Tað kann næstan vera ræðandi at hugsa um alt tað, sum ein lærari skal duga og megna.
Tað sigur Herálvur Jacobsen, sum eftir níggju góð ár sum formaður í Føroya Lærarafelag nú mynstrar av. Lærarin skal vera eldhugaður, og hann skal brenna fyri sínum faki. Hann skal duga at fáa samband við næmingarnar, fáa teir at luttaka í orðaskifti, og hann skal duga at leiða flokkin, so at dygdargóð undirvísing spyrst burturúr.