ಅಧ್ಯಾಯ 87: ಅಲ್ ಆಲಾ(ಉನ್ನತ)

ಸೂಕ್ತ : 1

(ದೂತರೇ,) ಉನ್ನತನಾಗಿರುವ ನಿಮ್ಮ ಒಡೆಯನ ಪಾವಿತ್ರ್ಯವನ್ನು ಜಪಿಸಿರಿ.

ಸೂಕ್ತ : 2

ಅವನು (ನಿಮ್ಮನ್ನು) ಸೃಷ್ಟಿಸಿದವನು ಮತ್ತು ರೂಪಿಸಿದವನು,

ಸೂಕ್ತ : 3

ವಿಧಿಯನ್ನು ನಿರ್ಣಯಿಸಿದವನು, ಸರಿದಾರಿಯನ್ನು ತೋರಿದವನು.

ಸೂಕ್ತ : 4

ಮೇವನ್ನು ಬೆಳೆಸಿದವನು.

ಸೂಕ್ತ : 5

ಕೊನೆಗೆ ಅವನು ಅದನ್ನು ಕಪ್ಪಗಿನ ಕಸವಾಗಿಸಿದನು.

ಸೂಕ್ತ : 6

ನಾವು ನಿಮಗೆ ಓದಿಸುವೆವು ಮತ್ತೆ ನೀವು ಮರೆಯಲಾರಿರಿ.

ಸೂಕ್ತ : 7

ಅಲ್ಲಾಹನು ಇಚ್ಛಿಸಿದ್ದರ ಹೊರತು. ಅವನು ಬಹಿರಂಗವಾದುದನ್ನು ಮತ್ತು ಗುಪ್ತವಾದುದನ್ನು ಖಂಡಿತ ಬಲ್ಲನು.

ಸೂಕ್ತ : 8

ನಾವು ನಿಮ್ಮ ಪಾಲಿಗೆ ಸುಲಭದ ಹಾದಿಯನ್ನು ಸುಗಮ ಗೊಳಿಸುವೆವು.

ಸೂಕ್ತ : 9

ಉಪದೇಶದಿಂದ ಲಾಭವಿದ್ದಲ್ಲಿ ನೀವು ಉಪದೇಶಿಸಿ.

ಸೂಕ್ತ : 10

(ದೇವರ) ಭಯ ಉಳ್ಳವನು ಉಪದೇಶ ಸ್ವೀಕರಿಸುವನು.

ಸೂಕ್ತ : 11

ದುಷ್ಟನು ಅದರಿಂದ ದೂರ ಉಳಿಯುವನು.

ಸೂಕ್ತ : 12

ಅವನು (ಪರಲೋಕದಲ್ಲಿ) ಮಹಾ ಅಗ್ನಿ ಕುಂಡವನ್ನು ಸೇರುವನು.

ಸೂಕ್ತ : 13

ಅದರಲ್ಲಿ ಅವನಿಗೆ ಸಾಯಲಿಕ್ಕೂ ಆಗದು ಬದುಕಲಿಕ್ಕೂ ಆಗದು.

ಸೂಕ್ತ : 14

ಖಂಡಿತ ವಿಜಯಿಯಾದನು - ಶುದ್ಧನಾದವನು.

ಸೂಕ್ತ : 15

ಹಾಗೂ ತನ್ನೊಡೆಯನ ಹೆಸರನ್ನು ಸ್ಮರಿಸಿದವನು ಮತ್ತು ನಮಾಝನ್ನು ಸಲ್ಲಿಸಿದವನು.

ಸೂಕ್ತ : 16

ಆದರೆ ನೀವು ಇಹಲೋಕದ ಜೀವನಕ್ಕೆ ಪ್ರಾಶಸ್ತ್ಯ ನೀಡುತ್ತೀರಿ.

ಸೂಕ್ತ : 17

ನಿಜವಾಗಿ ಪರಲೋಕವು ಉತ್ತಮವಾಗಿದೆ - ಮತ್ತು ಅದು ಸದಾ ಉಳಿದಿರುತ್ತದೆ.

ಸೂಕ್ತ : 18

ಗತಕಾಲದ ಹೊತ್ತಗೆಗಳಲ್ಲಿ (ಗ್ರಂಥಗಳಲ್ಲಿ) ಇದನ್ನೇ ಹೇಳಲಾಗಿದೆ -

ಸೂಕ್ತ : 19

- ಇಬ್ರಾಹೀಮ್ ಮತ್ತು ಮೂಸಾರ ಹೊತ್ತಗೆಗಳಲ್ಲಿ (ಗ್ರಂಥಗಳಲ್ಲಿ).

(via) Quran in Kannada(ಕನ್ನಡದಲ್ಲಿ ಕುರ್ ಆನ್) app

https://play.google.com/store/apps/details?id=com.nzymic.kquran