာပါ။

သတင်းကောင်းမရှိတော့တဲ့ ဒီကမ္ဘာကနေ

ဝေးနိုင်သမျှ ဝေး..အောင်သာ...။

(Melody + Lyric)

ကမ္ဘာဟာ အကြိမ်ကြိမ် ပျက်စီးခဲ့ပြီးသားပေမယ့်

ဘီယာရယ်၊ ဘော်ဒါရယ်၊ ဟာသများစွာရယ်၊

တစ်ညလောက်ပြန်ပေးပါ၊

လွတ်လပ်ပြီး ငြိမ်းအေးတဲ့ကမ္ဘာ၊

ကမ္ဘာဟာ အကြိမ်ကြိမ် ပျက်စီးခဲ့ပြီးသားပေမယ့်

ပင်လယ်မှာနေဝင်တာ တစ်ယောက်တည်းကြည့်ချင်တယ်၊

နောက်ဆုံးထွက်သက်ကလေးမှာ

Lucky Strike လေးဖွာ

သတင်းကောင်းမရှိတော့တဲ့ကမ္ဘာ..။

Harmony & Guitar by Elijah